Read koho Khà Làng Bol 29 Bible Online

Khà Làng Bol 29 - koho bible

Khà Làng Bol 29

¹“Di di ngai sơnròp kơnhai poh, bol mê bơtào tĕ dô bơta pơjum ơn is sàng goh mơ bañ lơh broă òs lơh. Hơ̆ la dô ngai ơn is bol mê in nàng uh ală kơlwòk.

²Ơn tĕ Yàng Jehôwa in phan ơn duh khoai gơs ƀô bơlhu niam nùs Kơnràñ gen rcang tĕ dô nơm phan ơn duh khoai chu pơrguc mơ dô nơm kơnrồ gam dềt, dô nơm belàt dam mơ poh nơm belàt kòn gơs dô nam, jơh ală bol gơ pal ò gơs tềl sồt.

³Bal mơ kơnrồ dam gen rcang gơs tĕ dô nơm phan ơn duh khoai mơ kòi mbo la pe pơnah jơt epha kơmbuh phe rhền bơcă bal mơ mơñà; bal mơ belàt dam gen bàr pơnah jơt;

⁴bal mơ kòp nơm tòm poh nơm belàt kòn gen dô pơnah jơt.

⁵Ơn bal tĕ dô nơm be dam lơh gơs phan ơn duh khoai tơwài glài mê in.

⁶Ală phan do la phan ơn bơtơl mơ phan ơn duh khoai chu pơrguc kòp kơnhai mơ kòp ngai bal mơ ală phan ơn duh khoai mơ kòi mbo mơ ală phan ơn pơdơng duh khoai jat be neh lơh nền. Hơ̆ la ală phan ơn duh khoai chu pơrguc ơn Yàng Jehôwa in gơs ƀô bơlhu niam.

⁷Tòm ngai jơt kơnhai poh do hòi pơjum tĕ dô bơta pơjum ơn is sàng goh. Bol mê pal pơndang sang să he mơ bañ lơh dô nơm broă òs lơh lơi.

⁸Ơn tĕ gơs ƀô bơlhu niam nùs Yàng Jehôwa in dô nơm phan ơn duh khoai chu pơrguc mơ dô nơm kơnrồ dam gam dềt, dô nơm belàt dam mơ poh nơm belàt dam gơs dô nam, jơh ală phan hơ̆ pal ò gơs sồt rmàñ.

⁹Bal mơ kơnrồ dam gen rcang gơs tĕ dô nơm phan ơn duh khoai mơ kòi mbo la pe pơnah jơt epha kơmbuh phe rhền bơcă bal mơ mơñà; bal mơ belàt dam gen ơn tĕ bàr pơnah jơt;

¹⁰bal mơ kòp nơm tòm poh nơm belàt kòn gen ơn tĕ dô pơnah jơt.

¹¹Ơn tĕ dô nơm be dam lơh gơs phan ơn tơwài glài bơtơl hơđang phan ơn tơwài glài nàng tơwài glài mơ phan ơn chu pơrguc òs ơn bal mơ phan ơn mơ kòi mbo, mơ ală phan ơn ñô.

¹²Tòm ngai jơt pram kơnhai poh, pơjum tĕ dô bơta pơjum ơn is sàng goh mơ bañ lơh broă òs lơh. Pơjum sa tĕ dô ngai pơjum sa Yàng Jehôwa in tòm poh ngai.

¹³Ơn tĕ dô nơm phan ơn duh khoai chu tòm ồs lơh gơs ƀô bơlhô niam nùs Yàng Jehôwa in, dô nơm phan ơn duh khoai chu pơrguc mơ jơt pe nơm kơnrồ dam gam dềt bàr nơm belàt dam dờng mơ jơt poan nơm belàt dam dô nam mơ ò gơs tềl sồt.

¹⁴Bal mơ kòp nơm tòm jơt poan nơm kơnrồ dam gen rcang gơs tĕ dô nơm phan ơn mơ kòi mbo gơs pe pơnah jơt epha kơmbuh phe rhền bơcă bal mơ mơñà; bal mơ kòp nơm tòm bàr nơm belàt dam gen ơn bàr pơnah jơt;

¹⁵bal mơ kòp nơm tòm jơt poan nơm belàt kòn gen ơn dô pơnah jơt.

¹⁶Kung ơn tĕ bal mơ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn mơ kòi mbo mơ phan ơn pơdơng hùc.

¹⁷Tòm ngai bàr gen rcang gơs tĕ jơt bàr nơm kơnrồ dam gam dềt, bàr nơm belàt dam mơ jơt poan nơm belàt kòn gơs dô nam, jơh bol gơ pal ò gơs tềl sồt.

¹⁸Bal mơ ală kơnrồ dam, ală be dam mơ ală belàt kòn gen rcang gơs tĕ ală phan ơn mơ kòi mbo, mơ ală phan ơn pơdơng jat be ntum khà neh lơh nền gơ dê.

¹⁹Kung ơn tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo, mơ phan ơn pơdơng hùc.

²⁰Tòm ngai pe, rcang gơs tĕ jơt dùl nơm kơnrồ dam, bàr nơm belàt dam mơ jơt poan nơm belàt kòn dam dô nam, jơh bol gơ ò gơs tềl sồt rmàñ.

²¹Bal mơ ală kơnrồ dam, ală belàt dam mơ ală belàt kòn, rcang gơs tĕ ală phan ơn mơ kòi mbo mơ ală phan ơn pơdơng jat ntum khà neh lơh nền.

²²Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.

²³Tòm ngai dơ̆ poan, rcang tĕ gơs jơt poan nơm kơnrồ dam, bàr nơm belàt dam mơ jơt poan nơm belàt dam dô nam, jơh ală bol gơ ò gơs tềl sồt,

²⁴bal mơ ală kơnrồ dam, ală belàt dam mơ ală belàt kòn gen rcang gơs tĕ ală phan ơn mơ kòi mbo mơ phan ơn pơdơng hùc bol gơ dê jat be ntum khà neh lơh nền.

²⁵Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn mơ kòi mbo mơ phan ơn pơdơng hùc.

²⁶Tòm ngai pram, gen rcang tĕ sin nơm kơnrồ dam, bàr nơm belàt dam mơ jơt poan nơm belàt kòn dô nam, jơh ală bol gơ ò gơs tềl sồt.

²⁷Bal mơ ală kơnrồ dam, ală belàt dam mơ ală belàt kòn gen rcang tĕ ală phan ơn kòi mbo mơ phan ơn pơdơng hùc bol gơ dê jat be ntum khà neh lơh nền.

²⁸Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn mơ kòi mbo mơ phan ơn pơdơng hùc.

²⁹Tòm ngai prau gen rcang gơs tĕ phàm nơm kơnrồ dam, bàr nơm belàt dam mơ jơt poan nơm belàt kòn gơs dô nam, jơh ală bol gơ pal ò gơs sồt.

³⁰Bal mơ ală kơnrồ dam, ală belàt dam mơ ală belàt kòn gen rcang tĕ ală phan ơn kòi mbo mơ phan ơn pơdơng hùc bol gơ dê jat be ntum khà neh lơh nền.

³¹Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.

³²Tòm ngai poh gen rcang tĕ gơs poh nơm kơnrồ dam, bàr nơm belàt dam mơ jơt poan nơm belàt kòn dô nam, jơh ală bol gơ ò gơs tềl sồt rmàñ.

³³Bal mơ ală kơnrồ dam, ală belàt dam mơ ală belàt kòn gen rcang gơs tĕ ală phan ơn kòi mbo mơ phan ơn pơdơng hùc bol gơ dê jat be ntum khà neh lơh nền.

³⁴Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.

³⁵Tòm ngai dơ̆ phàm, gen ơn is dô bơta pơjum mơ bañ lơh broă òs lơh.

³⁶Ơn tĕ dô nơm phan ơn duh khoai chu tòm ồs lơh gơs ƀô bơlhu niam nùs Yàng Jehôwa in, mơ jơt pe nơm kơnrồ dam gam dềt, bàr nơm belàt dam mơ jơt poan nơm belàt dam dô nam mơ ò gơs tềl sồt rmàñ lơh gơs dô nơm phan ơn duh khoai chu pơrguc.

³⁷Bal mơ kơnrồ dam, belàt dam mơ ală belàt kòn gen rcang gơs tĕ ală phan ơn mơ kòi mbo mơ phan ơn pơdơng hùc bol gơ dê jat be ntum khà neh lơh nền.

³⁸Ơn bal tĕ dô nơm be dam lơh gơs phan ơn tơwài glài, bơtơl hơđang phan ơn chu pơrguc òs ơn bal mơ phan ơn kòi mbo mơ phan ơn pơdơng hùc.

³⁹Bơtơl tĕ hơđang jơnau bol mê neh srat să ho nền, mơ ală phan ơn jat nùs kòñ bol mê dê gen rcang tĕ ală bơta do Yàng Jehôwa in tòm ală bơta pơjum sa neh bơtào gơs: ală phan ơn chu pơrguc, ală phan ơn mơ kòi mbo, ală phan ơn pơdơng hùc mơ ală phan ơn ring lơngai.”

⁴⁰Môise yal wơl ală cau Israel in jơh ală jơnau Yàng Jehôwa neh sồr khai.