Read koho Jôna 1 Bible Online

Jôna 1 - koho bible

Jôna 1

¹Gơs jơnau Yàng Jehôwa đơs mơ Jôna kòn klau Amitai lah:

²“Lòt tĕ mo tus hơ ƀòn dờng Ninibe mơ bơto tòmdră mơ gơ, bơh bơta iơh bơsak gơ dê neh guh tus di đap Añ.”

³Mơya Jôna dô hơ Tarsi nàng pleh bơh di Yàng Jehôwa. Khai mù tus hơ Jôppa, tềng hơ̆ khai tìp dô nơm ơhò lòt hơ rnơs hơ̆. Tơnơ̆ mơ tŭ neh tơm jền hào ơpah, khai hào ơhò lòt tus hơ Tarsi nàng dô pleh bơh di Yàng Jehôwa.

⁴Gen Yàng Jehôwa sồr càl dờng khồm hơđang dàlềng, mơ dô ròt càl rbut dờng hơ̆ lơh ơhò in mòr bơcah.

⁵Jơh ală cau lơh broă tòm ơhò rngòt rngơt ngan mơ kòp nă hòi dan mơ yàng he dê. Gen bol khai sơrbì ală phan bơh ơhò tòm dàlềng nàng nggòc ơhò. Tŭ hơ̆ Jôna neh mù tòm dơlam ơhò, bic mơ lơhă mo.

⁶Cau at bồ ơhò tus hơ khai mơ đơs lah: “Mbe mê rgơi bic behơ̆ taih? Guh tĕ mơ hòi dan mơ yàng mê dê! Digơlan yàng rơp ai nùs kah kơlôi bơh bol he, nàng bol he ò chơt roh.”

⁷Gen ală cau lơh broă tòm ơhò đơs bal mơ gơp lah: “Tus tĕ, bol he tă khà lă nàng git ñcau neh cèng tus bơta rung rài do.” Bol khai tă khà, mơ khà tă di dê Jôna.

⁸Gen bol hơ̆ đơs mơ Jôna lah: “Yal tĕ bol he in git ñchi bơh tài bơta rung rài do neh tus hơđang bol he taih? Ñchi broă mê lơh, mơ mbơh mê tus taih? Ñchi sơnđan lơgar tòm mê dê, mơ mê gơrê bal mơ làng bol lơi taih?”

⁹Khai ho lah: “Añ la dô nă cau Hebrơ, mơ añ duh khoai Yàng Jehôwa la Yàng Tom Trồ hơđang trồ, la Bơtau neh lơh gơs dàlềng mơ ù tiah.”

¹⁰Gen ală cau hơ̆ rngòt rngơt ngan, mơ bol khai lùp lah: “Ñchi mê neh lơh taih?” Bol khai neh git lah khai neh dô pleh bơh di Yàng Jehôwa; tài bơh khai neh yal bol khai in git behơ̆.

¹¹Behơ̆ gen bol khai đơs mơ khai lah: “Ñchi bol hi pal lơh di mê tồ dàlềng gơ ơm ring ngềt bol hi in taih?” Bơh dàlềng sơlo ơm sơlo gơlơnggac pràn rlau tai.

¹²Khai ho wơl lah: “Kup tĕ añ mơ sơrbì tòm dàlềng gen gơ rơp ơm ring ngềt. Añ git la tài bơh añ gen tàng càl rbut dờng do neh tus hơđang ală bi.”

¹³Gơsơlơ̆u wơl, ală cau hơ̆ pơnđơl jơh pràn wàs ơhò tus di gah dàlềng. Mơya bol khai ò rgơi tài bơh dàlềng sơlo ngai sơlo gơguh ryà dà dờng rlau tai tòmdră mơ bol khai.

¹⁴Gen bol khai hòi dan mơ Yàng Jehôwa lah: “Khoai Yàng Jehôwa, bol hi hòi dan bañ lòi bol hi chơt tài bơh tơnchơt cau do. Dan bañ lơh glài bol hi tài bơh tơnchơt dô nă cau ò gơs glài, bơh gơwèt mơ Kơnràñ, Ơ Yàng Jehôwa, Kơnràñ neh lơh bơta jat nùs Kơnràñ kòñ.”

¹⁵Lồc behơ̆, bol khai kup Jôna mơ sơrbì khai tòm dàlềng, gen dàlềng dơh wơl bơta gơhào gơjrañ gơ dê.

¹⁶Gen ală cau hơ̆ sơlo rngòt rlau tai di Yàng Jehôwa; gen bol khai ơn phan duh khoai Yàng Jehôwa in mơ ho pơgon mơ Kơnràñ.