Read koho Khà Làng Bol 22 Bible Online

Khà Làng Bol 22 - koho bible

Khà Làng Bol 22

¹Gen cau Israel lòt gùng tus hơ ƀlàng ring Môap mơ bơtào sàl ơm rò gah Jordan, tòm toh mơ Jerikô.

²Mơ tai, Balak kòn klau Jippor neh gŏ jơh ală bơta mơ Israel neh lơh di cau Amôrit,

³mơ Môap rngòt rơm să tài bơh làng bol Israel la gal ngan. Ngan, Môap gơs bềng bơta rngòt di ală cau Israel.

⁴Ală cau Môap đơs mơ ală cau kwang kra Midian lah: “Làng bol do rơp sa loan jơh ală bơta gùt dar bol he kung be dô nơm kơnrồ sa loan jơh ñhơt tòm ƀlàng behơ̆ sơl.” Behơ̆ Balak kòn klau Jippor, la bơtau Môap tòm tŭ hơ̆,

⁵sồr ală cau kong sồr lòt tus hơ Balaam kòn klau Beôr ơm tòm Pethor, rềp di Hiòng Ơphrat, ù tiah cau Amao dê. Balak đơs lah: “Dô nơm làng bol neh lik bơh di Ejiptơ; bol khai ơm làm hơđang ù tiah, mơ neh tus rềp ơm di gah mê.

⁶Tŭ do dan tus mơ srat sơntơm làng bol do, tài bơh bol khai la pràn rlau mơ añ. Gen digơlan añ rơp lơh alah mơ ting bơtrơh bol khai bơh di lơgar. Bơh añ git lah cau lơi mê ai lơngai gen geh lơngai, mơ cau lơi mê srat sơntơm gen kòl srat sơntơm.”

⁷Ală cau kwang kra Môap dê lik lòt, cèng bal jền tơngai ai cau bơjơu in. Tòm tŭ bol khai neh tus hơ Balaam, bol khai yal khai in ală jơnau Balak neh đơs.

⁸Balaam đơs mơ bol khai lah: “Dan ơm bic mang tềng do, mơ añ rơp ai bol mê in jơnau ho wơl mơ Yàng Jehôwa rơp ai añ in.” Behơ̆ ală cau kwang Môap dê ơm wơl mơ khai.

⁹Yàng Tom Trồ tus mơ Balaam mơ lùp khai lah: “Ală cau ơm mơ mê la ñcau taih?”

¹⁰Balaam đơs mơ Yàng Jehôwa lah: “Balak kòn klau Jippor bơtau Môap pơyoa añ in jơnau do:

¹¹‘Dô nơm làng bol neh lik bơh di Ejiptơ ơm làm hơđang ù tiah. Tŭ do dan tus mơ srat sơntơm bol khai añ in. Digơlan añ rơp rgơi tòmlơh mơ bol khai mơ bơtrơh bol khai.’”

¹²Mơya Yàng Tom Trồ đơs mơ Balaam: “Bañ lòt mơ bol khai. Mê ò di srat sơntơm làng bol do tài bơh bol khai neh geh ai lơngai.”

¹³Àng drim hìng Balaam guh bic mơ đơs mơ ală cau kwang dờng Balak dê lah: “Rê wơl tĕ hơ lơgar tòm ală ồng dê, bơh Yàng Jehôwa neh ò ai gơnoar añ lòt mơ ală ồng.”

¹⁴Behơ̆ ală cau kwang dờng Môap dê rê wơl mơ đơs mơ Balak lah: “Balaam ò bài lòt mơ bol hi.”

¹⁵Gen Balak sồr ală cau kwang dờng ndai, oă rlau mơ màng ryŭ rlau mơ ală cau neh sồr lài.

¹⁶Bol khai tus mơ Balaam mơ đơs lah: “Balak kòn klau Jippor dê đơs be do: ‘Bañ lòi bơta lơi kơryan ồng lòt tus mơ añ,

¹⁷tài bơh añ rơp ai phan ƀàn ồng in di pal ngan mơ lơh jat jơh ală jơnau ồng đơs. Dan tus mơ srat sơntơm làng bol do añ in.’”

¹⁸Mơya Balaam ho wơl bol khai lah: “Bulah Balak ai añ in hìu gơlang khai dê bềng mơ màh mơ priă, añ ò rgơi lơh bơta lơi dờng hala dềt rlau mơ jơnau sồr Yàng Jehôwa dê la Yàng Tom Trồ añ jê.

¹⁹Tŭ do ơm tĕ tềng do kung be ală cau lài neh ơm, mơ añ rơp jòi git ñchi jơnau tai Yàng Jehôwa rơp sồr añ.”

²⁰Tòm mang hơ̆ Yàng Jehôwa tus mơ Balaam mơ đơs lah: “Bơh ală cau do neh tus nàng jà mê, lòt tĕ mơ bol khai, mơya mìng lơh tĕ bơta lơi Añ sồr mê lơh.”

²¹Balaam guh gòñ àng drim, kơt ừn alàng khai dê mơ lòt bal mơ ală cau kwang dờng Môap dê.

²²Mơya Yàng Tom Trồ gơjrañ ngan tòm tŭ khai lòt, mơ cau gơnrơh Yàng Jehôwa dê ntào tòm gùng nàng kơryan khai. Balaam hào alàng khai dê, mơ bàr nă cau duh broă khai dê lòt bal mơ khai.

²³Tòm tŭ alàng gŏ cau gơnrơh Yàng Jehôwa dê ntào di gùng tòm tê at dô nơm đào neh tă bơh di sơmprồm, alàng pleh bơh di gùng mơ lòt tòm ƀlàng sre. Balaam pù gơ nàng at gơrê wơl tòm gùng.

²⁴Gen cau gơnrơh Yàng Jehôwa dê ntào di dô nơm gùng hat digùl bàr nơm suơn ño, gơs dơrñang di bàr đah.

²⁵Tòm tŭ alàng gŏ cau gơnrơh Yàng Jehôwa dê gen gơ pleh rềp di gah dơrñang, gơjơlềt jơng Balaam di dơrñang. Behơ̆ khai pù tai alàng.

²⁶Gen cau gơnrơh Yàng Jehôwa di lòt lài mơ ntào di dô bă tiah hat ngan, ò tang gơs tiah nàng pơrlac ma hala kiau.

²⁷Tòm tŭ alàng gŏ cau gơnrơh Yàng Jehôwa dê, gơ bic di tiah hơđơm jơng Balaam dê, khai gơjrañ ngan mơ pù gơ mơ gai jra khai dê.

²⁸Gen Yàng Jehôwa pò bơr alàng, mơ gơ đơs mơ Balaam lah: “Ñchi añ neh lơh di ồng mơ ồng neh pù lơh añ tòm pe dơ̆ behơ̆ taih?”

²⁹Balaam ho wơl mơ alàng lah: “Hơ̆ la tài bơh mê neh sền òsơp di añ. Dilah añ gơs dô nơm đào tòm tê, añ sreh tơnchơt mê mo tŭ do.”

³⁰Alàng đơs mơ Balaam lah: “Añ ò di la alàng tòm ồng dê mơ ồng neh hào sùm sùm jơl tus di ngai do ò ơ? Añ neh gơs bơta òs mòng lơh behơ̆ ồng in sơl ơ?” Balaam đơs lah: “Ò.”

³¹Gen Yàng Jehôwa pò mat Balaam, mơ khai gŏ cau gơnrơh Yàng Jehôwa dê ntào tòm gùng at đào tòm tê. Behơ̆ khai kun bồ mơ tơmbic să blup mat tòm ù.

³²Cau gơnrơh Yàng Jehôwa dê lùp khai lah: “Ñchi bơh tài mê neh pù alàng mê dê tòm pe dơ̆ taih? Añ neh tus tềng do nàng kơryan mê tài bơh gùng lòt mê dê la dô nơm gùng roh rui di đap mê.

³³Alàng neh gŏ añ mơ neh pleh bơh di añ tòm pe dơ̆ do. Dilah gơ ò pleh bơh di añ gen ngan la añ neh sreh tơnchơt mê rau, mơya añ neh lòi gơ in kis.”

³⁴Balaam đơs mơ cau gơnrơh Yàng Jehôwa dê lah: “Añ neh tìs glài. Añ ò đal git Kơnràñ ntào tòm gùng nàng kơryan añ. Tŭ do dilah Kơnràñ ò niam nùs, añ rơp rê wơl.”

³⁵Cau gơnrơh Yàng Jehôwa dê đơs mơ Balaam lah: “Lòt tĕ mơ ală cau do, mơya mìng đơs jơnau lơi Añ sồr mê lơm.” Behơ̆ Balaam lòt bal mơ ală cau kwang dờng Balak dê.

³⁶Tòm tŭ Balak kơno lah Balaam rơp lòt tus gen khai lik lòt nàng wă rò Balaam tòm dô nơm ƀòn dờng Môap dê di nhàr Arnôn, di tiah lồi ù tiah lơgar khai dê.

³⁷Balak đơs mơ Balaam lah: “Añ ò di neh sồr jà ồng tus mhar ò ơ? Ñchi bơh tài ồng ò tus mơ añ taih? Ngan la añ ò rgơi ai phan ƀàn ồng in sơl ơ?”

³⁸Balaam ho wơl lah: “Di rau, tŭ do añ neh tus hơ bơtau rau, mơya añ rgơi đơs khat gơboh sơl ơ? Añ pal đơs mìng ală jơnau Yàng Tom Trồ ơn tòm bơr añ lơm.”

³⁹Lồc behơ̆, Balaam lòt bal mơ Balak tus hơ Kiriat Hujôt.

⁴⁰Balak ơn pơdơng kơnrồ mơ belàt mơ pà Balaam in mơ ală cau kwang dờng in neh lòt bal mơ Balaam.

⁴¹Àng drim hìng, Balak lam Balaam guh hơ Bamôt Baal, mơ bơh tềng hơ̆ khai sền gŏ dô pơnah mpồl làng bol Israel dê.