Read koho Amôs 8 Bible Online

Amôs 8 - koho bible

Amôs 8

¹Do la bơta mơ Jehôwa Yàng Tom Trồ neh sơnio añ in sền gŏ: dô nơm bài ơn plai chi kơnhai prang duh.

²Kơnràñ lùp lah: “Ơ Amôs, ñchi mê gŏ taih?” Añ ho lah: “Dô nơm bài ơn plai chi kơnhai prang duh dê.” Gen Yàng Jehôwa đơs tai mơ añ lah: “Bơta lồi dut neh tus hơđang làng bol Israel Añ jê; Añ rơp ò lòi rlau bol khai in tai.

³Tòm ngai hơ̆, ală jơnau đơs chò tòm hìu duh khoai rơp gơlik gơs ală jơnau ñìm rac,” Jehôwa Yàng Tom Trồ đơs behơ̆. “Rơp gơs oă ngan ƀồc chơt, sang làm bă tiah. Pal ơm mŏ!”

⁴Iat tĕ do: Bol mê la cau jă trơm hơđang ală cau siơ̆u siar, mơ tơnroh ală cau rƀah dồn sa tòm lơgar,

⁵mơ bol mê đơs lah: “Tŭ lơi kơnhai dùl lik rơp rlau, gen sồng bol hi rgơi tac kòi dơngòi; mơ ngai Saƀat rơp rlau, gen sồng bol hi rgơi ơn kòi mi nàng tac ơ? Bol he rơp lơh epha dềt mơ sieklơ dờng, mơ ngui phan kơr ma blac nàng sa kơrlơm,

⁶blơi cau rƀah mơ priă, mơ ai dô yô gơltau jă blơi cau siơ̆u siar, mơ tac kòi mi nsiap.”

⁷Yàng Jehôwa srat să bơh bơta pơnhừ să Jakôp dê lah: “Ngan Añ rơp ò tŭ lơi hŭi dô êt lơi ală bơta bol khai neh lơh.

⁸Lơgar rơp ò rơm să bơh bơta hơ̆ ơ? Mơ jơh ală làng bol ơm tòm hơ̆ rơp ò ñìm rac ơ? Jơh lơgar rơp guh kung be hiòng Nil; mơ rơp yò tơngguh gen gơkram wơl kung be hiòng Nil tòm Ejiptơ dê ơ?”

⁹Tòm ngai hơ̆ Jehôwa Yàng Tom Trồ đơs lah: “Añ rơp lơh mattơngai ñơp tòm tŭ nggùl ngai, mơ lơh plai ù in klam jơngo tòm tŭ trồ ngai.

¹⁰Añ rơp pơrlac bơta pơjum sa bol mê dê gơlik gơs bơta pơt wòl, mơ jơh ală bơta đơs chò bol mê dê gơlik gơs bơta ñìm rac. Añ rơp cèng bài sơnò kiat tơntròñ jơh tơl nă bol mê in, mơ koah bồ bol mê dê. Añ rơp lơh gơ in gơlik gơs kung be bơta ñìm ƀồc bơh roh kòn klau dô nă, mơ bơta lồi dut gơ dê kung be dô ngai sràt bơtang.”

¹¹Jehôwa Yàng Tom Trồ đơs lah: “Ngan tŭ tơngai rơp tus, tòm tŭ Añ sồr bơta jơgloh rung tus tòm lơgar; ò di la jơgloh piang lă, kung ò di la tơhìr bơh dà hùc, mơya la bơh bơta kơno iat ală jơnau Yàng Jehôwa dê.

¹²Bol khai rơp lòt bơh dàlềng do tus hơ dàlềng ne, mơ lòt bơh đah đang tus hơ đah mattơngai lik, bol khai ntoat mơ yơng jòi jat jơnau Yàng Jehôwa dê, mơya bol khai rơp ò bàn.

¹³Tòm ngai hơ̆, ală cau ơruh hàng mơnĕ mơ ală cau pơnu pràn kơldang rơp siar roh tài bơh tơhìr.

¹⁴Bol khai la ală cau srat să bơh Asima cau Samari dê, mơ đơs lah: ‘Ơ Dan, di ngan be yàng bol mê dê kis,’ mơ: ‘Di ngan kung be gùng dà Beerseba dê kis’ jơh ală bol khai rơp gơpừ, ò gơs tŭ lơi guh tai.”