Read koho Ôse 11 Bible Online

Ôse 11 - koho bible

Ôse 11

¹“Tòm tŭ Israel gam la cau kơnòm, Añ neh kòñ gơboh khai; Añ hòi kòn klau Añ jê lik bơh Ejiptơ.

²Añ sơlo hòi bol khai, gen sơlo bol khai lòt ngài bơh Añ. Bol khai neh ơn phan duh khoai ală Baal in, mơ chu kơlhô ală rùp ràk in.

³Hơ̆ la să tòm Añ neh bơto Epraim in git lòt, Añ kơnđu bol khai tòm tơwòr tê Añ jê; mơya bol khai ò đal git să tòm Añ neh sơm bol khai in.

⁴Añ neh tề lam bol khai mơ che lơbơn niam kòn mơnus dê, mơ che kòñ gơboh; Añ neh tă yô bơh di ngko bol khai dê mơ kun tơmù nàng siam bol khai.

⁵Ngan! Bol khai rơp rê wơl hơ lơgar Ejiptơ, mơ cau Asiri rơp lơh gơs bơtau bol khai dê, tài bơh bol khai neh sang lòi ò bài rê wơl hơ Añ.

⁶Đào rơp sreh tơnchơt bol khai tòm ală ƀòn dờng bol khai dê, rơp tơnroh ală mpồng ƀòn dờng bol khai dê, mơ sa loan jơh bol khai. Tài bơh bơta ma blac bol khai dê

⁷Làng bol Añ jê neh kun pơrlac ngài bơh Añ. Bulah bol khai hòi tus hơ Bơtau Hơđang Rlau Jơh; Mơya Kơnràñ kung ò yò bol khai guh.

⁸Ơ Epraim, mbe Añ rgơi sang lòi mê taih? Ơ Israel, mbe Añ rgơi jào mê tòm tê cau sò tơm taih? Mbe Añ rgơi gơwèt mơ mê kung be Atma, hala lơh mê in kung be Jebôim taih? Nùs Añ wañ lơnggơh! Nùs nđàc sơngit Añ jê kung be chu be pơrguc.

⁹Añ rơp ò lơh gơlik bơta gơjrañ duh hơng Añ jê, mơ kung rơp ò tơnroh Epraim tai. Bơh Añ la Yàng Tom Trồ, ò di la kòn mơnus; Añ la Bơtau Sàng Goh ơm digùl bol mê, Añ ò lòt tus mơ bơta gơjrañ dờng Añ jê.

¹⁰Bol khai rơp lòt jat Yàng Jehôwa, Kơnràñ rơp ơluh ơhùm be klìu triă: tòm tŭ Kơnràñ ơluh, ală kòn sau Kơnràñ dê rơp bơh đah mattơngai mut rơm să rngòt mơ tus.

¹¹Bol khai rơp rơm să rngòt mơ tus kung be ală sềm tus bơh Ejiptơ, mơ kung be ală sềm ntòp tus bơh Asiri. Añ rơp tơnrê bol khai hơ hìu tòm bol khai dê.” Yàng Jehôwa đơs behơ̆.