Read koho Khà Làng Bol 27 Bible Online

Khà Làng Bol 27 - koho bible

Khà Làng Bol 27

¹Ală kòn ùr Selôphehat kòn klau Hepher, sau Galaat, se Makir, set Manase dê, gơrê bal mơ mpồl hìu nhă Manase kòn klau Jôsep. Sơnđan mat ală kòn ùr hơ̆ la Mahlah, Nôah, Hôglah, Milkah mơ Tirjah.

²Bol khai tus rềp di tiah mut Sàl Tòm Mat, mơ ntào di đap Môise, Eleajar cau gơnoar ơn phan duh khoai, ală cau kwang at bồ jơh dô mpồl jơnum làng bol dê, mơ đơs lah:

³“Bèp bol hi dê neh chơt tòm ƀlàng ngềt ngơt. Khai ò di ơm digùl ală cau jat Kôra neh dô nùs bal tòmdră mơ Yàng Jehôwa, mơya khai neh chơt bơh tồi glài să tòm khai dê mơ ò gŏ lòi wơl ală kòn klau.

⁴Ñchi bơh tài sơnđan mat bèp bol hi dê pal kong roh thit bơh di mpồl hìu nhă khai dê tài bơh khai ò gơs kòn klau taih? Dan ai bol hi in sre brê digùl ală cau gơp bơtiàn bèp bol hi dê.”

⁵Behơ̆ Môise cèng jơnau bol hơ̆ dê tus di đap Yàng Jehôwa

⁶mơ Yàng Jehôwa đơs mơ khai lah:

⁷“Jơnau ală kòn ùr Selôphehat neh đơs la di. Ngan, mê pal ai bol khai in ù tiah lơh gơs sre brê digùl ală gơp bơtiàn bèp bol khai dê, mơ jào bol khai in sre brê bèp bol khai dê.

⁸Đơs tĕ mơ ală cau Israel lah: ‘Dilah dô nă cau klau chơt mơ ò lòi dô nă kòn klau lơi gen jào tĕ sre brê khai dê kòn ùr khai in.

⁹Dilah cau hơ̆ ò gơs kòn ùr gen ai tĕ sre brê khai dê ală oh mi khai in.

¹⁰Dilah cau hơ̆ ò gơs oh mi gen ai tĕ sre brê khai dê ală oh mi bèp khai in.

¹¹Dilah bèp khai ò gơs oh mi gen ai tĕ sre brê khai dê cau gơp bơtiàn rềp rlau jơh tòm mpồl hìu nhă khai dê nàng khai dòp geh gơlơh gơs phan tòm. Bơta hơ̆ rơp la dô jơnau pal lơh, jat bơta boh lam cau Israel dê mơ Yàng Jehôwa neh sồr Môise.’”

¹²Gen Yàng Jehôwa đơs mơ Môise lah: “Guh tĕ hơđang mơnơm Abarim do mơ sền gŏ ù tiah Añ neh ai ală cau Israel in.

¹³Tơnơ̆ mơ tŭ mê neh sền gŏ gơ rau, mê kung geh cèng brê ơm bal mơ ồng pàng mê dê, kung be Arôn la bi mê dê,

¹⁴bơh tòm tŭ mpồl jơnum làng bol tòmdră tòm ƀlàng ngềt ngơt Jin bơh dà, bàr nă bol mê neh ò dòn bơr lơh jat jơnau sồr Añ jê nàng bơtào Añ sàng goh di đap mat bol khai.” (Hơ̆ la dà Meriba Kades tòm ƀlàng ngềt ngơt Jin.)

¹⁵Môise đơs mơ Yàng Jehôwa lah:

¹⁶“Dan Jehôwa la Yàng Tom Trồ la tòm ryas jơh ală jơi geh bơta kis dê, pồ bơtào dô nă cau hơđang mpồl jơnum làng bol do

¹⁷nàng lik mut di đap bol khai, la dô nă cau rơp tề lam bol khai lik mơ mut tồ làng bol Yàng Jehôwa dê rơp ò gơlik gơs kung be belàt ò gơs cau ê sền gàr.”

¹⁸Behơ̆ Yàng Jehôwa đơs mơ Môise lah: “Ai tĕ Jôsue kòn klau Nun, la cau gơs Hwềng Yàng ơm bal, mơ ơn tê mê dê hơđang khai.

¹⁹Sồr khai ntào di đap Eleajar cau gơnoar ơn phan duh khoai mơ jơh dô mpồl jơnum làng bol, mơ bơtào jào broă khai in di đap mat bol khai.

²⁰Ai tĕ khai in dô pơnah tòm gơnoar at bồ mê dê tồ jơh dô mpồl jơnum làng bol rơp dòn bơr khai.

²¹Khai pal ntào di đap Eleajar cau gơnoar ơn phan duh khoai, la cau rơp dòp geh jơnau lơh nền bơh khai kơnòm di bơta hòi lùp Urim di đap Yàng Jehôwa. Jat jơnau gơnoar sồr khai dê mơ khai mơ jơh dô mpồl jơnum làng bol cau Israel dê rơp lik lòt, mơ kung jat jơnau gơnoar sồr khai dê mơ bol khai rơp mut wơl.”

²²Môise lơh jat tòm toh be jơnau Yàng Jehôwa neh sồr khai. Khai ai Jôsue mơ sồr ntào di đap Eleajar cau gơnoar ơn phan duh khoai mơ di đap jơh dô mpồl jơnum làng bol dê.

²³Gen khai ơn tê hơđang Eleajar mơ pồ bơtào jào broă khai in, jat be Yàng Jehôwa neh bơto tơnggit bơh Môise.