Read koho Khà Làng Bol 28 Bible Online

Khà Làng Bol 28 - koho bible

Khà Làng Bol 28

¹Yàng Jehôwa đơs mơ Môise lah:

²“Ai tĕ jơnau sồr do cau Israel in mơ đơs mơ bol khai lah: ‘Tòm tŭ bol mê cèng ơn Añ in phan sa lơh gơs phan ơn chu pơrguc gơs ƀô bơlhu niam nùs Añ.’

³Đơs tĕ mơ bol khai lah: ‘do la phan ơn duh khoai chu tòm ồs mơ bol mê ơn Yàng Jehôwa in: bàr nơm belàt gơs dô nam, ò tềl sồt, lơh gơs phan ơn chu pơrguc jat be òs kòp ngai.

⁴Rcang gơs dô nơm belàt tòm àng drim mơ dô nơm ndai tòm trồ mho,

⁵bal mơ dô nơm phan ơn mơ kòi mbo la dô pơnah jơt epha kơmbuh phe rhền bơcă bal mơ dô pơnah poan hin mơñà ôlibe.

⁶Hơ̆ la phan ơn duh khoai chu pơrguc òs ơn neh bơtào gơs tòm mơnơm Sinai gơs ƀô bơlhu niam nùs, la dô nơm phan ơn duh khoai chu tòm ồs ơn Yàng Jehôwa in.’

⁷Phan ơn pơdơng pơnjat bal la dô pơnah poan hin phan hùc gơs kañ bal mơ kòp nơm belàt. Tuh tĕ phan ơn pơdơng duh khoai Yàng Jehôwa in tòm Tiah Sàng Goh.

⁸Rcang gơs dô nơm belàt dơ̆ bàr tòm trồ mho, pơnjat bal phan ơn duh khoai mơ kòi mbo mơ phan ơn pơdơng duh khoai ndròm bal be neh rcang ơn tòm àng drim. Hơ̆ la dô nơm phan ơn chu tòm ồs gơs ƀô bơlhu niam nùs Yàng Jehôwa.”

⁹“Tòm ngai Saƀat, rcang tĕ dô nơm phan ơn duh khoai gơs bàr nơm belàt dô nam, ò sồt rmàñ, bal mơ dô nơm phan ơn pơdơng duh khoai mơ dô nơm phan ơn mơ kòi mbo gơs bàr pơnah jơt epha kơmbuh phe rhền bơcă bal mơ mơñà.

¹⁰Hơ̆ la phan ơn chu pơrguc tòm kòp ngai Saƀat, pơnjat bal mơ phan ơn chu pơrguc òs ơn mơ phan ơn pơdơng gơ dê.”

¹¹“Tòm ngai dùl kòp kơnhai dê, ơn tĕ Yàng Jehôwa in dô nơm phan duh khoai chu pơrguc gơs bàr nơm kơnrồ gam dềt, dô nơm belàt dam mơ poh nơm belàt dam dô nam, jơh ală phan hơ̆ pal ò gơs tềl sồt.

¹²Bal mơ kòp nơm kơnrồ dam, gen pal gơs dô nơm phan ơn mơ kòi mbo la pe pơnah jơt epha kơmbuh phe rhền bơcă bal mơ mơñà, bal mơ belàt dam pal ơn dô nơm phan ơn mơ kòi mbo la bàr pơnah jơt epha kơmbuh phe rhền bơcă bal mơ mơñà;

¹³mơ bal mơ kòp nơm belàt kòn pal ơn dô nơm phan ơn mơ kòi mbo gơs dô pơnah jơt epha kơmbuh phe rhền bơcă bal mơ mơñà. Hơ̆ la dô nơm phan ơn chu pơrguc ƀô bơlhu, dô nơm phan ơn chu pơrguc ơn Yàng Jehôwa in.

¹⁴Bal mơ kòp nơm kơnrồ dam gen pal ơn dô nơm phan ơn pơdơng duh khoai gơs nggùl hin tơrnòm ño; bal mơ belàt dam, dô pơnah pe hin; mơ bal mơ kòp nơm belàt kòn dô pơnah poan hin dê. Hơ̆ la phan ơn duh khoai chu pơrguc kòp kơnhai ơn tòm kòp ngai dùl lik tòm nam.

¹⁵Bal mơ phan ơn chu pơrguc òs ơn bal mơ phan ơn pơdơng duh khoai, dô nơm be dam kung pal ơn Yàng Jehôwa in lơh gơs phan ơn duh khoai tơwài glài.”

¹⁶“Di di ngai jơt poan kơnhai dùl gen pal pơjum sa Ngai wèr Lòt Gan.

¹⁷Di di ngai jơt pram kơnhai do gen gơs bơta pơjum sa; tòm poh ngai pal sa piang lă ò gơs kañ.

¹⁸Tòm ngai dùl gen hòi pơjum tĕ dô bơta pơjum ơn is sàng goh mơ bañ lơh broă òs gơ dê.

¹⁹Ơn tĕ Yàng Jehôwa in dô nơm phan duh khoai chu tòm ồs, dô nơm phan ơn chu pơrguc mơ bàr nơm kơnrồ dam gam dềt, dô nơm belàt dam dờng mơ poh nơm belàt dam dô nam, jơh ală bol gơ pal ò gơs tềl sồt.

²⁰Bal mơ kòp nơm kơnrồ dam pal rcang gơs dô nơm phan ơn mơ kòi mbo la pe pơnah jơt epha kơmbuh phe rhền bơcă bal mơ mơñà; bal mơ belàt dam gen pal gơs bàr pơnah jơt epha,

²¹bal mơ kòp nơm tòm poh nơm belàt kòn pal gơs dô pơnah jơt epha.

²²Ơn tĕ bal dô nơm be dam lơh gơs phan ơn tơwài glài mê in.

²³Rcang tĕ gơs ală phan hơ̆ bal mơ phan ơn duh khoai chu pơrguc òs ơn kòp àng drim.

²⁴Kung behơ̆, rcang tĕ phan sa bơh phan ơn duh khoai chu tòm ồs kòp ngai tòm poh ngai gơs ƀô bơlhu niam nùs Yàng Jehôwa, hơ̆ la pal rcang gơs pơnjat bal mơ phan ơn duh khoai chu pơrguc òs ơn mơ phan ơn pơdơng duh khoai gơ dê.

²⁵Tòm ngai dơ̆ poh gen hòi tĕ dô bơta pơjum ơn is sàng goh mơ bañ lơh broă òs lơh gơ dê.”

²⁶“Tòm ngai ală plai bồ sơnam, tòm tŭ bol mê ơn Yàng Jehôwa in dô nơm phan ơn duh khoai mơ gar pa tòm tŭ pơjum sa ală poh, hòi tĕ dô bơta pơjum ơn is sàng goh mơ bañ lơh broă òs lơh gơ dê.

²⁷Ơn tĕ dô nơm phan ơn duh khoai chu pơrguc mơ bàr nơm kơnrồ gam dềt, dô nơm belàt dam dờng mơ poh nơm belàt dam dô nam lơh gơs ƀô bơlhu niam nùs Yàng Jehôwa.

²⁸Bal mơ kòp nơm kơnrồ dam gen pal gơs dô nơm phan ơn duh khoai mơ kòi mbo la pe pơnah jơt epha kơmbuh phe rhền bơcă bal mơ mơñà; bal mơ belàt dam gen pal ơn bàr pơnah jơt epha;

²⁹bal mơ kòp nơm tòm poh nơm belàt, ơn tĕ dô pơnah jơt epha.

³⁰Ơn bal tĕ dô nơm be dam lơh gơs phan ơn duh khoai tơwài glài mê in.

³¹Rcang tĕ ală phan do bal mơ ală phan ơn pơdơng hùc, bơtơl hơđang phan ơn duh khoai chu pơrguc òs ơn mơ phan ơn duh khoai mơ kòi mbo. Lơh nền tĕ lah ală phan poan jơng pal ò gơs tềl sồt.”