Read koho Sôphôni 2 Bible Online

Sôphôni 2 - koho bible

Sôphôni 2

¹Ơ làng bol ò git ƀàssìl ƀàsso, pơjum bal tĕ, pơjum bal tĕ,

²lài mơ tŭ bol mê kong sang sơrbì tiah ngài kung be nsiap, lài mơ tŭ bơta gơjrañ gơhào khuh Yàng Jehôwa dê tus hơđang bol mê, lài mơ tŭ ngai gơjrañ dờng Yàng Jehôwa dê tus hơđang bol mê.

³Ơ ală bol mê la cau pơndêt să tòm ù, la cau lơh jat gơnoar sồr lam Kơnràñ dê; Jòi jat tĕ Yàng Jehôwa, Jòi jat tĕ bơta song ring, jòi jat bơta tơnliah să; digơlan bol mê rơp geh pồn ndơp tòm ngai gơjrañ dờng Yàng Jehôwa dê.

⁴Gaja rơp kong sang lòi srau gòi, mơ Askalôn rơp gơlik gơs tiah ngềt ngơt. Làng bol Asdôt rơp gơkòl bơtrơh tơlik tòm trồ ngai, mơ Ekrôn rơp kong dus.

⁵Bòl glar ngan làng bol in ơm di gah dàlềng, hơ̆ la làng bol Keret! Ơ Kanaan, ù tiah làng bol Philistin; Gơs jơnau Yàng Jehôwa tòmdră mơ mê, “mơ Añ rơp tơnroh mê jơl tus ò gam dô nă cau lơi.”

⁶Ai mê, ơ ù tiah di gah dàlềng rơp gơlik gơs ƀlàng ñhơt ală cau ê belàt mơ ală wàng mpồl belàt dê.

⁷Tiah di gah dàlềng rơp gơrê bal mơ ală cau gam wơl hìu Juda dê; tềng hơ̆ bol khai ê mpồl belàt, tòm trồ mang bol khai rơp bic rlô tòm ală hìu Askalôn dê. Bơh Jehôwa Yàng Tom Trồ bol khai dê rơp kơlôi rcang bol khai in, Kơnràñ rơp cèng brê wơl ală cau kong pơrdô bol khai dê.

⁸Añ neh kơno ală jơnau dơñŏ tơnhial Môap dê mơ ală jơnau lah sơrpah Ammôn dê, bol khai dơñŏ tơnhial làng bol Añ jê mơ jòng să bơh bơta tòmpìt ai lơgar làng bol Añ jê.

⁹Behơ̆ tàng, Yàng Jehôwa Gơnap Gơnoar Dờng Làm Jơh, la Yàng Tom Trồ Israel dê đơs lah: “Di ngan kung be Añ kis, Môap rơp gơlik be Sôdôm, mơ cau Ammôn rơp gơlik be Gômôrơ, gơ rơp gơlik gơs dô bă tiah gơs lò hòn mơ ală trồm boh, dô bă tiah sang lòi srau gòi gam sùm sùm. Ală cau gam wơl tòm làng bol Añ jê rơp phà tòmpìt bol khai, ală cau gam kis tòm lơgar Añ jê rơp tòmpìt ù tiah gơlơh gơs sre brê.”

¹⁰Hơ̆ la cồng nha bol khai rơp dòp geh, tài bơh bơta pơnhừ să bol khai dê, tài bơh bol khai neh bơtat bơtròh mơ dơñŏ tơnhial tòmdră mơ làng bol Yàng Jehôwa Gơnap Gơnoar Dờng Làm Jơh dê.

¹¹Yàng Jehôwa rơp gơlik gơs bơta rngòt rngơt bol khai in; Kơnràñ rơp tơnroh jơh ală yàng tòm ù dê. Ală làng bol ơm di gah dàlềng mơ ală bồt pơlào, tòm lơgar bol khai dê, rơp duh khoai Kơnràñ.

¹²“Ơ làng bol Kus bol mê kung behơ̆ sơl, rơp kong sreh tơnchơt bơh đào Añ jê.”

¹³Kơnràñ rơp pò tê Kơnràñ dê tòmdră mơ đah đang, mơ tơnroh Asiri, mơ Kơnràñ rơp lơh Ninibe in kòl sang lòi srau gòi jơh, gơlik gơs dô bă tiah ro rañ ngềt ngơt be ƀlàng bràs.

¹⁴Ală mpồl belàt mơ kơnrồ rơp bic rlô tềng hơ̆ bal mơ jơh ală jơi phan poan jơng tòm brê, klàng tòm ƀlàng bràs, bal mơ klàng kò rơp lơh rsòn hơđang cồng ală jrong gơ dê. Sap nrao gơ dê rơp mpong tus di ală mpồng dềt, bơta tơrlah tơrlơm tòm ală gùng mut mpồng, ală phan lơh mơ chi pơnàng rơp kòl tă tơlik.

¹⁵Do ngan la dô nơm ƀòn dờng ò càng kơlôi rcang, ơm lơngap lơngai. Gơ đơs is tòm nùs lah: “Añ do, rlau mơ añ gơs cau lơi ndai tai sơl ơ”? Mơya gơ neh gơlik gơs tiah sang lòi ngềt ngơt, la tiah ơm ală phan poan jơng tòm brê! Jơh ală cau lòt gan gơ rơp hwac mơ rtơs tê.