Read koho Khà Làng Bol 5 Bible Online

Khà Làng Bol 5 - koho bible

Khà Làng Bol 5

¹Yàng Jehôwa đơs mơ Môise lah:

²“Sồr tĕ cau Israel pal tă tơlik bơh di sàl ơm cau lơi gơs sồt dun tòm gơltau hala gơlik bơta lơi bơh di să jan, hala ò geh goh jat bơta duh khoai tài bơh gơtup ƀồc chơt.

³Tă tơlik tĕ cau klau kung be cau ùr, ơn is tĕ bol khai di đah bơdìh sàl ơm tồ bol khai ò lơh ƀơ̆ ƀơl sàl ơm la tiah Añ ơm digùl bol khai.”

⁴Cau Israel lơh jat behơ̆; bol khai tă tơlik ală cau hơ̆ hơ đah bơdìh sàl ơm. Bol khai lơh jat tòm toh be jơnau Yàng Jehôwa neh bơto sồr Môise.

⁵Yàng Jehôwa đơs mơ Môise:

⁶“Đơs tĕ mơ cau Israel lah: Tòm tŭ dô nă cau klau hala cau ùr lơh bơta tìs mơ dô nă cau ndai bulah tòm bơta lơi, mơ lơh behơ̆ la ò dòn song mơ Yàng Jehôwa, gen cau hơ̆ gơkòl glài,

⁷mơ khai pal yal bơta tồi glài khai neh tìs. Khai pal tơm wơl wil tơl bơh bơta tìs khai dê, bơtơl tai dô pơnah pram tòm phan hơ̆ mơ jào jơh ală phan hơ̆ cau mơ khai neh lơh tìs in.

⁸Mơya dilah cau hơ̆ ò gam gơs gơp bơtiàn rềp mơ khai nàng dòp phan cau tơm bơh bơta tìs hơ̆, gen phan tơm wơl hơ̆ gơrê bal mơ Yàng Jehôwa, mơ pal ai phan hơ̆ cau gơnoar ơn phan duh khoai in, bal mơ belàt dam ngui lơh gơs phan ơn tơwài glài khai in.

⁹Jơh ală phan ơn sàng goh mơ ală cau Israel cèng tus hơ dô nă cau gơnoar ơn phan duh khoai gen rơp gơrê bal mơ cau gơnoar ơn phan duh khoai.

¹⁰Ală phan ơn sàng goh kòp nă cau ơn la bơh phan tòm khai dê, mơya phan khai ai cau gơnoar ơn phan duh khoai in rơp gơrê bal mơ cau gơnoar ơn phan duh khoai.”

¹¹Lồc behơ̆, Yàng Jehôwa đơs mơ Môise:

¹²“Yal tĕ mơ cau Israel mơ đơs lah: ‘Dilah bau ùr dô nă cau klau lơi lơh tìs mơ ò dòn song mơ bau klau khai dê

¹³bơh neh bic mơ dô nă cau klau ndai, mơ bơta hơ̆ neh pồn ndơp bơh di bau klau khai dê mơ bơta lơh tìs khai dê ò gơs cau git (tài bơh ò gơs cau lơh cơng tòmdră mơ khai mơ khai ò gơkòl kup tòm tŭ tìs glài hơ̆),

¹⁴mơ dilah bau klau khai dê gơs nùs ƀoah pơrñat mơ khai pin bau ùr khai dê mơ bau ùr khai neh gơlik gơs ò goh, hala dilah khai ƀoah pơrñat mơ pin bau ùr khai bulah bau ùr khai ò gơs ƀơ̆ ƀơl,

¹⁵gen khai pal lam bau ùr khai tus hơ cau gơnoar ơn phan duh khoai. Khai kung pal cèng dô nơm phan ơn duh khoai la dô pơnah jơt epha kơmbuh phe kòi màc nàng ơn ala bau ùr khai in. Khai ò di tuh mơñà hơđang phan ơn hơ̆ hala ơn kơmbuh kơlhô hơđang gơ, tài bơh hơ̆ la dô nơm phan ơn mơ kòi mbo bơh bơta ƀoah pơrñat, dô nơm phan ơn tơngkah wơl nàng lơh cau in kơlôi kah bơh bơta tìs glài.

¹⁶Cau gơnoar ơn phan duh khoai pal lam khai tus ntào di đap Yàng Jehôwa.

¹⁷Gen cau gơnoar ơn phan duh khoai rơp ai dà sàng bơh tòm dô nơm yang mơ ù kơnàng mơ ơn dô êt thul bơh di mơnàng hìu duh khoai tòm dà hơ̆.

¹⁸Tơnơ̆ mơ tŭ cau gơnoar ơn phan duh khoai neh ơn cau ùr hơ̆ ntào di đap Yàng Jehôwa rau, khai rơp hồ sŏ cau ùr hơ̆ dê mơ ơn tòm tê cau ùr hơ̆ phan ơn duh khoai tơngkah wơl la phan ơn mơ kòi mbo bơh bơta ƀoah pơrñat, tòm tŭ să tòm cau gơnoar ơn phan duh khoai at dà bơtang cèng tus bơta srat sơntơm.

¹⁹Gen cau gơnoar ơn phan duh khoai rơp sồr cau ùr hơ̆ srat să ho nền, mơ khai đơs mơ cau ùr hơ̆ lah: “Dilah ò gơs cau klau ndai bic mơ ai, mơ ai ò gŏ lòt tìs nrah mơ gơlik ò goh tòm tŭ gam bau mơ bau klau ai dê, dan dà do la dà cèng tus bơta srat sơntơm rơp ò lơh iơh di ai.

²⁰Mơya dilah ai neh lơh tìs tòm tŭ gam bau mơ bau klau ai dê mơ ai neh lơh să tòm ai dê gơlik gơs ò goh bơh neh bic mơ dô nă cau klau ò di la bau klau ai dê,”

²¹(lòi cau gơnoar hwơr hơ̆ kup cau ùr hơ̆ pal srat sơntơm să) mơ đơs mơ cau ùr hơ̆ lah: “Dan Yàng Jehôwa lơh làng bol ai dê srat sơntơm mơ lơh nền glài ai, Yàng Jehôwa lơh hìu kòn ai gơrung ồm mơ kơndul ai dê as pŭ.

²²Dan dà do la dà cèng tus dô bơta srat sơntơm rơp mut tòm să jan ai dê tian gơs kơndul ai dê gơ as pŭ mơ bơnô ai dê gơ ồm.” Gen cau ùr pal đơs lah: “Amen. Amen!”

²³Cau gơnoar ơn phan duh khoai pal cih ală jơnau srat sơntơm tòm dô nơm sră pồt lồc behơ̆ rào ală jơnau hơ̆ tòm dà bơtang.

²⁴Khai rơp sồr cau ùr hơ̆ hùc dà bơtang cèng tus bơta srat sơntơm, mơ dà hơ̆ rơp mut tòm cau ùr hơ̆ mơ lơh gơlik gơs bơta jê sràt bơtang.

²⁵Cau gơnoar ơn phan duh khoai pal tă bơh di tê cau ùr hơ̆ dê phan ơn mơ kòi mbo bơh bơta ƀoah pơrñat, tơyài gơ di đap Yàng Jehôwa mơ cèng tus di cơnòng duh khoai.

²⁶Lồc behơ̆ cau gơnoar ơn phan duh khoai pal ai dô sơmbat phan ơn mơ kòi mbo hơ̆ lơh gơs phan ơn kah lòi yau mơ chu gơ hơđang cơnòng duh khoai; tơnơ̆ hơ̆ gen khai pal sồr cau ùr hơ̆ hùc dà hơ̆.

²⁷Dilah cau ùr hơ̆ neh lơh să tòm khai gơlik gơs ò goh mơ neh ò ơm song mơ bau klau khai dê, gen tòm tŭ khai pal hùc dà cèng tus bơta srat sơntơm, dà hơ̆ gơmut tòm khai mơ lơh khai in jê sồt sràt bơtang; kơndul khai gơ rơp as pŭ mơ bơnô khai dê gơlik ồm. Mơ khai rơp gơkòl srat sơntơm digùl làng bol khai dê.

²⁸Bulah behơ̆, dilah cau ùr hơ̆ ò lơh să tòm khai in gơlik ƀơ̆ ƀơl mơ ò gơkòl tòm bơta ò goh, khai rơp geh kòp la ò tìs glài mơ rgơi gơs kòn.

²⁹Gen, hơ̆ la bơta boh lam bơh bơta ƀoah pơrñat tòm tŭ dô nă cau ùr lơh tìs mơ lơh să tòm khai gơlik gơs ƀơ̆ ƀơl tòm tŭ gam bau mơ bau klau khai dê,

³⁰hala tòm tŭ dô nă cau klau gơs nùs ƀoah pơrñat tài bơh khai pin di bau ùr khai dê. Cau gơnoar ơn phan duh khoai pal sồr cau ùr hơ̆ ntào di đap Yàng Jehôwa mơ pal lơh di khai tòm toh jat be jơh ală bơta boh lam do.

³¹Bau klau rơp geh kòp la ò tìs bơta lơi, mơya cau ùr rơp kong bơta lơh glài dilah khai tìs glài.’”