Read koho Mice 1 Bible Online

Mice 1 - koho bible

Mice 1

¹Jơnau Yàng Jehôwa neh tus mơ Mice, cau Môreset, tòm rài at bồ Jôtham, Aca, mơ Ejekia, la ală cau bơtau Juda dê, hơ̆ la bơta gơtơnggŏ khai neh gŏ bơh Samari mơ Jerusalem.

²“Ơ jơh ală làng bol, iat tĕ! Ơ plai ù mơ jơh ală cau ơm tòm plai ù, ơm iat tĕ! Lòi tĕ Jehôwa Yàng Tom Trồ lơh cơng tòmdră mơ bol mê, Yàng Jehôwa bơh Hìu Duh Khoai Sàng Goh Kơnràñ dê.

³Sền ne! Yàng Jehôwa lòt tus bơh di tiah ơm Kơnràñ dê; Kơnràñ rơp mù mơ jă hơđang ală tiah jơnhoa plai ù dê.

⁴Gen jơh ală mơnơm lề lac hơđơm Kơnràñ, mơ ală thòng rơp bơcah lề, be jrềng ơm rềp ồs, be dà hòr mù bơh kơh mơnơm.

⁵Jơh ală bơta hơ̆ tài bơh bơta tìs glài Jakôp dê, mơ tài bơh ală bơta tồi glài hìu Israel dê. Bơta tìs glài Jakôp dê la ñchi taih? Hơ̆ ò di la Samari ò ơ? Tiah jơnhoa hơđang Juda dê la ñchi taih? Hơ̆ ò di la Jerusalem ò ơ?

⁶Behơ̆ tàng Añ rơp lơh Samari in gơlik gơs dô gơnru tơrlah tơrlơm tòm ƀlàng sre, dô bă tiah nàng tam ală suơn ño. Añ rơp tơndùh ală pơnai lŭ khai dê tòm thòng, mơ lòi ală mơnàng gơ dê ơm kuh.

⁷Jơh ală rùp ràk khai dê rơp kong pòng bơcah rpot rpet, jơh ală jền tơngai khai dê rơp kòl chu tòm ồs; mơ Añ rơp tơnroh jơh ală rùp ràk khai dê; bơh khai pơjum tơrgòm jền tơngai ală cau ùr dri dê, mơ jền tơngai ală cau ùr dri dê bol khai rơp geh ngui tai.”

⁸Tài bơh bơta hơ̆ añ rơp ñìm rac mơ pơt wòl; Añ rơp lòt jơng gòi mơ ơm să kuh. Añ rơp ñìm rac kung be so brê, mơ pơt wòl be sềm rgut.

⁹Bơh tềl sồt khai dê ò rgơi sơmbòi; gơ rơp sa rề tus di Juda. Gơ neh tus di mpồng ƀòn dờng làng bol añ jê, tus hơ Jerusalem.

¹⁰Bañ yal tơnggit bơta hơ̆ tòm Gat; bañ ñìm rac dô êt lơi. Tòm Bet Leaphra, pơrlac să mê dê tòm thul.

¹¹Ơ bol mê la cau ơm tòm Saphir, ơm să kuh mơ lòt gan tĕ tòm bơta ƀàssìl ƀàsso, ală cau ơm tòm Jaanan rơp ò lik lòt. Bet Ejel ơm ñìm rac, mơ bơta dong tò gơ dê neh tă bơh di bol mê.

¹²Ală cau ơm tòm Marôt duh nùs kơp gơn bơta lơngai niam, tài bơh bơta rung rài neh mù bơh Yàng Jehôwa, neh tus di mpồng ƀòn dờng Jerusalem dê.

¹³Ơ ală cau ơm tòm Laki, kơt tĕ ală ơseh di rơndeh; hơ̆ la bơta sơntòm tồi glài dê gơwèt mơ kòn ùr Siôn, bơh tòm bol mê neh bàn bơta tìs glài Israel dê.

¹⁴Gen tàng, bol mê rơp ai phan tơngac Môreset Gat in. Ƀòn dờng Akjip rơp pơrlồm ală bơtau Israel dê.

¹⁵Añ rơp cèng tai dô nă cau tòmlơh pha lin hơđang bol mê la ală cau ơm tòm Maresa. Bơta gơklŏ Israel dê rơp tus hơ Adulam.

¹⁶Koah bồ tĕ mơ ñìm rac ròc, bơh ală kòn sau mơ bol mê kòñ gơboh; lơh tĕ bồ bol mê lòl kung be grơt, bol khai rơp lik lòt bơh bol mê, mơ kong kup cèng pơrdô hơ tiah ngài!