Read koho Mice 6 Bible Online

Mice 6 - koho bible

Mice 6

¹Iat tĕ jơnau Yàng Jehôwa đơs: “Guh tĕ, tò să mê di đap ală mơnơm; mơ lòi ală dòr kơno sap đơs mê dê.

²Ơ ală mơnơm, iat tĕ jơnau tòm pơndang Yàng Jehôwa dê; Iat tĕ, ơ ală mơnàng gam sùm sùm plai ù dê, Bơh Yàng Jehôwa tòm pơndang mơ làng bol Kơnràñ dê, Kơnràñ rơp tòmdră mơ Israel.

³Ơ làng bol Añ jê, ñchi Añ neh lơh bol mê in taih? Ñchi bơta Añ neh lơh bòl glar bol mê in taih? Ho wơl tĕ Añ in!

⁴Añ neh cèng bol mê lik bơh lơgar Ejiptơ, mơ neh tơwài bol mê bơh di hìu ơm lơh dĭ; mơ Añ neh sồr Môise, Arôn mơ Miriam lòt di đap bol mê.

⁵Ơ làng bol Añ jê, kah wơl tĕ ală bơta Balak bơtau Môap bơtào kai gơrmơ̆i; mơ ñchi jơnau Balaam kòn klau Beô neh ho wơl khai, mơ ñchi bơta neh gơlik gơs tòm gùng bơh Sitim tus hơ Gilgal, tồ bol mê in git broă lơh dong klàs Yàng Jehôwa dê.”

⁶Añ rơp cèng phan lơi tus di đap Yàng Jehôwa mơ cùn khoai di đap Yàng Tom Trồ hơđang jơnhoa taih? Añ rơp tus di đap Kơnràñ bal mơ ală phan ơn chu pơrguc, bal mơ ală kơnrồ kòn dô nam sơl ơ?

⁷Yàng Jehôwa rơp niam nùs di rbô rhiang belàt dam hala di jơt rbô hiòng mơñà sơl ơ? Añ rơp ơn kòn tơnhoa añ jê bơh bơta tìs glài añ jê, mơ bơta kis kòn sau añ tài bơh tồi glài hwềng soàn añ jê sơl ơ?

⁸Ơ kòn mơnus, Kơnràñ neh yal mê in bơta lơi la niam; Bơta mơ Yàng Jehôwa jòi lùp mê. Hơ̆ ò di la lơh bơta song ring, gơboh bơta lơbơn niam, mơ cơnđoà lòt dô bă pơndêt să mơ Yàng Tom Trồ ò ơ?

⁹Ơm iat tĕ! Jơnau Yàng Jehôwa hòi driau tòm ƀòn dờng, hơ̆ la cau jak chài pal duh rngòt dê sơnđan Kơnràñ. Ơ jơi bơtiàn mơ mpồl jơnum ơm tòm ƀòn dờng!

¹⁰Mbe Añ rgơi hŭi đam jàr iơh bơsak tòm hìu cau iơh bơsak, mơ phan kơr sơnoa ò tòm toh pal srat sơntơm sơl ơ?

¹¹Añ rgơi toh glài cau ngui kơr ma blac bal mơ dô kơldung ơn ală phan kơr ò duh rngòt sơl ơ?

¹²Ală cau pas gơs bol mê dê bềng bơta jàñ bơsak; làng bol bol mê dê la ală cau đơs blac, lơmpiat blac pơrlồm tòm ală bơr bol khai dê.

¹³Behơ̆ tàng Añ neh rơp sơntòm tơnroh mê, lơh mê in kòl tơnroh tài bơh ală tồi glài mê dê.

¹⁴Mê rơp sa mơya ò geh hòm; klung mê dê rơp gam jơgloh tòm să mê. Mê rơp prap lòi phan mơna mơya ò geh klàs, bơh phan lơi mê prap lòi gen Añ rơp jào gơ đào in.

¹⁵Mê rơp sih gar mơya ò geh toès, mê rơp pat ôlibe mơya ò geh bong mơñà să tòm mê in, mê rơp jă plai ño mơya ò geh ñô tơrnòm.

¹⁶Mê neh prap gàr ală bơta sồr lam Ômri dê, mơ jơh ală broă lơh hìu Ahap dê, mê neh lòt jat ală bơta bơyai bol khai dê. Gen tàng Añ rơp lơh mê in kòl sang srau gòi, làng bol mê tòm bơta bơtat bơtròh; Behơ̆ mê rơp kong àñ bơta sền òsơp làng bol Añ jê.