Read koho Khà Làng Bol 36 Bible Online

Khà Làng Bol 36 - koho bible

Khà Làng Bol 36

¹Ală cau at bồ hìu nhă mpồl hìu nhă Galaat kòn klau Makir dê, sau Manase dê, la ală cau bơh di mpồl hìu nhă kòn sau Jôsep dê, lòt tus mơ đơs di đap Môise mơ ală cau kwang at bồ, ală cau at bồ hìu nhă ală cau Israel dê.

²Bol khai đơs lah: “Tòm tŭ Yàng Jehôwa ai jơnau sồr cau tòm añ jê tă khà tòmpà ù tiah lơh gơs sre brê ală cau Israel in, Kơnràñ ai jơnau sồr ồng ai sre brê ală oh mi Jelôphehat bol hi dê ală kòn ùr khai in.

³Mơ tai, dilah bol khai tòmbau mơ ală cau klau bơh di ală jơi bơtiàn ndai tòm Israel gen sre brê bol khai dê rơp ai bơh di ală sre brê ồng pàng bol hi dê mơ bơtơl tai hơđang sre brê jơi bơtiàn mơ bol khai neh tòmbau. Mơ behơ̆ gen dô pơnah sre brê neh tă khà tòmpà bol hi in rơp gơkòl tă tơlik.

⁴Tòm tŭ tus Nam Hòn Chò ală cau Israel in gen sre brê bol khai dê rơp geh bơtơl hơđang sre brê jơi bơtiàn mơ bol khai neh tòmbau, mơ sre brê bol khai dê rơp gơkòl tă tơlik bơh dê sre brê jơi bơtiàn ală ồng pàng bol hi dê.”

⁵Gen jat jơnau gơnoar sồr Yàng Jehôwa dê Môise ai jơnau sồr do ală cau Israel in: “Jơnau jơi bơtiàn kòn sau Jôsep dê neh đơs la di ngan.

⁶Do la jơnau gơnoar sồr Yàng Jehôwa dê ală kòn ùr Jelôphehat in: ‘Bol khai rgơi bau mơ cau lơi bol khai kòñ bau, mơya mìng dilah bol khai tòmbau mơ cau tòm mpồl jơi bơtiàn ồng pàng bol khai dê.

⁷Ò gơs sre brê lơi tòm Israel rgơi tă bơh dê jơi bơtiàn do mơ bơtơl tòm jơi bơtiàn ne, bơh kòp nă cau Israel pal prap gàr ù tiah dòp geh bơh dê ồng pàng bol khai dê.

⁸Kòp nă cau ùr dòp geh ù tiah lơh gơs sre brê tòm jơi bơtiàn Israel lơi pal tòmbau mơ dô nă cau tòm jơi bơtiàn ồng pàng khai dê tồ kòp nă cau Israel rơp pơrdòn sre brê ală ồng pàng khai dê.

⁹Ò gơs sre brê lơi rgơi tă bơh jơi bơtiàn do mơ ai jơi bơtiàn ne in bơh kòp jơi bơtiàn Israel dê pal prap gàr ù tiah neh pơrdòn.’”

¹⁰Behơ̆ ală kòn ùr Jelôphehat neh lơh jat be jơnau Yàng Jehôwa neh sồr Môise.

¹¹Ală kòn ùr Jelôphehat la Mahlah, Tirjah, Hôglah, Milkah mơ Nôah neh tòmbau mơ ală kòn mi kòn oh đah bèp bol khai dê.

¹²Bol khai tòmbau tòm mpồl kòn sau Manase kòn klau Jôsep dê, mơ sre brê bol khai dê gam ơm tòm mpồl jơi bơtiàn bèp bol khai dê.

¹³Hơ̆ la ală jơnau sồr mơ ală bơta sồr lam mơ Yàng Jehôwa neh kơnòm di Môise mơ ai cau Israel in tòm ală ƀlàng ring Môap rò gah Jordan đah ne Jerikô.