Read koho Sôphôni 3 Bible Online

Sôphôni 3 - koho bible

Sôphôni 3

¹Bòl glar ngan ƀòn gơkòl lơh ƀơ̆ ƀơl in! Ƀòn dờng jak rồn bơklơn!

²Gơ neh ò iat sap đơs lơi, gơ neh ò dòp bơta lơh niam wơl. Gơ neh ò dòn kơnòm di Yàng Jehôwa, gơ neh ò tus rềp mơ Yàng Tom Trồ gơ dê.

³Ală kwang duh broă gơ dê ơluh ơhùm be klìu triă, ală kwang cahrña gơ dê kung be so rhau trồ mang, ò lòi wơl dô êt lơi tus diàng drim.

⁴Ală cau gơnoar hwơr gơ dê pơnhừ să; la ală cau blac chừt. Ală cau gơnoar ơn phan duh khoai gơ dê lơh ƀơ̆ ƀơl tiah sàng goh mơ lơh rkwet rkwe di bơta boh lam.

⁵Yàng Jehôwa ơm digùl gơ la song ring, Kơnràñ ò lơh bơta lơi tìs. Kòp àng drim Kơnràñ cahrña song ring Kơnràñ dê, kòp rìng àng kư̆ dòn song, mơya cau ò song ring ò git ƀàssìl.

⁶Añ neh tơnroh ală làng bol, ală theng kơ̆ cê bol khai dê neh kòl tơnroh. Añ neh lòi ală gùng bol khai dê ngềt ngơt, gen tàng ò gơs cau lơi lòt tềng hơ̆. Ală ƀòn dờng bol khai dê neh kong tơnroh; ò gơs làng bol, ò gơs cau ơm.

⁷Añ neh đơs is lah: “Ngan ƀòn dờng rơp duh rngòt di Añ, mơ gơ rơp dòp bơta bơto lơh niam wơl, tiah gơ dê rơp ò kong tơnroh, gơ rơp ò roh jơh ală bơta Añ neh cèng tus hơđang gơ.” Mơya bol khai sơlo lin rlau tai lơh ală bơta iơh rmơh.

⁸Gen tàng, Yàng Jehôwa đơs lah: “Kơp gơn tĕ Añ, jơl tus ngai Añ rơp ñă ntào nàng lơh cơng sơnio glài. Bơh Añ neh lơh nền pơjum tơrgòm ală làng bol mơ pơjum bal ală lơgar, mơ tuh tơlik bơta gơjrañ dờng Añ jê hơđang bol khai, la jơh ală bơta gơjrañ duh hơng Añ jê. Bơh jơh plai ù rơp kong chu pơrguc tòm ồs bơta gơjrañ ƀoah pơrñat Añ jê.

⁹Tòm tŭ hơ̆, Añ rơp tòmgơl jơnau đơs ală làng bol in, gơlik gơs jơnau đơs sàng goh, tồ jơh ală bol khai rơp hòi dan di sơnđan Yàng Jehôwa, mơ dô bă bal duh broă Kơnràñ.

¹⁰Bơh đah ne ală hiòng Kus dê, ală cau hòi dan di sơnđan Añ, la ală cau neh kong Añ lơh nrah nring rơp cèng ală phan ơn Añ in.

¹¹Tòm ngai hơ̆, bol mê rơp ò gam ƀàssìl, tài bơh ală broă lơh mơ bol mê neh pơrlơ̆ dră di Añ, tài bơh hơ̆ Añ rơp tă sang bơh digùl bol mê ală cau jòng să, hừh nùs, mơ mê rơp ò gam jòng să hơđang mơnơm sàng goh Añ jê.

¹²Mơya Añ rơp lòi wơl digùl bol mê ală cau lơbơn niam mơ tơnliah să. Bol khai rơp jòi jat mơ kìng crŭ tòm sơnđan Yàng Jehôwa dê.

¹³Ală cau gam wơl Israel dê rơp ò lơh bơta tìs, bol khai rơp ò đơs blac, bơta blac pơrlồm jòi ò bàn tòm bơr bol khai dê. Bol khai rơp sa mơ bic rlô, mơ ò gơs cau lơi lơh bol khai in rngòt rngơt.”

¹⁴Ơ Kòn ùr Siôn, đơs chò dờng tĕ! Ơ Israel, driau dờng tĕ! Ơ Kòn ùr Jerusalem, jơh nùs tĕ chò hòp mơ hòn chò.

¹⁵Yàng Jehôwa neh tă sang bơta cahrña tòmdră di ai, Kơnràñ neh pơrlac ngài ală cau sò tơm ai dê. Yàng Jehôwa, Bơtau Israel dê ơm digùl mơ ai, ai rơp ò tŭ lơi rngòt rngơt di bơta rung rài tai.

¹⁶Tòm ngai hơ̆, bol khai rơp đơs mơ Jerusalem lah: “Ơ Siôn! Bañ rngòt, bañ lòi tê ai dê lơbơn!

¹⁷Jehôwa Yàng Tom Trồ ai dê ơm digùl ai; Kơnràñ la cau ling jak ai bơta pha lin. Kơnràñ rơp hòn chò bơh ai mơ bơta chò hòp, Kơnràñ rơp lơh pa wơl ai in, tòm bơta kòñ gơboh Kơnràñ dê; Mơ Kơnràñ rơp bơh ai, mơ hòn chò driau dờng.

¹⁸Añ rơp tă sang bơh di ai ală bơta moat jrùng bơh ală ngai pơjum sa chò hòp; bơh hơ̆ ai rơp ò ơnòng kơnjơ̆ bơta lah pơrhơng.

¹⁹Tòm tŭ hơ̆, Añ rơp lơh gơwèt hơ jơh ală cau neh rồn bơklơn ai; Añ rơp dong klàs cau kwet gơlte mơ pơjum tơrgòm wơl ală cau gơkòl sang lòi, mơ Añ rơp tòmgơl bơta ƀàssìl bol khai dê gơlik gơs bơta jòng ro mơ geh pơnro tòm làm jơh plai ù.

²⁰Tòm tŭ hơ̆, añ rơp pơjum tơrgòm ai wơl, tòm tŭ hơ̆ Añ rơp cèng ai rê hìu. Añ rơp lơh ai in geh tiơng pơnro mơ geh jòng ro digùl jơh ală làng bol tòm plai ù, tòm tŭ Añ brê wơl ală cau neh kong kup pơrdô ai dê ơm di đap mat ai.” Yàng Jehôwa đơs behơ̆.