Read koho Khà Làng Bol 18 Bible Online

Khà Làng Bol 18 - koho bible

Khà Làng Bol 18

¹Yàng Jehôwa đơs mơ Arôn lah: “Mê, ală kòn klau mê dê mơ hìu nhă bèp mê gơs broă tòmbơh ală bơta tìs glài gơwèt mơ Tiah Sàng Goh, mơya mìng mê mơ ală kòn klau mê dê lơm pal kong broă tòmbơh ală bơta tìs glài gơwèt mơ gơnoar broă ơn phan duh khoai.

²Cèng tĕ ală oh mi cau Lebi bol mê dê bơh di jơi bơtiàn bol mê dê tus lơh gơs dô bă bal mơ bol mê mơ dong kòl bol mê tòm tŭ mê mơ ală kòn klau mê dê duh broă di đap Sàl Bơta Cơng Tàng.

³Bol khai rơp gơs broă tòm gơwèt mơ mê mơ pal lơh jơh ală broă tòm Sàl Ing, mơya bol khai ò di tus rềp di ală phan ngui tòm Tiah Sàng Goh hala cơnòng ơn phan duh khoai, rngòt bol khai mơ mê pal kong chơt.

⁴Bol khai pal lơh gơs dô bă bal mơ mê nàng lơh broă tòm tòm Sàl Tòm Mat, jơh ală broă tòm Sàl Ing, mơ ò gơs cau lơi rgơi tus rềp di tiah mê dê.

⁵Mê gơs broă tòm rcang gàr Tiah Sàng Goh mơ cơnòng ơn phan duh khoai tồ bơta gơjrañ dờng ò dùh hơđang cau Israel.

⁶Să tòm Añ neh sac rwah ală oh mi cau Lebi mê dê bơh digùl cau Israel lơh gơs kung be dô nơm phan ai gòi mê in, ơn is sàng goh Yàng Jehôwa in nàng lơh broă tòm Sàl Tòm Mat.

⁷Mơya mìng mê mơ ală kòn klau mê pal ngac ngar lơh broă cau gơnoar ơn phan duh khoai dê tòm jơh ală broă gơrê bal mơ cơnòng ơn phan duh khoai mơ pơnah đah ngkòi bài kơrnìng. Añ ai mê in broă lơh cau gơnoar ơn phan duh khoai dê be dô nơm phan pà. Cau lơi ndai tus rềp di tiah sàng goh pal kong tơnchơt.”

⁸Gen Yàng Jehôwa đơs mơ Arôn lah: “Do, Añ neh jào mê in rcang gàr ală phan ơn duh khoai ơn Añ in; jơh ală phan ơn duh khoai sàng goh mơ cau Israel ơn Añ in gen Añ ai mê in mơ ală kòn klau mê in lơh gơs pơnah tòmpà gơrê bal mơ mê gam sùm sùm.

⁹Mê rơp gơs pơnah tòm ală phan ơn duh khoai sàng goh rlau jơh ò chu pơrguc hơđang cơnòng duh khoai. Bơh di jơh ală phan ơn bol khai cèng Añ in lơh gơs phan ơn sàng goh rlau jơh, bulah phan ơn la kòi mbo hala ală phan ơn tơwài glài hala phan ơn đal git tồi glài, pơnah hơ̆ gơrê bal mơ mê mơ ală kòn klau mê dê.

¹⁰Mê sa tĕ kung be phan sàng goh rlau jơh, kòp nă cau klau rơp sa gơ; gơ rơp gơlik sàng goh mê in.

¹¹Do kung la pơnah gơrê bal mơ mê: hơ̆ la phan lơi ơn is bơh di ală phan ơn tơyài cau Israel dê. Añ ai phan hơ̆ mê in mơ ai ală kòn klau kòn ùr mê in lơh gơs pơnah òs ai. Kòp nă tòm hìu nhă mê dê geh goh gen rgơi sa phan hơ̆.

¹²Añ ai mê in jơh mơñà ôlibe niam rlau jơh mơ jơh tơrnòm niam rlau jơh mơ kòi mbo bol khai ơn Yàng Jehôwa in, lơh gơs phan ơn bồ sơnam.

¹³Jơh ală plai bồ sơnam lơgar dê mơ bol khai cèng Yàng Jehôwa in gen gơrê bal mơ mê. Kòp nă cau tòm hìu nhă mê dê geh goh jat bơta sồr lam duh khoai gen rgơi sa gơ.

¹⁴Jơh ală phan tòm Israel neh ơn is sàng goh Yàng Jehôwa in gen gơrê bal mơ mê.

¹⁵Kòn tơnhoa bol mê dê, bulah la kòn mơnus hala phan poan jơng dê, la phan neh ơn Yàng Jehôwa in gen gơrê bal mơ bol mê. Mơya mê pal tơwài wơl kòp nă kòn klau tơnhoa mơ kòp nơm phan poan jơng dam ò goh deh sơnròp.

¹⁶Tòm tŭ gơ neh geh tơl dô nam, mê pal tơwài gơ wơl jat khà priă lơh nền la pram sieklơ, jat sieklơ tiah sàng goh dê, kơr geh bàr jơt gera.

¹⁷Mơya mê bañ tơwài wơl kơnrồ kòn deh sơnròp, belàt hala be, bol gơ la phan goh. Rsìh tĕ mhàm gơ hơđang cơnòng ơn phan duh khoai mơ chu dơngi bol gơlơh gơs dô nơm phan ơn duh khoai chu pơrguc, gơs ƀô bơlhu niam nùs Yàng Jehôwa.

¹⁸Poac rơp gơrê bal mơ mê, kung be ntơh phan ơn duh khoai tơyài mơ bơnô đah ma gơrê bal mơ mê.

¹⁹Jơh ală phan sàng goh mơ ală cau Israel ơn Yàng Jehôwa in gen Añ ai mê mơ ală kòn klau kòn ùr mê in lơh gơs pơnah tòm phan òs tòmpà mê in. Hơ̆ la dô bơta ho bal mơ boh gam sùm sùm mê in mơ kòn sau mê in di đap Yàng Jehôwa.”

²⁰Yàng Jehôwa đơs mơ Arôn lah: “Mê ò gơs sre brê tòm lơgar bol khai dê mơ mê kung ò gơs pơnah lơi digùl bol khai; Añ la pơnah gơrê bal mơ mê mơ la sre brê mê dê digùl ală cau Israel.

²¹Añ ai ală cau Lebi in jơh ală pơnah jơt tòm Israel lơh gơs sre brê bol khai dê, tơm wơl bơh ală broă bol khai neh lơh tòm tŭ duh broă tòm Sàl Tòm Mat.

²²Bơh ngai do jơl hìng nau, cau Israel bañ tus rềp di Sàl Tòm Mat, rngòt bol khai pal gơkòl lơh glài mơ pal chơt.

²³Mơya ală cau Lebi la cau lơh ală broă tòm Sàl Tòm Mat kong àñ glài bơh ală bơta lơh tìs bol khai dê tòmdră mơ gơ. Hơ̆ la dô bơta ho bal gam sùm sùm ală cau in tòm ală rài rơp tus. Bol khai ò dòp geh sre brê lơi digùl ală cau Israel.

²⁴Mơya Añ ai ală cau Lebi in ală pơnah jơt mơ ală cau Israel ơn lơh gơs phan ơn duh khoai Yàng Jehôwa in lơh gơs sre brê bol khai dê. Gen tàng Añ neh đơs bơh bol khai lah: ‘Bol khai rơp ò gơs sre brê digùl ală cau Israel.’”

²⁵Yàng Jehôwa đơs mơ Môise lah:

²⁶“Yal tĕ ală cau Lebi in mơ đơs mơ bol khai lah: ‘Tòm tŭ bol mê dòp bơh di ală cau Israel ală pơnah jơt mơ Añ ai bol mê in lơh gơs sre brê, gen bol mê pal ơn dô pơnah jơt bơh di pơnah jơt hơ̆ lơh gơs phan ơn duh khoai Yàng Jehôwa in.

²⁷Phan ơn duh khoai bol mê dê rơp geh kòp bol mê in be la kòi mbo bơh di làn jă kòi hala dà pat bơh di mpal pat plai ño.

²⁸Behơ̆ bol mê kung rơp ơn dô nơm phan ơn duh khoai Yàng Jehôwa in bơh di jơh ală pơnah jơt mơ bol mê dòp bơh di ală cau Israel. Bơh di ală pơnah jơt hơ̆, bol mê pal ơn pơnah Yàng Jehôwa dê Arôn in la cau gơnoar ơn phan duh khoai.

²⁹Mê pal ơn Yàng Jehôwa in pơnah niam rlau jơh mơ sàng goh rlau jơh tòm jơh ală phan neh ai bol mê in.’

³⁰Đơs tĕ mơ ală cau Lebi lah: ‘Tŭ lơi bol mê ơn pơnah niam rlau jơh, gơ rơp geh kòp la phan ơn bol mê dê kung be phan gơlik gơs bơh di làn jă kòi hala bơh di mpal pat plai ño.

³¹Bol mê mơ ală cau tòm hìu nhă bol mê dê rơp sa pơnah gam wơl gơ dê tiah lơi di lơm, bơh hơ̆ la jền tơngai bol mê dê bơh broă bol mê lơh tòm Sàl Tòm Mat.

³²Tòm tŭ ơn pơnah niam rlau jơh gơ dê bol mê rơp ò kong glài bơh bơta hơ̆, gen bol mê ò lơh ƀơ̆ ƀơl ală phan ơn duh khoai sàng goh ală cau Israel dê, mơ bol mê rơp ò chơt.’”