Read koho Amôs 3 Bible Online

Amôs 3 - koho bible

Amôs 3

¹Ơ làng bol Israel, iat tĕ jơnau do, hơ̆ la jơnau Yàng Jehôwa neh đơs tòmdră mơ bol mê, tòmdră mơ jơh dô nơm hìu nhă mơ Añ neh cèng tơlik bơh lơgar Ejiptơ:

²“Añ mìng git bol mê lơm bơh di jơh ală hìu nhă hơđang plai ù; behơ̆ tàng Añ rơp lơh glài bol mê bơh jơh ală bơta tồi glài bol mê dê.”

³Dilah bàr nă cau lòt bal, mìng tòm tŭ bol khai ò dô nùs bal ngan sơl?

⁴Dô nơm klìu triă ơluh tòm brê tòm tŭ gơ ò kup geh phan sa sơl? Dô nơm klìu triă brồ dam ơhùm tòm trồm lŭ gơ dê dilah gơ ò geh kup phan lơi sơl?

⁵Dô nơm sềm yar dă hơđang ù, tòm tŭ ò gơs cau pơt dă gơ sơl ơ? Dô nơm dă gơ tơrglơs bơh di ù, tòm tŭ gơ ò geh kup phan lơi sơl?

⁶Dô nơm kơlwòk uh tòm ƀòn dờng, gen làng bol ò rngòt ơ? Tòm tŭ bơta rung rài gơdùh tòm dô nơm ƀòn dờng, mìng la Yàng Jehôwa neh lơh gơlik gơs ò ơ?

⁷Ngan Jehôwa Yàng Tom Trồ ò lơh dô bơta lơi mơ ò yal tơlik bơta ndơp ndơr Kơnràñ dê mơ ală cau duh broă Kơnràñ in la ală cau gơnoar hwơr.

⁸Tòm tŭ klìu triă ơluh ơhùm gen ñcau rơp ò rngòt taih? Tòm tŭ Jehôwa Yàng Tom Trồ neh đơs gen ñcau rgơi ò đơs hwơr taih?

⁹Yal tơnggit tĕ tòm ală theng kơ̆ cê Asdot dê, mơ tòm ală theng kơ̆ cê Ejiptơ dê, mơ đơs lah: “Bol mê pơjum bal tĕ hơđang mơnơm Samari; mơ sền tĕ bơta sơlồng sơlàng dờng tềng hơ̆, mơ bơta rồn bơklơn digùl làng bol khai dê.”

¹⁰Yàng Jehôwa đơs lah: “Bol khai ò git mbe lơh bơta song ring, bol khai pơjum tơrgòm ală bơta jàñ bơsak mơ phan ntung kơñau tòm ală theng kơ̆ cê bol khai dê.”

¹¹Gen tàng Jehôwa Yàng Tom Trồ đơs be do: “Dô nă cau sò tơm rơp gơrwàng gùt dar lơgar do; khai rơp tơnroh bơta cang kìng bol mê dê mơ tòmpìt kơñau ală theng kơ̆ cê bol mê dê.”

¹²Yàng Jehôwa đơs be do: “Be cau ê belàt mìng tă bàr đah nơm jơng hala dô nơm tồr bơh di bơr klìu triă, behơ̆ ală làng bol Israel la ală cau ơm tòm Samari rơp geh dong tă di mum cơnòng jòng hala di gah cơnòng bic bol khai dê.

¹³Yàng Jehôwa, la Yàng Tom Trồ Gơnap Gơnoar Dờng Làm Jơh đơs lah: Iat tĕ ală jơnau do mơ lơh cơng tòmdră mơ hìu Jakôp.

¹⁴Tòm ngai Añ lơh glài Israel bơh ală tồi glài khai dê, Añ rơp lơh glài ală cơnòng duh khoai Betel dê; ală ngke cơnòng duh khoai dê rơp gơkòl koh mơ tơndùh tòm ù.

¹⁵Añ rơp lơh tơrlah hìu kơnhai noat bal mơ hìu kơnhai prang; ală hìu bơka mơ bla rwas rơp roh rui, mơ ală hìu dờng rơp kong tơnroh tơnlồi.” Yàng Jehôwa đơs behơ̆.