Read koho Khà Làng Bol 17 Bible Online

Khà Làng Bol 17 - koho bible

Khà Làng Bol 17

¹Yàng Jehôwa đơs mơ Arôn lah:

²“Đơs tĕ mơ cau Israel mơ sồr bol khai cèng tus jơt bàr nơm gai jra, kòp nă cau at bồ jơi bơtiàn cèng dô nơm. Cih tĕ sơnđan kòp nă cau hơđang gai jra khai dê.

³Hơđang gai jra Lebi dê gen cih sơnđan Arôn, bơh pal gơs dô nơm gai jra kòp nă cau in at bồ jơi bơtiàn dê.

⁴Ơn tĕ ală gai jra hơ̆ tòm Sàl Tòm Mat, di đap Đài Bơta Ho Bal la tiah Añ tòm mat mơ mê.

⁵Gai jra gơrê bal mơ cau Añ sac rwah rơp cat sơmbut, mơ Añ rơp tă sang jơnau yoam joh sùm sùm do tòmdră mơ mê bơh di cau Israel.”

⁶Behơ̆ Môise đơs mơ cau Israel, mơ ală cau at bồ bol khai dê ai Môise in jơt bàr nơm gai jra, kòp nă cau at bồ jơi bơtiàn bol khai dê dô nơm gai jra, mơ gai Arôn dê ơn digùl ală gai hơ̆.

⁷Môise ơn ală gai hơ̆ di đap Yàng Jehôwa tòm Sàl Bơta Cơng Tàng dê.

⁸Àng drim ngai hìng, Môise mut tòm Sàl Bơta Cơng Tàng mơ gŏ gai jra Arôn dê, la gai lơh ala mat hìu nhă Lebi dê, ò di mìng gơcat sơmbut mơya gơlì bơkào mơ gơlik ală plai gus dum.

⁹Môise cèng tơlik jơh ală gai bơh di đap Yàng Jehôwa ai jơh ală cau Israel in sền gŏ, bol khai sền gŏ ală gai hơ̆, mơ kòp nă cau ai wơl gai he dê.

¹⁰Yàng Jehôwa đơs mơ Môise lah: “Ơn tĕ wơl gai jra Arôn dê di đap Đài Bơta Ho Bal, nàng prap gàr lơh gơs dô nơm tềl ală cau jak tòmdră in. Bơta hơ̆ rơp pơndut tơnlồi bơta yoam joh bol khai dê tòmdră mơ Añ, nàng bol khai klàs chơt.”

¹¹Môise lơh jat tòm toh be jơnau Yàng Jehôwa neh sồr khai.

¹²Cau Israel đơs mơ khai lah: “Bol hi roh rui, bol hi roh rui jơh!

¹³Cau lơi tus rềp di Hìu Ing Duh Khoai Yàng Jehôwa dê kung rơp chơt. Mơ jơh tơl nă bol hi rơp roh rui ơ?”