Read koho Ôse 2 Bible Online

Ôse 2 - koho bible

Ôse 2

¹“Đơs tĕ mơ oh mi mê la Ammi, mơ lŏ ùr mê la Ruhamah.

²Tòmyă tĕ mơ mè bol mê dê, yă tĕ khai, bơh khai ò di la bau ùr Añ, mơ Añ ò di la bau klau khai. Lòi khai sang lòi bơta dri tơlàr bơh di muh mat khai, mơ bơta rềs àr bơh di ntơh khai dê.

³Dilah ò gen Añ rơp hồ tă jơh ồi ào khai dê, lòi khai ơm kuh be ngai khai pa deh; Añ rơp lơh khai in gơlik gơs be ƀlàng ngềt ngơt, be ù rañ rsơh, mơ lòi khai in chơt tơhìr.

⁴Añ rơp ò yal tơlik bơta kòñ gơboh dê kòn sau khai, bơh hơ̆ la kòn sau bơta rềs àr bơrnàn dê.

⁵Ngan behơ̆, mè bol khai dê neh lơh dri tơlàr, mơ bun deh bol khai tòm bơta ƀàssìl ƀàsso. Bơh khai đơs lah: ‘Añ rơp lòt jat ală cau klau añ kòñ gơboh la ală cau ai añ in phan sa dà hùc, sơnò belàt mơ bài, mơñà mơ tơrnòm.’

⁶Tài behơ̆ tàng Añ rơp ai tòm lò cang gùng khai dê; mơ Añ rơp bơt dô nơm dơrñang tòmdră mơ khai, gen tàng khai ò rgơi jòi ală gùng khai dê.

⁷Khai rơp ting jat ală cau klau khai tòmtir, ting mơya ò bàn: khai rơp jòi jat bol khai, mơ jòi ò gŏ. Gen khai rơp đơs lah: ‘Añ rơp rê wơl hơ bau klau sơnròp añ jê, bơh tŭ hơ̆ añ geh lơngai lơngò rlau mơ tŭ do.’

⁸Khai òhềt đal git Añ la Bơtau neh ai khai in kòi mbo, tơrnòm mơ mơñà, neh tuh khai in oă ngan priă mơ màh mơ khai neh ngui nàng lơh gơs phan ơn Baal in.

⁹Behơ̆ gen Añ ai wơl kòi mbo Añ jê tòm tŭ gơ neh dum, mơ tơrnòm Añ jê di di kơnhai gơ dê. Añ rơp ai wơl sơnò belàt mơ bài, la phan ngui nàng klơm să kuh khai dê.

¹⁰Behơ̆ Añ rơp ràng tơlik bơta ƀàssìl ƀàsso khai dê di đap ală cau khai tòmtir, mơ ò gơs cau lơi rgơi dong khai klàs bơh tê Añ.

¹¹Añ rơp pơndut jơh ală bơta pơjum chò hòp khai dê, ală ngai pơjum sa kòp nam, ală ngai Dùl lik, ală ngai Saƀat, mơ jơh ală ngai pơjum sa ndai jat be neh lơh nền.

¹²Añ rơp tơnroh ală chi ño mơ chi ƀal khai dê, mơ khai đơs lah: ‘Ală chi do la jền tơngai mơ ală cau añ kòñ gơboh neh ai añ in.’ Añ rơp lơh ală chi hơ̆ gơlik be chi tòm dơr brê, mơ ală phan brê rơp sa loan gơ.

¹³Añ rơp lơh glài khai bơh ală ngai mơ khai neh chu kơlhô ală rùp ràk Baal in, khai bơka să mơ bơno tồr bal mơ ală lŭ màng, khai lòt jat ală cau khai tòmtir, ai Añ gen khai neh lòi hŭi.” Yàng Jehôwa đơs behơ̆.

¹⁴Gen tàng tŭ do Añ rơp jà pơndòm khai, Añ rơp lam khai tus tòm ƀlàng ngềt ngơt, mơ ai jơnau bơkah lơngồt đơs mơ khai.

¹⁵Añ rơp jào wơl ală suơn ño khai in, mơ rơp lơh thòng Akôr gơlik gơs dô nơm mpồng gơn kơnòm. Tềng hơ̆ khai rơp đơs chò kung be tòm ngai khai gam kơnòm să, mơ kung be tòm ngai khai lik klàs bơh lơgar Ejiptơ.

¹⁶Yàng Jehôwa đơs lah: “Tòm ngai hơ̆, ai rơp hòi Añ la ‘bau klau añ jê’, mơ ai rơp ò tai hòi Añ la ‘cau tòm añ jê.’

¹⁷Bơh Añ rơp tă tơlik ală sơnđan Baal bơh di bơr khai, ò gơs cau lơi hòi di ală sơnđan bol gơ dê tai.

¹⁸Tòm ngai hơ̆, Añ rơp bơh bol khai mơ bơt bơta ho bal mơ ală phan poan jơng tòm ƀlàng, ală sềm hơđang trồ, mơ ală phan wìn nsròng tòm ù. Añ rơp tơnroh jơh ală àtak, ală đào, mơ bơta tòmlơh bơh di ù tiah do, tồ jơh làng bol in geh bic rlô ring lơngai.

¹⁹Añ rơp bau mơ ai gam sùm sùm; Añ rơp bau mơ ai tòm bơta song ring mơ song ngan, tòm bơta kòñ gơboh kơ̆ dơn mơ bơta kòñ nđàc.

²⁰Añ rơp bau mơ ai tòm bơta dòn song, mơ ai rơp đal git Yàng Jehôwa.”

²¹Yàng Jehôwa đơs: “Tòm ngai hơ̆, Añ rơp ho wơl, Añ rơp ho wơl mơ ală tap trồ, mơ ală tap trồ rơp ho wơl mơ ù tiah.

²²Ù tiah rơp ho wơl mơ kòi mbo, mơ tơrnòm pa, mơ mơñà, mơ bol gơ rơp ho wơl mơ Jejreel.

²³Añ rơp tam khai Añ in tòm lơgar; Añ rơp nđàc sơngit di Lôruhama, mơ Añ rơp đơs mơ Lôammi, ‘Mê la làng bol Añ jê;’ mơ khai rơp đơs lah: ‘Kơnràñ la Yàng Tom Trồ añ jê.’”