Read koho Khà Làng Bol 16 Bible Online

Khà Làng Bol 16 - koho bible

Khà Làng Bol 16

¹Kôra kòn klau Ishar, sau Kôhat, se Lebi, mơ ală cau Ruben la Dathan mơ Abiram la ală kòn klau Eliap, mơ Ôn kòn klau Phelet, sau Ruben,

²bơtào tòmdră mơ Môise. Gơs bàr rhiang pram jơt nă cau jat bol khai, hơ̆ la ală cau at bồ tiơng pơnro mpồl jơnum làng bol dê, la cau neh geh pồ bơtào tòm mpồl cau kwang at bồ.

³Bol khai pơjum bal gơs dô mpồl tòmdră mơ Môise mơ Arôn mơ đơs mơ bol khai lah: “Ală ồng neh lòt sơrlèt ngài rlau ir mơ gơnoar at bồ ală ồng dê! Kòp nă cau tòm mpồl jơnum làng bol dê la sàng goh, mơ Yàng Jehôwa ơm bal mơ bol khai. Gen ñchi bơh tài ală ồng bơtào is să tòm hơđang mpồl jơnum Yàng Jehôwa dê taih?”

⁴Tòm tŭ Môise neh kơno ală jơnau hơ̆, khai tơmbic să blup mat di ù.

⁵Gen khai đơs mơ Kôra mơ jơh ală cau jat khai lah: “Àng drim hìng gen Yàng Jehôwa rơp ràng tơlik ñcau la cau gơrê bal mơ Kơnràñ mơ ñcau la sàng goh, mơ Kơnràñ rơp lơh cau hơ̆ tus rềp mơ Kơnràñ. Cau mơ Yàng Jehôwa sac rwah gen Kơnràñ rơp lơh cau hơ̆ in tus rềp mơ Kơnràñ.

⁶Mê, Kôra, mơ jơh ală cau lòt jat mê rơp lơh jat bơta do: Ai tĕ ală gri ơn kơlhô

⁷mơ ngai hìng ơn ồs mơ kơlhô tòm gri di đap Yàng Jehôwa. Cau mơ Yàng Jehôwa sac rwah rơp la cau sàng goh. Bol mê, cau Lebi neh lòt sơrlèt ngài rlau ir!”

⁸Môise kung đơs mơ Kôra lah: “Tŭ do, ơ bol mê la ală cau Lebi, iat tĕ!

⁹Bơta Yàng Tom Trồ neh cah is bol mê bơh di jơh ală cau tòm mpồl jơnum Israel mơ cèng bol mê tus rềp hơ să tòm Kơnràñ nàng lơh ală broă tòm Hìu Duh Khoai Yàng Jehôwa dê mơ ntào di đap mpồl làng bol mơ duh broă bol khai, bơta hơ̆ la ò tơl bol mê in ò ơ?

¹⁰Kơnràñ neh cèng bol mê mơ jơh ală oh mi cau Lebi bol mê dê tus rềp hơ să tòm Kơnràñ, mơya tŭ do bol mê kung kòñ geh gơnoar gơs cau ơn phan duh khoai tai sơl?

¹¹Bơta bol mê mơ jơh ală cau lòt jat bol mê lơh gơs dô bă bal la tòmdră mơ Yàng Jehôwa. Arôn la ñcau mơ bol mê yoam pơrhiat tòmdră mơ khai taih?”

¹²Gen Môise hòi Dathan mơ Abiram, ală kòn klau Eliap tus. Mơya bol khai đơs lah: “Bol hi ò tus ò!

¹³Mê neh tă cèng bol hi lik bơh di lơgar bềng lìu dà toh mơ dà lơwe nàng tơnchơt bol hi tòm ƀlàng bràs ò di la ò tơl rau sơl ơ? Mơ tŭ do mê kung kòñ lơh gơs bơtau, lơh yàng at bồ bol hi sơl ơ?

¹⁴Rlau mơ hơ̆, mê ò gŏ cèng bol hi tus hơ dô nơm lơgar bềng lìu dà toh mơ dà lơwe hala ai bol hi in ală ƀlàng sre mơ ală suơn ño lơh gơs sre brê. Mê rơp kơlwĕ gar mat ală cau do sơl ơ? Ò, bol hi rơp ò lòt tus ò.”

¹⁵Gen Môise gơhào gơjrañ ngan mơ đơs mơ Yàng Jehôwa lah: “Dan Yàng bañ dòp phan ơn duh khoai bol khai dê. Añ ò dòp phan lơi bơh di bol khai, bulah dô nơm alàng kung ò sơl, añ kung ò lơh iơh di dô nă cau lơi tòm bol khai.”

¹⁶Môise đơs mơ Kôra lah: “Ngai hìng, mê mơ jơh ală cau jat mê pal lòt tus di đap Yàng Jehôwa; mê, bol khai mơ Arôn.

¹⁷Kòp nă pal at gri ơn kơlhô khai dê mơ ơn kơlhô tòm hơ̆, jơh ală la bàr rhiang pram jơt nơm gri ơn kơlhô, mơ ơn gơ di đap Yàng Jehôwa. Mê mơ Arôn kung pal ơn gri kơlhô bol mê dê sơl.”

¹⁸Behơ̆ kòp nă bol khai ai gri ơn kơlhô khai dê, ơn ồs mơ kơlhô tòm hơ̆, mơ ntào bal mơ Môise mơ Arôn di mpồng mut Sàl Tòm Mat dê.

¹⁹Tòm tŭ Kôra neh pơjum jơh ală cau jat khai tòmdră mơ Môise mơ Arôn di mpồng mut Sàl Tòm Mat dê, bơta gơklŏ Yàng Jehôwa dê tơlik să di đap jơh mpồl jơnum.

²⁰Yàng Jehôwa đơs mơ Môise mơ Arôn lah:

²¹“Cah is tĕ să tòm bol mê bơh di mpồl jơnum do tồ Añ rgơi tơnroh bol khai mo tŭ do.”

²²Mơya Môise mơ Arôn tơmbic să blup mat di ù mơ rac dan lah: “Ơ Yàng Tom Trồ la Yàng Tom Trồ ală hwềng jơh kòn mơnus dê, Kơnràñ rơp gơhào gơjrañ mơ jơh mpồl jơnum tòm tŭ gơs mìng dô nă tìs glài sơl ơ?”

²³Gen Yàng Jehôwa đơs mơ Môise lah:

²⁴“Đơs tĕ mơ mpồl jơnum lah: ‘Lik tĕ ngài bơh di ală sàl ơm Kôra, Dathan mơ Abiram dê.’”

²⁵Môise ñă ntào mơ lòt tus hơ Dathan mơ Abiram mơ ală cau kwang kra Israel dê lòt jat khai.

²⁶Khai bơto pơrhơng mpồl jơnum mơ đơs lah: “Ruc tĕ ngài bơh di ală sàl ơm ală cau iơh bơsak do! Bañ ƀư phan lơi gơrê bal mơ bol khai, rngòt bol mê rơp kong tơnroh tài bơh tồi glài bol khai dê.”

²⁷Behơ̆ bol khai lik ngài bơh di ală sàl ơm Kôra, Dathan mơ Abiram dê. Dathan mơ Abiram neh lik mơ ntào bal mơ ală bau ùr, ală kòn sau mơ kòn dềt bol khai dê di tiah mpồng mut ală sàl ơm bol khai dê.

²⁸Gen Môise đơs lah: “Do la gùng mơ kơnòm tềng hơ̆ bol mê rơp git la Yàng Jehôwa neh sồr añ nàng lơh jơh ală bơta do mơ ò di la bơh bơta kơlôi sơnơng is añ jê:

²⁹Dilah ală cau do chơt jat be òs cau dê mơ mìng git làm bơta òs gơlik gơs kòn mơnus in, gen Yàng Jehôwa ò sồr añ.

³⁰Mơya dilah Yàng Jehôwa lơh gơlik gơs bơta lơi pa wil tơl, mơ ù tiah pò bơr gơ dê mơ sa loan bol khai bal mơ jơh ală phan gơrê bal mơ bol khai, mơ bol khai gam kis mơ mù tòm bơtô ƀồc, gen bol mê rơp git lah ală cau do neh sền òsơp di Yàng Jehôwa.”

³¹Tòm tŭ Môise pa đơs sir jơh ală jơnau hơ̆, ù tiah hơđơm bol khai gơcah is

³²mơ ù ha bơr gơ mơ sa loan bol khai, bal mơ ală cau tòm hìu nhă bol khai dê mơ jơh ală cau jat Kôra bal mơ jơh ală phan mơna khai dê.

³³Bol khai gam kis mơ mù tòm bơtô ƀồc, bal mơ jơh ală phan bol khai gơs; ù tiah gơbồr wơl hơđang bol khai, bol khai roh rui mơ roh thit bơh di mpồl jơnum.

³⁴Kơno jơnau bol khai driau dờng, jơh ală cau Israel ơm gùt dar bol khai ntoat dô, đơs dờng lah: “Ù tiah kung rơp sa loan bol hi sơl!”

³⁵Mơ ồs gơlik bơh di Yàng Jehôwa sa roh bàr rhiang pram jơt nă cau klau neh ơn kơlhô.

³⁶Gen Yàng Jehôwa đơs mơ Môise lah:

³⁷“Sồr tĕ Eleajar kòn klau Arôn, cau gơnoar ơn phan duh khoai, tă cèng ală gri ơn kơlhô bơh di ală phan gam ồs sa mơ rsìh rnga ồs di tiah ngài, bơh ală gri ơn kơlhô la goh,

³⁸ală gri ơn kơlhô ală cau neh tìs glài mơ roh bơta kis bol khai dê. Klơn ală gri ơn kơlhô lơh gơs ală pang lơho nàng ƀềp cơnòng ơn phan duh khoai, bơh gơ neh geh ơn Yàng Jehôwa in mơ neh gơlik gơs goh. Lòi tĕ gơlơh gơs dô nơm tềl cau Israel in.”

³⁹Behơ̆ Eleajar cau gơnoar ơn phan duh khoai dòñ tơrgòm bal ală gri mơ kòng cau ơn kơlhô neh ồs sa, mơ khai sồr cau klơn lơho nàng ƀềp cơnòng ơn phan duh khoai,

⁴⁰tòm toh jat be Yàng Jehôwa neh kơnòm di Môise mơ sồr khai. Bơta hơ̆ tơngkah cau Israel in lah ò gơs cau lơi rlau mơ kòn sau Arôn rgơi tus mơ chu kơlhô di đap Yàng Jehôwa, rngòt khai rơp gơlik gơs kung be Kôra mơ ală cau jat khai.

⁴¹Ngai hìng jơh dô mpồl jơnum yoam joh tòmdră mơ Môise mơ Arôn, đơs lah: “Ală ồng neh tơnchơt làng bol Yàng Jehôwa dê.”

⁴²Mơya tòm tŭ mpồl jơnum pơjum bal tòmdră mơ Môise mơ Arôn mơ wèt mat sền hơ đah Sàl Tòm Mat, nisơna gơs mhwal jơm gòm gơ mơ bơta gơklŏ Yàng Jehôwa dê gơlik gơs.

⁴³Gen Môise mơ Arôn lòt tus di đap Sàl Tòm Mat,

⁴⁴mơ Yàng Jehôwa đơs mơ Môise lah:

⁴⁵“Lik tĕ ngài bơh di mpồl jơnum do nàng Añ rơp tơnroh bol khai mo tŭ do.” Mơ bol khai tơmbic să blup mat tòm ù.

⁴⁶Gen Môise đơs mơ Arôn lah: “Ai tĕ gri ơn kơlhô bi dê mơ ơn kơlhô tòm hơ̆ bal mơ ồs bơh di cơnòng ơn phan duh khoai, mơ mhar mhar tus hơ mpồl jơnum nàng lơh bơta tơwài glài bol khai in. Bơta gơjrañ dờng neh gơlik tus bơh di Yàng Jehôwa; bơta pluh plàng neh gơ rơp sơntòm rau.”

⁴⁷Behơ̆ Arôn lơh jat be Môise neh đơs, mơ ntoat tus digùl mpồl jơnum. Bơta kòp jê pluh plàng neh rơp sơntòm digùl làng bol, mơya Arôn ơn kơlhô mơ lơh gơs bơta tơwài glài bol khai in.

⁴⁸Khai ntào digùl cau kis mơ cau chơt, mơ bơta pluh plàng ơm dơh wơl.

⁴⁹Mơya neh gơs jơt poan rbô poh rhiang nă cau chơt bơh bơta pluh plàng hơ̆, ò kòp khà ală cau neh chơt tài bơh Kôra.

⁵⁰Gen Arôn rê wơl hơ Môise di tiah mpồng mut Sàl Tòm Mat, bơh bơta pluh plàng neh dơh wơl.