Read koho Habakuk 1 Bible Online

Habakuk 1 - koho bible

Habakuk 1

¹Do la jơnau yal tơnggit mơ cau gơnoar hwơr Habakuk neh sền gŏ.

²Ơ Yàng Jehôwa! Nđò jŏ añ rơp dan Yàng dong kòl, mơ Kơnràñ rơp ò iat taih? Hala nđò jŏ tai añ hòi dan mơ Yàng bơh bơta “Jàñ bơsak!” mơ Kơnràñ ò dong tă taih?

³Ñchi Kơnràñ lòi añ in sền gŏ bơta lơh tìs, mơ lòi añ sền di bơta bòl glar tai taih? Bơta phà tơnroh mơ bơta rhung rhang ơm di đap añ; bơta tòmpìt tòmhà mơ tòm pơndang bal gơtơngguh.

⁴Tài behơ̆, bơta boh lam roh gơnoar, bơta song ring ò tŭ lơi lơh jat. Cau iơh bơsak gơrwàng gùt dar cau song ring, gen tàng bơta cahrña rơp tus hơđang cau lơh bơta rkwet rkwe.

⁵“Rmê tĕ di ală lơgar mơ sền! Ai lơh krơi tĕ! Mơp dơl! Bơh Añ rơp lơh dô bơta tòm ală ngai mê dê, bulah mê ò dòn ală bơta neh yal mê in.

⁶Bơh Añ rơp chồl cau Babilôn, la làng bol iơh bơsak mơ rhung rhang, bol khai lòt làm jơh plai ù, tòmpìt ai ală tiah ơm ò gơrê bal mơ bol khai.

⁷Bol khai la dô làng bol pal rngòt mơ cù kìr; bol khai bơtào is bơta song ring mơ dờng màng să tòm bol khai dê.

⁸Ală ơseh bol khai dê ntoat mhar rlau mơ klìu sơmañ, rhung rhang rlau mơ so rhau tòm trồ mang. Mpồl ling hào ơseh bol khai dê ràn tus, ală cau ling hào ơseh bol khai dê tus bơh di tiah ngài; bol khai par kung be klàng bung srà mhar nàng sa loan.

⁹Jơh ală bol khai tus nàng lơh bơta iơh bơsak. Ală mpồl bol khai lòt hơđap kung be càl tòm ƀlàng bràs, mơ pơjum tơrgòm ală cau ơm jàm kung be bràs.

¹⁰Bol khai dơñŏ tơnhial ală cau bơtau, mơ bơrsèl tơnhial ală cau kwang at bồ, bol khai dơñŏ di jơh ală ƀòn dờng kơ̆ cê; bol khai bơt tơngguh ù mơ tòmpìt ai ală ƀòn dờng hơ̆.

¹¹Lồc behơ̆ bol khai lòt gan mhar kung be càl; bol khai lơh tìs glài mơ gơlik gơs tồi glài, bơta pràn tòm bol khai dê la yàng bol khai dê.”

¹²Kơnràñ ò di neh gơs bơh rài yau la gam sùm sùm ò lồi sơl ơ? Ơ Jehôwa Yàng Tom Trồ añ jê, Bơtau sàng goh añ jê? Kơnràñ rơp ò chơt. Ơ Yàng Jehôwa, Kơnràñ neh lơh nền bol khai in nàng cahrña; Ơ Pơnai Lŭ Klềr añ jê! Kơnràñ neh bơtào bol khai nàng lơh glài.

¹³Mat Yàng sàng goh ngan tian gơs ò rgơi sền di bơta iơh bơsak, Kơnràñ ò rgơi sền di bơta lơh tìs; Ñchi bơh tài Kơnràñ ơm mŏ mŏ taih? Ñchi bơh tài Kơnràñ ơm mŏ mŏ tòm tŭ cau iơh bơsak sa loan ală cau song ring rlau mơ bol khai taih?

¹⁴Kơnràñ neh lơh làng bol gơlik gơs kung be ka tòm dàlềng, mơ kung be ală jơi phan kis tòm dàlềng ò gơs cau at bồ taih?

¹⁵Cau sò tơm ngui ală gai lòs kơlnĕ cèng jơh bol khai, khai kup bol khai tòm bơtơng khai dê, khai tơrgòm bol khai tòm bơtơng hwài khai dê; behơ̆ tàng khai hòn chò mơ hừh hơh.

¹⁶Gen tàng khai ơn phan ơn duh khoai bơtơng khai in, mơ chu kơlhô bơtơng hwài khai in, tài bơh khai kơnòm di bơtơng khai dê mơ geh kis pas sơm ryŭ ryơm mơ chò hòp sa phan sa bơkah kas màng.

¹⁷Mbe khai prap gàr sùm bơtơng gòi khai dê, mơ kư̆ tơnroh ală lơgar ò nđàc sơngit sơl ơ?