Read koho Khà Làng Bol 6 Bible Online

Khà Làng Bol 6 - koho bible

Khà Làng Bol 6

¹Yàng Jehôwa đơs mơ Môise lah:

²“Yal tĕ mơ ală cau Israel in mơ đơs mơ bol khai lah: ‘Dilah dô nă cau klau hala dô nă cau ùr kòñ srat să ho nền dô bơta krơi is mơ òs gơs, hơ̆ la bơta srat să ho nền ơn is Yàng Jehôwa in lơh gơs dô nă cau Nasire,

³gen khai pal wèr ñô tơrnòm ño mơ ală phan ñô gơs kañ, mơ ò di ñô dà sràt lơh gơs bơh tơrnòm ño hala lơh gơs bơh phan ñô ndai gơs kañ. Khai ò di ñô dà plai ño hala sa ală plai ño dum hala ro.

⁴Nđò jŏ khai gam la cau Nasire gen khai ò di sa phan lơi gơlik bơh tòm ño, bulah la ală gar hala ală ngkàr gơ dê.

⁵Tòm jơh dô pah tŭ tơngai khai neh srat să ho nền ơn is, pềs koah ò geh ơn di hơđang bồ khai. Khai pal gơs sàng goh jơl tus di pah tơngai ơn is Yàng Jehôwa in neh rlau; khai pal lòi sŏ hơđang bồ khai gơhòn jòng.

⁶Tòm jơh dô pah tơngai khai ơn is Yàng Jehôwa in, khai ò di lòt tus rềp ƀồc chơt.

⁷Bulah cau tòm hìu nhă khai dê kung be bèp hala mè hala oh mi ruh lŏ khai dê chơt, khai ò di lơh să tòm khai in gơlik gơs ƀơ̆ ƀơl jat bơta sồr lam duh khoai tài bơh bol hơ̆, tài bơh tềl bơta ơn is Yàng Tom Trồ in ơm hơđang bồ khai.

⁸Tòm jơh dô pah tơngai khai ơm is gen khai neh geh ơn is sàng goh Yàng Jehôwa in.

⁹Dilah gơs cau lơi nisơna chơt di đap mat khai gen bơta hơ̆ lơh ƀơ̆ ƀơl sŏ khai neh ơn is sàng goh, khai pal koah bồ khai dê tòm ngai lơh goh khai in, hơ̆ la ngai dơ̆ poh.

¹⁰Gen tòm ngai dơ̆ phàm khai pal cèng dô yô ntòp hala bàr nơm ntòp hui gam dềt tus hơ cau gơnoar ơn phan duh khoai di mpồng Sàl Tòm Mat.

¹¹Cau gơnoar ơn phan duh khoai rơp ơn dô nơm lơh gơs phan ơn tơwài glài mơ dô nơm lơh gơs phan ơn chu pơrguc nàng tơwài glài khai in, tài bơh khai neh tìs glài bơh neh ơm di đap ƀồc chơt. Kung tòm ngai hơ̆ khai pal ơn is sàng goh bồ khai dê.

¹²Khai pal ơn is sàng goh să tòm khai dê Yàng Jehôwa in tòm pah tơngai ơn is mơ pal cèng dô nơm belàt dam dô nam nàng lơh gơs phan ơn tơwài bơta tìs glài. Ală ngai lài mơ hơ̆ gen ò gŏ kòp, tài bơh khai neh gơlik gơs ƀơ̆ ƀơl tòm pah tơngai khai geh ơn is.

¹³Mơ tai, do la bơta boh lam cau Nasire in tòm tŭ pah tơngai ơn is neh tơl. Khai pal geh lam tus hơ tiah mpồng mut Sàl Tòm Mat.

¹⁴Tềng hơ̆ khai rơp ơn ală phan ơn khai dê Yàng Jehôwa in: dô nơm belàt dam dô nam ò tềl sồt lơh gơs phan ơn chu pơrguc, dô nơm belàt dam ò tềl sồt lơh gơs phan ơn tơwài glài, dô nơm belàt dam lơh gơs phan ơn bơta ring lơngai dê,

¹⁵bal mơ ală phan ơn mơ kòi mbo mơ ală phan ơn pơdơng bol khai dê, mơ dô bài piang lă ò gơs kañ, ală ƀañ lơh mơ kơmbuh phe rhền bơcă mơ mơñà, mơ ƀañ ceh mơ mơñà.

¹⁶Cau gơnoar ơn phan duh khoai pal ơn ală phan ơn hơ̆ di đap Yàng Jehôwa mơ ơn phan duh khoai tơwài glài mơ phan ơn chu pơrguc.

¹⁷Khai pal ơn bài piang lă ò gơs kañ mơ ơn belàt dam lơh gơs phan ơn bơta ring lơngai Yàng Jehôwa in, bal mơ phan ơn mơ kòi mbo mơ phan ơn pơdơng.

¹⁸Gen di di tiah mut tòm Sàl Tòm Mat, cau Nasire pal koah sŏ mơ khai neh ơn is sàng goh. Khai pal ai sŏ mơ ơn gơtòm ồs hơđơm phan ơn duh khoai bơta ring lơngai dê.

¹⁹Tơnơ̆ mơ tŭ cau Nasire neh koah sŏ bơh bơta ơn is sàng goh khai dê rau, cau gơnoar ơn phan duh khoai pal ơn tòm tê cau Nasire pơnì belàt dam neh gơm rau, dô nơm piang lă mơ dô nơm ƀañ ceh bơh tòm bài, piang lă mơ ƀañ nsồp ò gơs kañ.

²⁰Gen cau gơnoar ơn phan duh khoai rơp tơyài ală phan hơ̆ di đap Yàng Jehôwa lơh gơs phan ơn tơyài; gơ la sàng goh mơ gơrê bal mơ cau gơnoar ơn phan duh khoai, bal mơ ntơh neh tơyài mơ bơnô neh ơn rau. Tơnơ̆ mơ hơ̆, cau Nasire geh ñô tơrnòm.

²¹Hơ̆ la bơta boh lam bơh cau Nasire neh srat să ho nền ơn phan duh khoai khai dê Yàng Jehôwa in tòm toh jat be bơta khai neh ho, gơbơtơl tai tòm ală phan ndai mơ khai rgơi gơs. Khai pal lơh gơlik gơs wil tơl jơnau srat să ho nền mơ khai neh lơh, jat be bơta boh lam cau Nasire dê.’”

²²Yàng Jehôwa đơs mơ Môise:

²³“Đơs tĕ mơ Arôn mơ ală kòn klau khai dê lah: ‘Do la gùng mơ bol mê pal jat nàng ai lơngai ală cau Israel in. Đơs tĕ mơ bol khai:

²⁴Dan Yàng Jehôwa ai lơngai mê in mơ sền gàr mê;

²⁵Dan Yàng Jehôwa sòl pơnđàng mat Kơnràñ dê hơđang mê mơ kòñ nđàc di mê;

²⁶Dan Yàng Jehôwa wèt mat Kơnràñ dê hơ mê mơ ai mê in bơta lơngap lơngai.’

²⁷Behơ̆ bol khai rơp ơn sơnđan Añ hơđang ală cau Israel, mơ Añ rơp ai lơngai bol khai in.”