Read koho Ôse 6 Bible Online

Ôse 6 - koho bible

Ôse 6

¹“Tus tĕ, bol he rê wơl hơ Yàng Jehôwa, bơh Kơnràñ neh crè bol he, mơ Kơnràñ rơp sơmbòi bol he; Kơnràñ neh lơh bol he, mơya Kơnràñ rơp pồt wơl bol he.

²Tơnơ̆ mơ bàr ngai, Kơnràñ rơp lơh bol he in kis wơl, tòm ngai pe Kơnràñ rơp tơngguh bol he, tồ bol he in kis di đap Kơnràñ.

³Lòi bol he đal git tĕ Yàng Jehôwa; bol he pơnđơl tĕ đal git Kơnràñ. Bơta tơlik mat Kơnràñ dê la nền cê ngan be rìng àng drim, Kơnràñ rơp tus hơ bol he kung be trồ mìu nhàc, be mìu kơnhai phàng tơnsùh ù tiah.”

⁴Yàng Jehôwa đơs: Ñchi Añ kòñ lơh mơ mê, ơ Epraim? Ñchi Añ kòñ lơh mê in, ơ Juda? Bơta kòñ gơboh bol mê dê Añ in la kung be dà tŭ àng drim, tòm toh kung be dà mơryuh roh thit tòm tŭ rìng àng.

⁵Behơ̆ tàng Añ neh ngui ală cau gơnoar hwơr Añ jê kơl bol mê, Añ neh tơnchơt bol mê bơh jơnau đơs bơr Añ jê; ală bơta cahrña Añ jê rơp lik be bơta àng;

⁶Bơh Añ kòñ bơta kòñ gơboh kơ̆ dơn, ò kòñ phan ơn pơdơng, mơ bơta đal git Yàng Tom Trồ la niam rlau mơ phan ơn chu pơrguc.

⁷Mơya be Adam, bol khai tìs glài ò lơh jat bơta ho bal; bol khai ò dòn song mơ Añ.

⁸Galaat la ƀòn dờng ală cau lơh bơta iơh bơsak dê, bềng ală tềl mhàm.

⁹Be ală cau ntung kơñau kơp mòc cau lòt gan, ală cau gơnoar ơn phan duh khoai kung dô bơnòr bal behơ̆, bol khai tơnchơt cau tòm gùng lòt hơ Sicem, bol khai gơtơmut tòm tồi glài iơh bơsak gơlềng gơlàng ơlă ơlai.

¹⁰Tòm hìu Israel Añ neh sền gŏ dô bơta cù kìr; mơ Epraim lơh bơta dri tơlàr tềng hơ̆, Israel gơlik ƀơ̆ ƀơl.

¹¹Ơ Juda, bơh mê kung behơ̆ sơl, dô kơnhai toès neh lơh nền rau. Tòm tŭ Añ rơp bơtào wơl sre brê làng bol Añ jê.