Read koho Age 2 Bible Online

Age 2 - koho bible

Age 2

¹Tòm ngai bàr jơt dùl kơnhai dơ̆ poh, gơs jơnau Yàng Jehôwa đơs mơ cau gơnoar hwơr Age lah:

²“Đơs tĕ mơ Jerubabel, kòn klau Sealthiel, kwang dờng at bồ lơgar Juda, mơ Jôsua, kòn klau Jehôjadak, cau gơnoar dờng lam bồ ơn phan duh khoai, mơ làng bol gam wơl, lùp bol khai lah:

³‘Ñcau la cau gam wơl tòm bol mê neh sền gŏ hìu do tòm bơta gơklŏ yau gơ dê taih? Tŭ do bol mê gŏ gơ mbe lơi taih? Gơwèt mơ bol mê, gơlơh kung be la ò kwơ ơ?’

⁴‘Mơya tŭ do, ơ Jerubabel, khin cha tĕ!’ Yàng Jehôwa đơs behơ̆. ‘Ơ Jôsua, kòn klau Jehôjadak, cau gơnoar dờng lam bồ ơn phan duh khoai, khin cha tĕ!’ Yàng Jehôwa đơs behơ̆. ‘Jơh làng bol tòm lơgar, khin cha tĕ mơ lơh broă. Bơh Añ ơm bal mơ bol mê,’ Yàng Jehôwa Gơnap Gơnoar Dờng Làm Jơh đơs behơ̆.

⁵‘Jat be bơta ho bal Añ neh bơtào mơ bol mê tòm tŭ bol mê lik bơh Ejiptơ. Mơ Hwềng Añ gam ơm digùl bol mê, bañ rngòt.’

⁶Bơh Yàng Jehôwa Gơnap Gơnoar Dờng Làm Jơh dê đơs be do: ‘Tòm dô êt jŏ, dô dơ̆ tai Añ rơp lơh lơnggơr ală tap trồ mơ plai ù, dàlềng mơ ù rañ rsơh.

⁷Añ rơp lơh lơnggơr jơh ală lơgar, mơ ală phan màng jơh ală lơgar dê rơp tus tềng do, mơ Añ rơp lơh hìu do in bềng lìu bơta gơklŏ,’ Yàng Jehôwa Gơnap Gơnoar Dờng Làm Jơh đơs behơ̆.

⁸‘Priă gơrê mơ Añ, màh gơrê mơ Añ,’ Yàng Jehôwa Gơnap Gơnoar Dờng Làm Jơh đơs behơ̆.

⁹‘Bơta gơklŏ hìu do dê rơp dờng rlau mơ bơta gơklŏ hìu yau dê.’ Yàng Jehôwa Gơnap Gơnoar Dờng Làm Jơh đơs behơ̆. ‘Mơ tòm tiah do Añ rơp ai bơta pas gơs lơngap lơngai,’ Yàng Jehôwa Gơnap Gơnoar Dờng Làm Jơh đơs behơ̆.”

¹⁰Tòm ngai bàr jơt poan kơnhai dơ̆ sin, tòm nam dơ̆ bàr rài at bồ Darius dê, gơs jơnau Yàng Jehôwa đơs mơ cau gơnoar hwơr Age, lah:

¹¹“Yàng Jehôwa Gơnap Gơnoar Dờng Làm Jơh đơs be do: ‘Lùp tĕ ală cau gơnoar ơn phan duh khoai bơh bơta boh lam:

¹²Dilah gơs dô nă cau klơm poac neh ơn is sàng goh tòm ào jrùh khai dê, mơ ào khai dê gơtup di ƀañ, hala phan lơi neh ryă, hala tơrnòm, hala mơñà, hala phan sa lơi ndai, gen phan hơ̆ neh gơlik gơs sàng goh sơl?’” Ală cau gơnoar ơn phan duh khoai ho lah: “Ò.”

¹³Age đơs lah: “Dilah gơs dô nă cau neh kòl ƀơ̆ ƀơl bơh ƀư di ƀồc chơt mơ tup di dô nơm tòm ală phan hơ̆, gen phan hơ̆ gơlik ƀơ̆ ƀơl sơl?” Ală cau gơnoar ơn phan duh khoai ho wơl lah: “Phan hơ̆ rơp gơlik ƀơ̆ ƀơl.”

¹⁴Gen Age đơs lah: “Yàng Jehôwa đơs lah: ‘Gơwèt hơ làng bol tòm lơgar do ơm di đap Añ kung behơ̆ sơl, mơ kung behơ̆ gơwèt mơ jơh ală broă tê bol khai lơh mơ phan lơi bol khai ơn gen kung gơlik ƀơ̆ ƀơl.’

¹⁵Mơya tŭ do, kơlôi sơwì tĕ ală bơta rơp tus bơh ngai do jơl tus hìng nau. Lài mơ tŭ dô pơnai lŭ neh ơn hơđang dô pơnai lŭ nàng bơt hìu duh khoai Yàng Jehôwa dê,

¹⁶gen ală bơta gơlik gơs mbe lơi? Tòm tŭ dô nă cau tus di dô lŏ sre pal toès geh bàr jơt sah, mơya geh mìng jơt sah. Tòm tŭ dô nă cau tus di tiah pat tơrnòm ño nàng ai pram jơt yang, mơya gơs mìng bàr jơt yang lơm.

¹⁷‘Añ neh ngui bơta ro rañ, but bơsềt, mơ mìu piar nàng lơh glài jơh ală broă tê bol mê lơh, bulah behơ̆ bol mê ò rê wơl mơ Añ, Yàng Jehôwa đơs behơ̆.

¹⁸Kơlôi sơwì tĕ, bơh ngai do jơl tus hìng nau. Bơh ngai bàr jơt poan kơnhai dơ̆ sin, bơh di ngai mơnàng hìu duh khoai Yàng Jehôwa dê neh bơt. Kơlôi sơwì tĕ:

¹⁹Gam gơs gar sơntìl lơi tòm đam sơl? Jơl tus di tŭ do, tòm ño, tòm chi ƀal, tòm chi lừu, mơ tòm chi ôlibe òhềt gơs plai ơ? Mơya bơh ngai do jơl hìng nau, Añ rơp ai lơngai lơngò bol mê in.’”

²⁰Jơnau Yàng Jehôwa dê tus mơ Age dơ̆ bàr tòm ngai bàr jơt poan kơnhai hơ̆, lah:

²¹“Đơs tĕ mơ Jerubabel, kwang dờng at bồ lơgar Juda, mơ lah: ‘Añ rơp lơh gơlơnggơr ală tap trồ mơ plai ù.

²²Añ rơp tuh tơlup ală sơbàn bơtau mơ tơnroh gơnap gơnoar ală lơgar làng bol bơdìh dê. Añ rơp tuh tơlup ală rơndeh lòs tòmlơh bal mơ ală cau at gơ; ală ơseh bal mơ ală cau hào gơ rơp dùh, kòp nă kong sreh tơnchơt bơh đào oh mi khai dê.’”

²³Yàng Jehôwa Gơnap Gơnoar Dờng Làm Jơh đơs lah: “Ơ Jerubabel, kòn klau Sealthiel, tòm ngai hơ̆ Añ rơp ai mê lơh gơs dĭ gơna Añ,” Yàng Jehôwa đơs: “Mơ Añ rơp lơh mê in kung be sơmbiat ƀang kì Añ jê, bơh Añ neh sac rwah mê.” Yàng Jehôwa Gơnap Gơnoar Dờng Làm Jơh đơs behơ̆.