Read koho Ôse 4 Bible Online

Ôse 4 - koho bible

Ôse 4

¹Ơ làng bol Israel, iat tĕ jơnau Yàng Jehôwa dê, bơh Yàng Jehôwa lơh nền glài làng bol tòm lơgar do, tài bơh tòm lơgar do ò gơs bơta dòn song, ò gơs bơta kòñ gơboh, kung ò gơs bơta git wă Yàng Tom Trồ tòm tiah do.

²Tềng hơ̆ mìng gơs bơta srat rma, bơta blac pơrlồm, bơta tơnchơt cau, bơta ntung kơñau, mơ bơta rềs àr bơrnàn; bol khai sang lòi jơh ală bơta boh lam, kư̆ lơh gơhòr mhàm sùm ò dơh.

³Behơ̆ tàng, lơgar rac ròc, làng bol chơt roh, ală phan poan jơng tòm brê mơ ală sềm hơđang trồ, bal mơ ală ka tòm dàlềng kung roh rui sơl.

⁴Mơya bañ gơs cau lơi tòm pơndang bal mơ gơp, mơ kung bañ gơs cau lơi tòmyă, bơh bol mê la bơta tòm pơndang Añ jê, ơ cau gơnoar ơn phan duh khoai.

⁵Mê rơp gơtup pừ tòm trồ ngai, mơ ală cau gơnoar hwơr kung gơtup pừ bal mơ mê tòm trồ mang sơl. Behơ̆ Añ rơp tơnroh mè mê dê.

⁶Làng bol Añ jê kong tơnroh tài bơh siơ̆u bơta git wă. Tài bơh bol mê sang lòi bơta git wă, Añ kung sang lòi mê tồ mê ò lơh gơs cau gơnoar ơn phan duh khoai Añ jê; Mơ bơh di tŭ bol mê neh hŭi bơta boh lam Yàng Tom Trồ bol mê dê, gen Añ kung rơp hŭi kòn sau bol mê dê sơl.

⁷Bol khai sơlo bơtơl oă kàr lơi, gen sơlo bol khai tìs glài tòmdră mơ Añ kàr hơ̆ sơl; bol khai tòmgơl bơta gơklŏ mơ dòp bơta ƀàssìl.

⁸Bol khai ròng siam să bơh ală bơta tồi glài làng bol Añ jê, bol khai gơboh bơh bơta iơh bơsak làng bol Añ jê.

⁹Mơ gơ rơp gơlik gơs, làng bol be lơi gen cau gơnoar ơn phan duh khoai kung behơ̆ sơl. Añ rơp lơh glài bol khai bơh ală gùng dà bol khai dê, mơ tơm wơl bol khai in jat be ală broă bol khai neh lơh.

¹⁰Bol khai rơp sa mơya ò hòm, bol khai lơh dri tơlàr mơya ò tơnggơs bơtơl, tài bơh bol khai neh sang lòi Yàng Jehôwa, ting jat ală yàng ndai.

¹¹Mơ ơn să tòm bol khai tòm bơta rềs àr mơ tòm bơta ñô sa bơñul lơmbè la ală bơta tơnroh bơta git wă làng bol Añ jê.

¹²Bol khai hòi lùp mơ dô gơl chi, gen geh ho wơl bơh dô nơm gai gơ dê. Nùs nhơm rềs àr lam bol khai lòt tìs nrah, mơ bol khai ò dòn song mơ Yàng Tom Trồ bol khai dê.

¹³Bol khai ơn phan duh khoai hơđang bồ mơnơm; chu kơlhô hơđang ală dòr, hơđơm tòm cha, hơđơm chi pơnggŏ, chi nho rề, tài bơh mƀur gơ la niam ngan. Behơ̆ tàng kòn ùr bol mê dê lơh gơs ùr dri, mơ ƀan bol mê tìs glài rềs àr bơrnàn.

¹⁴Añ rơp ò lơh glài ală kòn ùr bol mê dê tòm tŭ bol khai lơh bơta dri tơlàr, mơ kung ò lơh glài ƀan bol mê dê tòm tŭ bol khai lơh bơta rềs àr bơrnàn; tài bơh ală cau klau bol khai lòt rê mơ ală ùr dri, mơ ơn phan ơn pơdơng bal tòm tiah duh khoai ală cau dri tơlàr dê. Dô nơm làng bol ò git wă behơ̆ rơp gơkòl roh rui.

¹⁵Ơ Israel, bulah mê lơh dri tơlàr kung bañ lòi Juda gơlik tìs glài. Bañ lòt hơ Gilgal; bañ guh hơ Bet Aben. Bañ srat să mơ lah: “Ngan be Yàng Jehôwa kis gam sùm sùm.”

¹⁶Bơh Israel kơldang bồ kung be dô nơm kơnrồ dra kơldang bồ, gen mbe Yàng Jehôwa rgơi ròng siam bol khai kung be belàt kòn tòm ƀlàng ñhơt taih?

¹⁷Epraim tòmklac mơ rùp ràk, lòi tĕ dò khai!

¹⁸Tòm tŭ phan ñô bol khai dê neh jơh, bol khai lòt jat bơta ñô sa bơñul lơmbè tòm bơta rềs àr; bol khai kòñ gơboh bơta rềs àr rlau mơ bơta gơklŏ.

¹⁹Dô nơm càl neh pùt bol khai tòm ală pơnđar gơ dê, mơ bol khai rơp kòl ƀàssìl tài bơh ală cơnòng duh khoai bol khai dê.