Read koho Khà Làng Bol 19 Bible Online

Khà Làng Bol 19 - koho bible

Khà Làng Bol 19

¹Yàng Jehôwa đơs mơ Môise mơ Arôn lah:

²“Do la dô bơta pal lơh tòm bơta boh lam mơ Yàng Jehôwa neh sồr: ‘Sồr tĕ ală cau Israel cèng tus bol mê in dô nơm kơnrồ dra pơrhê ò gơs tềl sồt mơ òhềt tui yô.

³Ai tĕ gơ Eleajar cau gơnoar ơn phan duh khoai in; gơ pal kong tề tus hơ đah bơdìh sàl ơm mơ tơnchơt di đap khai.

⁴Lồc behơ̆ Eleajar cau gơnoar ơn phan duh khoai rơp ai ràs tê khai dê mơ iurŭ tòm mhàm gơ mơ rsìh gơ poh dơ̆ wèt hơ đah Sàl Tòm Mat.

⁵Tòm tŭ khai rmê sền, kơnrồ dra pal kong chu tòm ồs, gơltau gơ, poac, mhàm mơ pròc klung.

⁶Cau gơnoar ơn phan duh khoai rơp ai dô êt chi mpàn nho rề, nha biap ƀô, mơ brài sơnò belàt dà gur mơ sơrbì hơđang kơnrồ dra ồs sa.

⁷Tơnơ̆ mơ hơ̆ cau gơnoar ơn phan duh khoai pal pìh ồi ào khai dê mơ um tòm dà. Gen khai rgơi mut tòm sàl ơm mơya khai rơp kong kòp la ò goh jơl tus di trồ mho.

⁸Cau chu kơnrồ hơ̆ kung pal pìh ồi ào khai dê mơ um tòm dà, mơ khai kung rơp kong kòp la ò goh jơl tus di trồ mho.

⁹Dô nă cau geh kòp la sàng goh rơp khòm bùh kơnrồ dra dê mơ ơn gơtòm dô bă tiah geh kòp la sàng goh. Bol khai pal prap bùh hơ̆ mpồl jơnum Israel in nàng ngui lơh gơs be dà rào goh; gơ la phan ơn pơdơng tòm bơta lơh goh.

¹⁰Cau tơrgòm bùh kơnrồ dra hơ̆ dê kung pal pìh ồi ào khai dê, mơ khai kung rơp kong kòp la ò goh jơl tus di trồ mho. Hơ̆ rơp la dô bơta sồr lam gam sùm sùm ală cau Israel in bal mơ ală cau làng bơdìh ơm kis digùl bol khai.

¹¹Cau lơi ƀư di ƀồc chơt dô nă cau lơi ndai dê rơp kong kòp la ò goh tòm poh ngai.

¹²Khai pal lơh goh să tòm khai tòm dà tòm ngai dơ̆ pe mơ tòm ngai dơ̆ poh gen khai rơp geh goh. Mơya dilah khai ò lơh goh să tòm khai dê tòm ngai dơ̆ pe mơ tòm ngai dơ̆ poh, rơp ò geh goh.

¹³Cau lơi ƀư dê dô nơm ƀồc dô nă cau lơi ndai dê mơ ò lơh goh să tòm khai gen cau hơ̆ lơh ƀơ̆ ƀơl Hìu Ing Duh Khoai Yàng Jehôwa dê. Cau hơ̆ pal kong tă tơlik bơh di Israel. Tài bơh dà lơh goh ò rsìh hơđang khai, khai pal kong kòp la ò goh, bơta ò goh khai dê gơ ơm hơđang khai.

¹⁴Do la bơta boh lam pal lơh jat tòm tŭ gơs dô nă cau chơt tòm sàl ơm: Cau lơi mut tòm sàl ơm mơ cau lơi ơm tòm sàl ơm hơ̆ rơp kong kòp la ò goh tòm poh ngai,

¹⁵mơ dô nơm hồp lơi ò gơs bơnap kơt bal mơ gơ rơp kong kòp la ò goh.

¹⁶Cau lơi ơm đah bơdìh mơ ƀư di dô nă cau lơi neh gơkòl sreh tơnchơt mơ đào hala dô nă cau lơi neh chơt jat bơta òs cau dê, hala cau lơi neh ƀư di dô nơm ntìng ƀồc kòn mơnus dê hala dô nơm bơtô ƀồc, gen cau hơ̆ pal kong kòp la ò goh tòm poh ngai.

¹⁷Tài bơh dô nă cau ò goh, ơn tĕ dô êt bùh phan ơn duh khoai lơh goh dê tòm dô nơm yang mơ tuh dà hơđang bùh hơ̆.

¹⁸Gen dô nă cau goh rơp ai “nha biap ƀô” iurŭ gơtòm dà mơ rsìh hơđang sàl ơm mơ jơh ală phan ngui mơ làng bol tòm hơ̆. Khai kung pal rsìh hơđang cau lơi neh ƀư di dô nơm ntìng ƀồc kòn mơnus dê hala dô nơm bơtô ƀồc hala dô nă cau lơi neh chơt jat bơta òs kòn mơnus dê.

¹⁹Cau geh kòp la goh rơp rsìh dà hơđang cau ò goh tòm ngai dơ̆ pe mơ ngai dơ̆ poh, mơ tòm ngai dơ̆ poh khai pal lơh goh khai in. Cau neh goh pal pìh ală ồi ào khai dê mơ um tòm dà, mơ tòm trồ mho ngai hơ̆ khai rơp geh goh.

²⁰Mơya dilah cau ò goh ò lơh goh să tòm khai dê, khai pal kong tă sang bơh di mpồl jơnum làng bol dê, tài bơh khai neh lơh ƀơ̆ ƀơl tiah sàng goh Yàng Jehôwa dê. Dà lơh goh ò gŏ rsìh hơđang khai, mơ khai gam ò goh.

²¹Hơ̆ la dô bơta sồr lam gam sùm sùm bol khai in. Cau neh rsìh dà lơh goh kung pal pìh ală ồi ào khai dê, mơ cau lơi ƀư di dà lơh goh rơp kong kòp la ò goh jơl tus di trồ mho.

²²Phan lơi mơ cau ò goh ƀư di gơ gen rơp gơlik gơs la phan ò goh, cau lơi ƀư di gơ rơp gơlik gơs ò goh jơl tus di trồ mho.’”