Read koho Ôse 1 Bible Online

Ôse 1 - koho bible

Ôse 1

¹Do la jơnau Yàng Jehôwa đơs mơ Ôse, kòn klau Beeri, tòm pah rài at bồ Ujia, Jôtham, Aca, mơ Ejekia la ală cau bơtau Juda dê mơ tòm pah rài at bồ Jerôbôam, kòn klau Jôas, la cau bơtau Israel dê.

²Tŭ Yàng Jehôwa sơntòm đơs mơ Ôse gen Kơnràñ sồr khai lah: “Lòt tĕ bau mơ dô nă cau ùr dri tơlàr, mơ deh kòn rềs àr bơrnàn, tài bơh ƀòn lơgar do neh sang lòi Yàng Jehôwa mơ tìs glài rềs àr bơrnàn.”

³Behơ̆ Ôse lòt bau mơ Gômer, kòn ùr Diblaim dê. Khai bun mơ deh Ôse in dô nă kòn klau.

⁴Gen Yàng Jehôwa đơs mơ khai lah: “Tơmoh tĕ sơnđan khai la Jejreel tài bơh gam dô êt jŏ tai gen Añ rơp lơh glài hìu nhă Jehu tài bơh bơta gơhòr mhàm tòm Jejreel, mơ Añ rơp tơnlồi lơgar bơtau Israel.”

⁵Tòm ngai hơ̆ Añ rơp dơrpă àtak Israel dê tòm thòng Jejreel.

⁶Gômer bun tai mơ deh dô nă kòn ùr. Yàng Jehôwa đơs mơ Ôse lah: “Tơmoh tĕ sơnđan khai la Lôruhamah, tài bơh Añ rơp ò yal tơlik bơta kòñ gơboh dê làng bol Israel tai, mơ kung ò tai toh glài bol khai in!

⁷Mơya Añ rơp nđàc sơngit di làng bol Juda, mơ Añ rơp dong klàs bol khai, Añ ò kơnòm di àtak, đào hala bơta tòmlơh, ò di kơnòm di ơseh hala cau ling hào ơseh, mơya kơnòm di Jehôwa Yàng Tom Trồ bol khai dê.”

⁸Tơnơ̆ mơ tŭ Lôruhama lòi pô, Gômer bun tai mơ deh dô nă kòn klau.

⁹Gen Yàng Jehôwa đơs lah: “Tơmoh tĕ sơnđan khai la Lôammi, tài bơh bol mê ò di la làng bol Añ jê, mơ Añ ò di la Yàng Tom Trồ bol mê dê.”

¹⁰“Bulah behơ̆, ntum khà làng bol Israel dê rơp kung be bràs di gah dàlềng, ò rgơi was, ò rgơi kòp; tŭ hơ̆, di tiah Añ neh đơs mơ bol khai lah: ‘Bol mê ò di la làng bol Añ jê,’ bol khai rơp geh sơnđan la ‘Ală kòn Yàng Tom Trồ kis gam sùm dê.’

¹¹Làng bol Juda mơ làng bol Israel rơp geh tơrgòm dô bă bal, bol khai rơp pồ bơtào mìng dô nă cau kwang at bồ; bol khai rơp dòp sre brê bơh ù tiah do, bơh ngai Jejreel dê rơp la ngai dờng.”