Read koho Ôse 7 Bible Online

Ôse 7 - koho bible

Ôse 7

¹Tŭ lơi Añ kòñ sơmbòi Israel, gen ală bơta tồi glài Epraim dê mơ ală broă lơh iơh bơsak Samari dê gơkòl ràng tơlik. Bơh bol khai lơh bơta ma blac, ală cau ntung kơñau mut tòm dơlam, ală cau phà kơñau tòmpìt đah bơdìh.

²Mơya bol khai ò git sền sơwì lah Añ kah jơh ală broă lơh iơh bơsak bol khai dê. Broă lơh bol khai dê gơrwàng bol khai; bol gơ ơm sùm di đap Añ.

³Bol khai lơh cau bơtau in chò hòp bơh ală bơta iơh bơsak bol khai dê, lơh niam nùs ală kwang dờng bơh bơta pơrlơ̆ dră bol khai dê.

⁴Jơh tơl nă bol khai la cau rềs àr bơrnàn, bol khai kung be dô nơm bơnhă ồs duh hơng, cau buh ƀañ ò càng tơrjik rơnga ồs, bơh di tŭ bơcă kơmbuh jơl tus di tŭ kơmbuh gơprồ.

⁵Tòm ngai hòn chò bơtau bol he dê, ală cau kwang gơlik kòp jê tài bơh bơta duh tơrnòm dê, bơtau at tê bal mơ ală cau dơñŏ tơnhial.

⁶Bơh bol khai be bơnhă ồs duh hơng, nùs bol khai chu pơrguc tòm bol khai. Jơh mang bơta gơjrañ bol khai dê duh hơng; tus diàng drim gen gơ sa hơng sùm.

⁷Jơh tơl nă bol khai duh be dô nơm bơnhă ồs, mơ bol khai sa loan ală kwang at bồ bol khai dê. Jơh ală cau bơtau bol khai dê kòl gơplơ̆ gơpừ, mơ ò gơs dô nă lơi tòm bol khai hòi dan mơ Añ.

⁸Epraim tòmpơrlŭ bal mơ ală làng bol; Epraim be ƀañ buh mơ òhềt pơrlac.

⁹Ală làng bol lơgar bơdìh neh sa loan bơta pràn khai dê, mơya khai ò git bơta hơ̆. Sŏ khai rơp sơntòm kò, mơ khai ò git.

¹⁰Bơta pơnhừ să Israel dê lơh cơng tòmdră mơ khai, bulah behơ̆ khai ò rê wơl hơ Jehôwa la Yàng Tom Trồ khai dê, hala jòi jat Kơnràñ.

¹¹Epraim gơlik be dô nơm sềm ntòp, bơrngơl, mơ siơ̆u dơngoh jak; bol khai hòi Ejiptơ dong kòl, bol khai lòt tus hơ Asiri.

¹²Tòm tŭ bol khai lòt, Añ rơp sơrbì bơtơng Añ jê hơđang bol khai; Añ rơp tơmù bol khai kung be ală sềm bơh hơđang pah gòi; Añ rơp lơh glài tơmàl bol khai jat be bơta yal tơnggit bơh mpồl jơnum bol khai dê.

¹³Bòl glar bol khai in, tài bơh bol khai neh lòt tìs nrah ngài bơh Añ. Bơta gơprah gơpring dùh hơđang bol khai, tài bơh bol khai neh tòmdră mơ Añ. Añ kòñ dong tơwài bol khai, mơya bol khai đơs ală jơnau blac chừt tòmdră mơ Añ.

¹⁴Bol khai ò hòi dan mơ Añ bơh nùs bol khai dê, mơya bol khai pơt wòl hơđang cơnòng bic bol khai dê. Bol khai còr să tòm bol khai nàng dan kòi mi mơ tơrnòm, bol khai pơrlơ̆ dră di Añ.

¹⁵Añ neh bơto bol khai git lơh broă mơ neh bơtơl pràn tơwòr tê bol khai in, mơya bol khai bơtào kai gơrmơ̆i iơh bơsak tòmdră wơl mơ Añ.

¹⁶Bol khai wèt hơ ală bơta ò gơs kwơ; bol khai kung be dô nơm àtak ò gam niam. Ală cau kwang at bồ bol khai dê rơp gơpừ bơh đào, tài bơh ală jơnau gơjrañ mañ bơh lơmpiat bol khai dê. Bol khai gơlik gơs bơta dơñŏ tơnhial tòm ù tiah Ejiptơ.