Read koho Khà Làng Bol 24 Bible Online

Khà Làng Bol 24 - koho bible

Khà Làng Bol 24

¹Mơ tai, tòm tŭ Balaam neh gŏ Yàng Jehôwa niam nùs ai lơngai Israel in, khai ò kơnòm di bơta juh proh tai kung be ală dơ̆ lài, mơya wèt mat khai dê hơ đah ƀlàng ngềt ngơt.

²Tòm tŭ Balaam tơnggòr sền mơ gŏ Israel bơtào sàl ơm jat jơi bơtiàn bol khai dê, Hwềng Yàng Tom Trồ dê tus hơđang khai

³mơ khai đơs ală jơnau đơs hwơr khai dê lah: “Do la jơnau đơs hwơr Balaam kòn klau Beor dê, jơnau đơs hwơr dô nă cau gơs mat sền gŏ loh làng,

⁴jơnau đơs hwơr dô nă cau neh kơno ală jơnau đơs Yàng Tom Trồ dê, la cau neh gŏ bơta gơtơnggŏ bơh di Bơtau Gơnoar Dờng Làm Jơh, la cau neh tơmbic să cùn khoai, mơ mat khai dê neh geh pò.

⁵Ơ Jakôp, ală sàl ơm mê dê la hàng mơnĕ ò git nđò! Ơ Israel, ală tiah ơm mê dê la mơnĕ mơnài ò git nđò!

⁶Bol gơ geh bơtào dờng ơnàng kung be ală thòng, be ală suơn di gah hiòng dà, be ală chi kơlhô geh tam bơh Yàng Jehôwa, be ală chi pơnàng di gah ală dà.

⁷Dà rơp hòr lik bơh ală thùng ơn dà khai dê, mơ gar sơntìl khai dê rơp tơngkah tơngkañ dà, Bơtau at bồ bol khai dê rơp la dờng rlau mơ Agak; lơgar bol khai dê rơp geh yò tơngguh hơđang.

⁸Yàng Tom Trồ neh cèng bol khai lik klàs bơh di Ejiptơ; Bol khai gơs bơta pràn kơldang kung be dô nơm kơnrồ brê. Bol khai sa loan ală làng bol, dơrkă rpot rpet ală ntìng ală làng bol dê.

⁹Bol khai rlô să mơ bic kung be dô nơm klìu triă, kung be dô nơm klìu triă me, ñcau khin pơrlai gơ taih? Lơngai ală cau lơi in ai lơngai bol mê in, mơ ală cau srat sơntơm bol mê gen rơp kong srat sơntơm!”

¹⁰Gen Balak gơhào gơjrañ ngan di Balaam. Khai tàp tê khai dê mơ đơs mơ Balaam lah: “Añ sồr jà mê tus nàng srat sơntơm ală cau sò tơm di añ, mơya mê neh ai lơngai bol khai in neh pe dơ̆ do rau.

¹¹Tŭ do, lik lòt tĕ mơ rê hìu! Añ neh đơs lah añ rơp ai phan ƀàn dờng mê in, mơya Yàng Jehôwa neh kơryan mê dòp geh phan ƀàn.”

¹²Balaam ho wơl Balak lah: “Añ ò di neh đơs mơ ală cau kong sồr mơ bơtau neh sồr lòt tus hơ añ lah:

¹³‘Bulah Balak ai añ in hìu gơlang khai dê bềng lìu priă mơ màh, añ ò rgơi lơh bơta lơi niam hala iơh jat nùs tòm añ jê rlau mơ jơnau sồr Yàng Jehôwa dê, mơ añ pal đơs mìng jơnau lơi Yàng Jehôwa đơs ò ơ’?

¹⁴Tŭ do añ rê wơl hơ làng bol añ jê mơya tus tĕ, lòi añ yal lài bơtau in bơh bơta làng bol do rơp lơh di làng bol bơtau dê tòm ală ngai rơp tus.”

¹⁵Gen khai đơs jơnau đơs hwơr khai dê lah: “Jơnau đơs hwơr Balaam kòn klau Beor dê, jơnau đơs hwơr dô nă cau gơs mat sền gŏ loh làng,

¹⁶jơnau đơs hwơr dô nă cau kơno ală jơnau đơs Yàng Tom Trồ dê, la cau gơs bơta git wă bơh di Bơtau Hơđang Rlau Jơh, la cau neh gơs bơta gơtơnggŏ bơh di Bơtau Gơnoar Dờng Rlau Jơh, la cau neh tơmbic să cùn khoai, mơ gơs gar mat geh pò:

¹⁷Añ gŏ Kơnràñ, mơya ò di tŭ do; Añ tơnggòr sền Kơnràñ, mơya ò di rềp. Dô nơm sơmañ rơp lik bơh di Jakôp; dô nơm gai gơnoar rơp tơngguh bơh di Israel. Kơnràñ rơp pòng bơcah ală bìng liang Môap dê, mơ ală sơgơn bơtau ală kòn klau Set dê.

¹⁸Edôm rơp kong tòmpìt ai; Seir, cau sò tơm khai dê, rơp kong tòmpìt ai, mơya Israel rơp gơlik dờng pràn kơldang.

¹⁹Dô nă bơtau at bồ rơp lik bơh di Jakôp mơ tơnroh ală cau gam kis tòm ƀòn dờng.”

²⁰Lồc behơ̆ Balaam sền gŏ Amalek mơ đơs jơnau đơs hwơr khai dê lah: “Amalek la khà dùl digùl ală làng bol, mơya lồi dut gơ rơp kong roh rui.”

²¹Gen khai gŏ ală cau Kenit mơ đơs jơnau đơs hwơr khai dê lah: “Tiah ơm sùm mê dê la kơ̆ cê, Rsòn mê dê neh ơm hơđang lŭ klềr;

²²mơya ală cau Kenit bol mê dê rơp kong tơnroh tòm tŭ Assur kup cèng bol mê.”

²³Gen khai đơs jơnau đơs hwơr khai dê lah: “Ơ hơh, ñcau rgơi kis tòm tŭ Yàng Tom Trồ lơh gơlik gơs bơta do taih? Ñcau la ală cau pơjum tơrgòm đah đang taih?

²⁴Ală ơhò rơp tus bơh di ală gah dàlềng Kittim dê; bol gơ rơp at bồ hơđang Assur mơ Eber, mơya bol khai kung rơp kong roh rui.”

²⁵Lồc behơ̆, Balaam ñă ntào rê hìu mơ Balak lòt tòm gùng khai dê.