Read koho Ôse 10 Bible Online

Ôse 10 - koho bible

Ôse 10

¹Israel la dô tòm chi ño tơlir niam, gơlik plai gơ dê. Tòm tŭ plai khai dê sơlo bơtơl oă, khai bơt bơtào bơtơl ală cơnòng duh khoai tai; lơgar khai dê sơlo ntoat tơngguh, khai pò dờng ơnàng ală jrong duh khoai khai dê.

²Nùs bol khai la blac pơrlồm, tŭ do bol khai pal àñ ơnòng bơta tồi glài bol khai dê. Yàng Jehôwa rơp sòr tơrlơm ală cơnòng duh khoai, mơ rơp tơnroh ală jrong duh khai bol khai dê.

³Gen tŭ do bol khai rơp đơs lah: “Bol he ò gơs bơtau at bồ, tài bơh bol he ò duh rngòt dê Yàng Jehôwa; mơ bulah gơs dô bơtau, ñchi bơta khai rgơi lơh bol he in taih?”

⁴Bol khai đơs jơnau ò kwơ, bol khai srat să gòi, mơ lơh ală bơta ho bal; gen tàng bơta yă wơn gơhòn lik be ñhơt bih khih tòm sre neh lơòr.

⁵Làng bol ơm tòm Samari rngòt rơm să bơh rùp kơnrồ kòn tòm Bet Aben. Làng bol gơ dê rơp ñìm rac bơh gơ, mơ ală cau gơnoar ơn phan duh khoai rùp ràk rơp ñìm rac bơh gơ, bơta gơklŏ gơ dê neh sang lòi gơ.

⁶Bơh să tòm gơ kung rơp kong cèng tus hơ Asiri lơh gơs phan ơn cau bơtau dờng lơgar hơ̆ in. Epraim rơp kong sền òsơp, mơ Israel rơp kong ƀàssìl ƀàsso bơh ală rùp ràk bol khai dê.

⁷Bơtau Samari rơp kong roh rui kung be dô nơm thul hơđang nha dà.

⁸Ală tiah jơnhoa tòm Aben, bơta tồi glài Israel dê rơp kong tơnroh, ală lò mơ rlau lò rơp hòn dờng hơđang ală cơnòng duh khoai bol khai dê. Bol khai rơp đơs mơ ală mơnơm lah: “Jơm gòm tĕ bol hi!” mơ đơs mơ ală dòr lah: “Dùh tĕ hơđang bol hi!”

⁹Ơ Israel, bơh di ală ngai Gibea mê neh tìs glài, mơ tềng hơ̆ bol khai gam pơnjat sùm; ò di bơta kơlìn neh tòmpìt sơmbrơt bol khai tòm Gibea ò ơ?

¹⁰Añ rơp tus tòmdră mơ lơh glài ală cau kră kơldang; mơ ală làng bol rơp pơjum bal tòmdră mơ bol khai, tòm tŭ bol khai kong lơh glài bơh tồi glài bàr dơ̆ bol khai dê.

¹¹Epraim la kung be dô nơm kơnrồ dra jak dòn bơr, kòñ pơrjòt kòi; mơ Añ rơp rcang lòi ngko lơmă gơ dê. Mơya Añ rơp ơn ngal Epraim dê; Juda pal lơòr ù, mơ Jakôp pal pŏ ù.

¹²Sih tĕ să tòm bol mê in bơta song ring, toès tĕ bơta kòñ gơboh kơ̆ dơn, lơòr tĕ ù tiah pa; Bơh tŭ do la tŭ tơngai jòi jat Yàng Jehôwa, jơl tus di tŭ Kơnràñ tus, mơ tuh mìu bơta song ring hơđang bol mê.

¹³Mơya bol mê neh lơòr bơta iơh bơsak, bol mê neh toès bơta ò song ring; bol mê neh sa plai bơta blac pơrlồm. Tài bơh bol mê neh kơnòm di bơta pràn bol mê dê, mơ oă ngan mpồl ling jak tòmlơh bol mê dê.

¹⁴Gen tàng jơnau nggồr nggàc bơh bơta kơlìn rơp guh tòmdră mơ làng bol bol mê dê, ală tiah kơp gàr bol mê dê rơp kong tơnroh kung be Salman neh tơnroh Betarbel tòm ngai tòmlơh dê, tòm tŭ ală mè kong cơm tơnlề bal mơ ală kòn bol khai dê.

¹⁵Ơ Betel, hơ̆ la ală bơta rơp gơlik tus hơ bol mê, tài bơh bơta iơh bơsak bol mê dê la dờng ngan. Tòm tŭ rìng àng bơtau Israel dê rơp kong tơnroh.