Read koho Mice 4 Bible Online

Mice 4 - koho bible

Mice 4

¹Tòm ală ngai rơp tus, mơnơm hìu duh khoai Yàng Jehôwa dê rơp geh bơt bơtào hơđang tiah jơnhoa rlau jơh ală mơnơm dê, gơ rơp geh yò tơngguh hơđang ală dòr, mơ ală làng bol rơp lòt tus tềng hơ̆ kung be dà hòr.

²Oă lơgar rơp tus mơ đơs lah: “Tus tĕ, bol he guh tĕ hơ mơnơm Yàng Jehôwa dê, tus hơ hìu Yàng Tom Trồ Jakôp dê. Kơnràñ rơp bơto bol he ală gùng dà Kơnràñ dê, nàng bol he lòt tòm ală gùng Kơnràñ dê.” Jơnau nting sồr rơp lik bơh Siôn, mơ jơnau đơs Yàng Jehôwa dê tus bơh Jerusalem.

³Kơnràñ rơp cahrña digùl oă làng bol, mơ rơp cahrña pơnring digùl ală lơgar pràn bơh tiah ngài. Bol khai rơp ai đào tiar gơs sề ngal, ai tà tiar gơs mơ̆. Lơgar do ò tă đào tòmdră mơ lơgar ndai, mơ kung ò gam bơto bơta lơh kơlìn tai.

⁴Mơya bol khai rơp nggui hơđơm tòm ño bol khai dê mơ hơđơm chi ƀal bol khai dê, mơ ò gơs cau lơi lơh bol khai in rngòt rngơt, bơh Yàng Jehôwa Gơnap Gơnoar Dờng Làm Jơh neh đơs bơta hơ̆ bơh bơr Kơnràñ dê.

⁵Bơh jơh ală làng bol rơp lòt, kòp nă tòm sơnđan ală yàng bol khai dê; Mơya bol he rơp cơnđòa lòt tòm sơnđan Yàng Jehôwa la Yàng Tom Trồ bol he dê jơl sùm sùm ò lồi.

⁶Yàng Jehôwa đơs lah: “Tòm ngai hơ̆, Añ rơp pơjum wơl cau kwet gơlte; Añ rơp tơrgòm wơl ală cau neh kong kup cèng hơ tiah ngài, mơ ală cau mơ Añ neh lơh jê sồt moat jrùng.

⁷Añ rơp lơh cau kwet gơlte in gơlik gơs làng bol gam wơl, lơh ală cau neh kong kup cèng gơlik gơs dô nơm lơgar pràn. Yàng Jehôwa rơp at bồ bol khai tòm mơnơm Siôn, bơh tŭ do jơl tus sùm sùm.

⁸Ai đah mơ mê, ơ theng jòng kơp gàr mpồl dê, ơ dòr Kòn ùr Siôn dê; gơ rơp tus hơ mê; gơnoar at bồ yau òr rơp geh pồ bơtào wơl, gơnoar at bồ hơđang rlau jơh rơp tus hơ Kòn ùr Jerusalem dê.”

⁹Tŭ do ñchi bơh tài mê driau dờng behơ̆ taih? Mê ngan ò gơs cau bơtau at bồ ơ? Ală cau bơyai broă mê dê neh chơt roh, bơta jê sồt gơrwàng mê kung be cau ùr jê deh sơl ơ?

¹⁰Ơ kòn ùr Siôn, bơta jê sồt mơ rơnđơh kung be cau ùr jê deh, bơh tŭ do mê rơp lik bơh ƀòn dờng mơ bơtào sàl ơm tòm ƀlàng. Mê rơp lòt tus hơ Babilôn; Tềng hơ̆ mê rơp geh dong klàs. Tềng hơ̆ Yàng Jehôwa rơp dong tơwài mê lik klàs bơh di tê ală cau sò tơm mê dê.

¹¹Mơya tŭ do gơs oă lơgar pơjum bal tòmdră mơ mê. Bol khai đơs lah: “Lòi tĕ khai gơkòl ƀơ̆ ƀơl, mơ lòi tĕ gar mat bol he sền trol di Siôn!

¹²Mơya bol khai ò git bơta kơlôi sơnơng Yàng Jehôwa dê, bol khai ò wă wơng bơta rơndap Kơnràñ dê, bơh Kơnràñ neh tơrgòm bol khai kung be ală cap kòi cèng tòm làn pơrjòt kòi.

¹³Ơ Kòn ùr Siôn, guh tĕ mơ pơrjòt tĕ! Bơh Añ rơp lơh ai in ală ngke mơ lòs, mơ ală nđias jơng mơ kòng; mơ ai rơp pòng bơcah lề lac oă làng bol. Ai rơp ơn phan bol khai tòmpìt geh Yàng Jehôwa in, ơn bơta pas sơm bol khai dê Yàng Jehôwa in la Yàng jơh dunnia dê.”