Read koho Khà Làng Bol 31 Bible Online

Khà Làng Bol 31 - koho bible

Khà Làng Bol 31

²“Sal tê tĕ di cau Midian ală cau Israel in. Tơnơ̆ mơ hơ̆ mê rơp geh tă cèng ơm bal mơ ồng pàng mê dê.”

³Behơ̆ Môise đơs mơ làng bol lah: “Rcang tĕ phan tòmlơh ală cau klau bol mê dê nàng tòmlơh mơ ală cau Midian, nàng lơh gơlik gơs bơta sal tê Yàng Jehôwa dê hơđang bol khai.

⁴Sồr dô rbô nă cau klau bơh di kòp jơi bơtiàn Israel nàng lik lòt tòmlơh.”

⁵Behơ̆ gơs jơt bàr rbô nă cau klau geh rcang nàng tòmlơh, dô rbô nă bơh di kòp jơi bơtiàn geh sồr bơh di ală mpồl hìu nhă Israel dê.

⁶Môise sồr bol khai lik lòt tòmlơh, dô rbô nă bơh di kòp jơi bơtiàn lòt jat Phineas kòn klau Eleajar cau gơnoar ơn phan duh khoai, khai cèng bal mơ khai ală phan ngui tòm hìu duh khoai mơ ală kơlwòk ngui nàng lơh tềl ai jơnau sồr.

⁷Bol khai tòmlơh mơ cau Midian jat be jơnau Yàng Jehôwa neh sồr Môise, mơ tơnchơt kòp nă cau klau.

⁸Digùl ală cau neh gơkòl tơnchơt gơs Ebi, Rekem, Jur, Hur mơ Reba la pram nă cau bơtau Midian dê. Bol khai kung ai đào tơnchơt Balaam kòn klau Beô dê.

⁹Ală cau Israel kup ală cau ùr, ală kơnòm, mơ tòmpìt ai jơh ală kơnrồ, belàt mơ ală phan mơna cau Midian dê.

¹⁰Bol khai chu jơh ală ƀòn dờng la tiah ală cau Midian neh ơm, mơ kung chu jơh ală sàl ơm bol khai dê.

¹¹Bol khai ai jơh ală phan tòmpìt geh, tơrgòm bal làng bol mơ ală phan poan jơng,

¹²mơ cèng ală cau mơ ală phan neh kup mơ tòmpìt tus hơ Môise mơ Eleajar cau gơnoar ơn phan duh khoai, mơ mpồl jơnum Israel dê di tiah sàl ơm bol khai dê tòm ală ƀlàng ring Môap di gah Jordan đah ne Jerikô.

¹³Môise, Eleajar cau gơnoar ơn phan duh khoai mơ jơh ală cau kwang at bồ mpồl jơnum dê lik lòt tìp mat mơ bol khai di tiah bơdìh sàl ơm.

¹⁴Môise gơhào gơjrañ di ală cau kwang at bồ mpồl ling, la ală cau at bồ dô rbô nă mơ at bồ dô rhiang nă cau ling neh rê wơl bơh di tiah tòmlơh.

¹⁵Khai lùp bol hơ̆ lah: “Bol mê neh lòi jơh ală cau ùr in kis ơ?

¹⁶Bol khai la ală cau neh lơh jat jơnau bơyai Balaam dê, mơ la ală cau neh lơh Israel in pơrlac sang Yàng Jehôwa tòm bơta neh gơlik gơs di tiah Pheor, tian gơs dô bơta pluh plàng neh tơnchơt làng bol Yàng Jehôwa dê.

¹⁷Tŭ do, tơnchơt tĕ jơh ală kòn klau. Mơ tơnchơt tĕ kòp nă cau ùr neh bic bal mơ cau klau,

¹⁸mơya lòi wơl bol mê in kòp nă kòn ùr òhềt bic mơ dô nă cau klau.

¹⁹Jơh ală bol mê la cau neh tơnchơt dô nă cau hala neh ƀư di dô nă cau chơt gen pal ơm đah bơdìh sàl ơm tòm poh ngai. Tòm ngai dơ̆ pe mơ ngai dơ̆ poh bol mê pal lơh goh să tòm he mơ ală cau mơ bol mê neh kup geh.

²⁰Kung pal lơh goh tĕ ală ồi ào bal mơ ală phan lơh gơs mơ gơltau, mơ sơnò be hala mơ sơnò belàt.”

²¹Gen Eleajar cau gơnoar ơn phan duh khoai đơs mơ ală cau ling neh lik lòt tòmlơh lah: “Do la jơnau sồr jat bơta boh lam mơ Yàng Jehôwa neh ai Môise in:

²²Màh, priă, kòng, lòs, thiek, trà

²³mơ phan lơi ndai mơ ồs ò sa tơnroh gen pal tơyơr gan ồs, gen gơ rơp geh goh. Mơya, gơ kung pal geh lơh goh kơnòm di dà lơh goh.

²⁴Di dê ngai dơ̆ poh gen pìh tĕ ală ồi ào bol mê dê gen bol mê rơp geh goh. Lồc behơ̆, bol mê rgơi geh mut tòm sàl ơm.”

²⁵Yàng Jehôwa đơs mơ Môise lah:

²⁶“Mê mơ Eleajar cau gơnoar ơn phan duh khoai mơ ală cau at bồ hìu nhă mpồl jơnum dê pal kòp khà jơh ală cau mơ phan poan jơng neh kup tòmpìt geh.

²⁷Tòmpà tĕ ală phan neh tòmpìt geh ală cau ling in neh geh pơnah tòm bơta tòmlơh mơ ală cau ndai tòm mpồl jơnum.

²⁸Bơh di ală cau ling neh tòmlơh tòm bơta tòmlơh, ơn is tĕ nàng ơn Yàng Jehôwa in dô nă tòm pram rhiang nă, bulah la ală kòn mơnus, ală kơnrồ, ală alàng, ală belàt hala ală be.

²⁹Ai tĕ dô pơnah nggùl bơh di ală phan ơn hơ̆ mơ ai Eleajar cau gơnoar ơn phan duh khoai in, lơh gơs pơnah ơn Yàng Jehôwa in.

³⁰Bơh di pơnah nggùl ai Israel in, sac rwah tĕ dô nơm tòm kòp pram jơt nơm, bulah la ală kòn mơnus, ală kơnrồ, ală alàng, ală belàt, ală be hala ală phan poan jơng ndai. Ai tĕ ală phan hơ̆ ală cau Lebi in la ală cau gơs broă tòm rcang gàr hìu duh khoai Yàng Jehôwa dê.”

³¹Behơ̆ Môise mơ Eleajar cau gơnoar ơn phan duh khoai neh lơh jat be jơnau sồr Yàng Jehôwa dê.

³²Ală phan gam wơl bơh di ală phan mơ ală cau ling neh tòmpìt geh la prau rhiang poh jơt pram rbô belàt,

³³poh jơt bàr rbô kơnrồ,

³⁴prau jơt dùl rbô alàng,

³⁵mơ pe jơt bàr rbô nă cau ùr òhềt tŭ lơi neh bic mơ dô nă cau klau.

³⁶Pơnah nggùl ală phan ai ală cau neh tòmlơh tòm bơta tòmlơh la: pe rhiang pe jơt poh rbô pram rhiang nơm belàt,

³⁷bơh di ntum khà hơ̆ gen ơn Yàng Jehôwa in prau rhiang poh jơt pram nơm;

³⁸pe jơt prau rbô nơm kơnrồ, bơh di ntum khà hơ̆ gen ơn Yàng Jehôwa in poh jơt bàr nơm;

³⁹pe jơt rbô mơ pram rhiang nơm alàng, bơh di ntum khà hơ̆ gen ơn Yàng Jehôwa in prau jơt dùl nơm;

⁴⁰jơt prau rbô nă cau, bơh di ntum khà hơ̆ gen ơn Yàng Jehôwa in pe jơt bàr nă.

⁴¹Môise jào phan ơn Eleajar cau gơnoar ơn phan duh khoai in lơh gơs pơnah Yàng Jehôwa dê, jat be jơnau Yàng Jehôwa neh sồr Môise.

⁴²Pơnah nggùl gơrê bal mơ ală cau Israel, la phan Môise neh ơn is bơh di ală phan ală cau ling tòmlơh dê.

⁴³Nggùl gơrê bal mơ mpồl jơnum la pe rhiang pe jơt poh rbô pram rhiang nơm belàt,

⁴⁴pe jơt prau rbô nơm kơnrồ,

⁴⁵pe jơt rbô mơ pram rhiang nơm alàng

⁴⁶mơ jơt prau rbô nă cau.

⁴⁷Bơh di pơnah nggùl ală cau Israel dê, Môise sac rwah dô nă tòm kòp pram jơt nă cau mơ phan poan jơng, jat jơnau Yàng Jehôwa neh sồr khai, mơ jào ală phan hơ̆ ală cau Lebi in, la ală cau gơs broă tòm rcang gàr Hìu Ing Duh Khoai Yàng Jehôwa in.

⁴⁸Gen ală cau kwang at bồ hơđang ală mpồl ling, la ală cau at bồ dô rbô nă, mơ ală cau kwang at bồ dô rhiang nă lòt tus hơ Môise.

⁴⁹Mơ đơs mơ khai lah: “Ală cau duh broă ồng dê neh kòp khà ală cau ling ơm tòm tiah gơnoar at bồ bol hi dê, mơ ò siơ̆u dô nă cau lơi.

⁵⁰Behơ̆ bol hi cèng tus lơh gơs phan ơn Yàng Jehôwa in ală phan mơ màh mơ kòp nă bol hi neh geh, hơ̆ la ală kòng dò di tơwòr tê, kòng dò di ko tê, ală sơmbiat ƀang kì, ală bơno blo di tồr mơ ală che rơnjài ngko nàng lơh gơs phan ơn tơwài glài să tòm bol hi in di đap Yàng Jehôwa.”

⁵¹Môise mơ Eleajar cau gơnoar ơn phan duh khoai dòp bơh di bol khai màh, mơ jơh ală phan bơka să.

⁵²Jơh ală màh bơh di ală cau kwang at bồ rbô nă cau mơ ală cau kwang at bồ ală rhiang nă cau mơ Môise mơ Eleajar cau gơnoar ơn phan duh khoai neh ơn lơh gơs phan ơn Yàng Jehôwa in kơr geh jơt prau rbô poh rhiang pram jơt sieklơ.

⁵³Kòp nă cau ling neh tòmpìt geh phan să tòm bol khai in.

⁵⁴Behơ̆ Môise mơ Eleajar cau gơnoar ơn phan duh khoai dòp màh bơh di ală cau kwang at bồ rbô nă mơ ală cau kwang at bồ rhiang nă, mơ cèng gơ tus tòm Sàl Tòm Mat lơh gơs phan kah kirsơnre ală cau Israel in di đap Yàng Jehôwa.