Read koho Khà Làng Bol 20 Bible Online

Khà Làng Bol 20 - koho bible

Khà Làng Bol 20

¹Tòm kơnhai dùl, jơh dô mpồl jơnum cau Israel tus hơ ƀlàng ngềt ngơt Jin, mơ bol khai ơm dơh wơl tòm Kades. Tềng hơ̆ Miriam chơt mơ geh tơp.

²Mơ tai, ò gơs dà mpồl jơnum in, mơ làng bol pơjum bal tòmdră mơ Môise mơ Arôn.

³Bol khai tòmlah mơ Môise mơ đơs lah: “Niam rlau la bol hi neh chơt tòm tŭ oh mi bol hi dê gơpừ chơt di đap Yàng Jehôwa!

⁴Ñchi bơh tài ồng cèng mpồl jơnum Yàng Jehôwa dê tus tòm ƀlàng ngềt ngơt nàng bol hi mơ mpồl phan poan jơng bol hi dê pal chơt tềng do taih?

⁵Ñchi bơh tài ồng cèng bol hi lik lòt bơh di Ejiptơ tus hơ tiah iơh rmơh do taih? Tềng do ò gơs kòi mbo hala plai chi ƀal, plai ño hala plai lừu. Mơ ò gơs dà nàng hùc!”

⁶Môise mơ Arôn lòt bơh di mpồl jơnum tus hơ mpồng mut Sàl Tòm Mat dê mơ tơmbic să blup mat tòm ù, mơ bơta gơklŏ Yàng Jehôwa dê tơlik mơ bol khai.

⁷Yàng Jehôwa đơs mơ Môise lah:

⁸“At tĕ gai jra, gen mê mơ Arôn bi mê dê hòi mpồl jơnum pơjum bal. Đơs tĕ mơ lŭ ne di đap bol khai mơ gơ rơp gơlik dà. Mê rơp cèng dà gơlik bơh di lŭ klềr mpồl jơnum in tồ bol khai mơ mpồl phan poan jơng bol khai in hùc.”

⁹Behơ̆ Môise ai gai jra bơh di đap Yàng Jehôwa, tòm toh jat be Kơnràñ neh sồr khai.

¹⁰Khai mơ Arôn hòi mpồl jơnum pơjum bal di đap pơnai lŭ, mơ Môise đơs mơ bol khai lah: “Ơ ală cau jak tòmdră, dan ơm iat do: Bol hi pal cèng bol mê in dà gơlik bơh pơnai lŭ do sơl ơ?”

¹¹Gen Môise yò tơwòr tê mơ ai gai jra khai dê pòng pơnai lŭ tòm bàr dơ̆. Dà hòr lik, mơ mpồl jơnum bal mơ mpồl phan poan jơng bol khai dê hùc.

¹²Mơya Yàng Jehôwa đơs mơ Môise mơ Arôn lah: “Tài bơh bol mê ò dòn kơnòm di Añ, nàng ràng tơlik Añ la sàng goh di đap ală cau Israel, bol mê ò cèng mpồl jơnum do mut tòm lơgar Añ ai bol khai in.”

¹³Hơ̆ la tòm dà Meriba la tiah cau Israel tòm pơndang mơ Yàng Jehôwa, mơ la tiah Kơnràñ neh ràng tơlik să tòm Kơnràñ sàng goh digùl bol khai.

¹⁴Môise sồr ală cau kong sồr lòt bơh di Kades tus hơ bơtau Edôm mơ đơs lah: “Israel oh bơtau dê đơs be do: Bơtau git jơh ală bơta bòl glar kalke neh gơtơntus hơđang bol hi.

¹⁵Ală ồng pàng bol hi dê neh mù tòm Ejiptơ, mơ bol hi neh ơm tềng hơ̆ jŏ sơnam. Cau Ejiptơ gơwèt iơh mơ bol hi mơ ală ồng pàng bol hi dê,

¹⁶mơya tòm tŭ bol hi hòi driau mơ Yàng Jehôwa, Kơnràñ neh kơno jơnau hòi driau bol hi dê mơ sồr dô nă cau gơnrơh cèng bol hi lik bơh di Ejiptơ. Tŭ do bol hi ơm tòm Kades la dô nơm ƀòn dờng ơm lồi di nhàr ù tiah bơtau dê.

¹⁷Dan ai bol hi in lòt gan lơgar bơtau dê. Bol hi rơp ò lòt gan ƀlàng sre hala suơn ño lơi, hala hùc dà bơh di tơrlung lơi. Bol hi rơp lòt jat gùng dờng mơ ò dah đah ma hala đah kiau jơl tus di tŭ bol hi neh lòt gan lơgar bơtau dê.”

¹⁸Mơya Edôm ho wơl lah: “Bol mê ò di lòt gan tềng do; dilah bol mê pơnđơl lòt gen bol hi rơp lik lòt mơ ai đào brồ lơh bol mê.”

¹⁹Cau Israel ho wơl lah: “Bol hi rơp lòt jat gùng dờng, mơ dilah bol hi hala mpồl phan poan jơng bol hi dê hùc dà lơi bơtau dê gen bol hi rơp tơm jền dà hùc hơ̆. Bol hi kòñ mìng lòt gan mơ jơng lơm, ò kòñ bơta lơi ndai.”

²⁰Bol khai ho wơl tai lah: “Bol mê ò di lòt gan.” Gen cau Edôm lik lòt mơ dô mpồl ling dờng mơ pràn kơldang ngan tòmdră mơ Israel.

²¹Tài bơh cau Edôm ò ai cau Israel in lòt gan lơgar bol khai dê gen cau Israel pơrlac wơl bơh di bol hơ̆.

²²Jơh dô mpồl jơnum cau Israel dê lik lòt bơh di Kades mơ tus hơ mơnơm Hôr.

²³Di mơnơm Hôr, rềp di nhàr lơgar Edôm, Yàng Jehôwa đơs mơ Môise mơ Arôn lah:

²⁴“Arôn rơp geh cèng tus bal mơ ồng pàng khai dê. Khai rơp ò mut tòm lơgar Añ ai cau Israel in, tài bơh bàr nă bol mê tòmdră mơ jơnau sồr Añ jê tòm dà Meriba.

²⁵Ai tĕ Arôn mơ Eleajar kòn klau khai dê mơ lam bol khai guh hơ mơnơm Hôr.

²⁶Hồ tĕ ồi ào Arôn dê mơ tơnsoh Eleajar in la kòn klau khai dê, bơh Arôn rơp geh tă cèng ơm bal mơ ồng pàng khai dê; khai rơp chơt tềng hơ̆.”

²⁷Môise lơh jat tòm toh be jơnau Yàng Jehôwa neh sồr: Bol khai guh hơ mơnơm Hôr di đap mat jơh dô mpồl jơnum.

²⁸Môise hồ ală ồi ào Arôn dê mơ tơnsoh Eleajar in la kòn klau Arôn dê. Mơ Arôn chơt tềng hơ̆, hơđang bồ mơnơm. Gen Môise mơ Eleajar mù bơh mơnơm,

²⁹mơ tòm tŭ jơh dô mpồl jơnum neh git la Arôn neh chơt rau, jơh dô hìu Israel ñìm rac bơh khai tòm pe jơt ngai.