Read koho Khà Làng Bol 30 Bible Online

Khà Làng Bol 30 - koho bible

Khà Làng Bol 30

¹Môise đơs mơ ală cau kwang at bồ ală jơi bơtiàn Israel lah: “Do la ală jơnau sồr Yàng Jehôwa dê:

²Tòm tŭ dô nă cau klau gơs dô jơnau ho pơgon mơ Yàng Jehôwa, hala srat să tòmkơt să khai tòm dô jơnau ho nền, gen khai ò rgơi sang lòi jơnau đơs khai dê, mơya khai pal lơh jat jơh ală jơnau khai neh đơs.

³Tòm tŭ dô nă cau ơruh gam ơm tòm hìu bèp khai dê mơ khai neh ho pơgon mơ Yàng Jehôwa, hala khai neh srat să tòmkơt să khai tòm dô jơnau ho nền,

⁴mơ bèp khai neh kơno bơh jơnau khai ho pơgon hala jơnau khai neh srat să ho nền mơya bèp khai ò gŏ đơs jơnau lơi mơ khai, gen pal prap gàr jơh ală jơnau ho pơgon mơ kòp jơnau srat să ho nền neh kơt di să tòm khai.

⁵Mơya dilah bèp khai bơkơ̆u khai tòm tŭ neh kơno ală jơnau hơ̆ gen jơh ală jơnau ho pơgon mơ jơnau srat să ho nền neh kơt di să tòm khai rơp ò gam tai; Yàng Jehôwa rơp hồ toh khai tài bơh bèp khai neh bơkơ̆u.

⁶Dilah khai tòmbau tơnơ̆ mơ tŭ khai neh gơs jơnau ho pơgon hala tơnơ̆ mơ tŭ sơndồi khai neh sơrbac sơrbang ho pơgon dô jơnau gơtòmkơt di să tòm khai,

⁷mơ bau klau khai kơno bơh jơnau hơ̆ mơya ò đơs jơnau lơi mơ khai, gen ală jơnau ho pơgon khai dê hala ală jơnau srat să ho nền mơ khai neh kơt di să tòm khai pal prap gàr.

⁸Mơya dilah bau klau khai bơkơ̆u khai tòm tŭ bau klau khai neh kơno bơh jơnau hơ̆, gen bau klau khai neh tơnroh jơnau ho pơgon neh kơt di bau ùr khai hala jơnau ho pơgon sơrbac sơrbang neh kơt di bau ùr khai dê, mơ Yàng Jehôwa rơp hồ toh khai.

⁹Jơnau ho pơgon lơi hala jơnau ho lơi tòmkơt mơ dô nă cau ùr bơnrau hala dô nă cau ùr neh tòmlòi bau gen ală jơnau hơ̆ pal prap gàr.

¹⁰Dilah dô nă cau ùr ơm kis mơ bau klau khai dê mơ khai gơs jơnau ho pơgon tòmkơt mơ să tòm khai bơh dô jơnau srat să ho nền

¹¹mơ bau klau khai dê kơno git jơnau hơ̆ mơya ò đơs jơnau lơi mơ khai mơ ò gŏ bơkơ̆u khai, gen jơh ală jơnau ho pơgon hala jơnau ho tòmkơt mơ să tòm khai pal prap gàr.

¹²Mơya dilah bau klau khai dê sang lòi ală jơnau hơ̆ tòm tŭ khai kơno gơ gen ò gơs jơnau ho pơgon lơi hala jơnau srat să ho nền lơi neh lik bơh di bơr cau ùr hơ̆ rơp gam wơl.

¹³Bau klau khai dê rgơi dòp hala sang lòi jơnau ho pơgon lơi bau ùr neh ho hala jơnau srat să ho nền lơi nàng pơndang sang să tòm khai dê.

¹⁴Mơya dilah bau klau khai dê ò đơs jơnau lơi mơ khai bơh bơta hơ̆ bơh ngai do jơl ngai tơnơ̆ gen khai dòp git jơh ală jơnau ho pơgon bau ùr khai dê hala ală jơnau ho nền neh kơt mơ bau ùr khai dê. Khai dòp ală jơnau hơ̆ bơh bơta khai ò đơs dô jơnau lơi mơ bau ùr khai dê tòm tŭ khai kơno bơh ală jơnau hơ̆.

¹⁵Bulah behơ̆, dilah bau klau khai sang lòi ală jơnau ho hơ̆ tòm dô êt tŭ tơnơ̆ mơ khai neh kơno bơh ală jơnau hơ̆, gen khai gơs broă tòmpal kong bơta tồi glài bau ùr khai dê.”

¹⁶Hơ̆ la ală jơnau mơ Yàng Jehôwa neh sồr Môise gơwèt hơ ală bơta ring lơngai digùl dô nă cau klau mơ bau ùr khai dê, mơ digùl dô nă bèp mơ kòn ơruh khai dê gam ơm tòm hìu khai.