Read koho Sacari 11 Bible Online

Sacari 11 - koho bible

Sacari 11

¹Ơ Liban, pò tĕ ală mpồng mê dê, tồ ồs sa roh ală chi nho rề mê dê!

²Ơ chi nho, pơt wòl tĕ bơh chi nho rề neh gơpừ, ală chi ryŭ ryơm neh roh rui! Ơ ală tòm cha tòm Basan, pơt wòl tĕ; brê dờng neh gơkòl kơl!

³Iat tĕ jơnau pơt wòl ală cau ê belàt dê; bơta gơklŏ bol khai dê gơkòl lơh gơprah; Iat tĕ sap ơluh ơhùm ală klìu triă dê; ală rlau chi Jordan dê neh kòl tơnroh!

⁴Jehôwa Yàng Tom Trồ añ jê đơs be do: “Ê tĕ ală belàt rơp cèng nàng lơh poac.

⁵Ală cau blơi bol gơ neh sreh tơnchơt bol gơ mơ ò gơkòl lơh glài. Ală cau tac bol gơ đơs lah: ‘Jòng ro Yàng Jehôwa, bơh añ neh pas gơs!’ Ală cau ê bol gơ dê ò nđàc di bol gơ.”

⁶Yàng Jehôwa đơs lah: “Añ rơp ò gam nđàc sơngit di ală cau ơm tòm ù, Añ rơp jào kòp nă bol khai tòm tê cau gơp ƀòn mơ cau bơtau bol khai dê. Bol khai rơp tơnroh ù tiah, mơ Añ rơp ò dong tă dô nă cau lơi klàs bơh di tê bol hơ̆ dê.”

⁷Behơ̆ Añ ala mat ală belàt neh kă bro, Añ neh gơlik gơs cau ê ală belàt tòm mpồl cèng lơh poac: Gen Añ ai bàr nơm gai jra, dô nơm Añ sơnđan Bơta Nđàc mơ dô nơm la Bơta Gơs Dô Bă Bal, mơ Añ ê mpồl belàt.

⁸Tòm dô kơnhai Añ neh tơlik pe nă cau ê. Mpồl belàt cù kìr di Añ, mơ Añ sơlo ngai sơlo ò jai kong tai bơh di bol gơ.

⁹Behơ̆ Añ đơs lah: “Añ rơp ò lơh gơs cau ê bol mê tai. Belàt lơi chơt gen lòi tĕ gơ chơt; belàt lơi roh rui gen lòi tĕ gơ roh rui; ai ală belàt gam wơl gen belàt do rơp sa poac belàt ne.”

¹⁰Gen Añ ai gai jra sơnđan la Bơta Nđàc mơ dơrpă gơ, gơltac jơnau ho pơgon mơ Añ neh ho bal mơ jơh ală làng bol.

¹¹Gơ neh kòl gơltac sang tòm ngai hơ̆; mơ ală belàt kòl cèng tac, la ală belàt neh kơp gơn Añ, bol gơ git hơ̆ la jơnau Yàng Jehôwa dê.

¹²Gen Añ neh đơs mơ bol khai lah: “Dilah sền gơlơh niam bol mê in, gen ai tĕ Añ in jền tơngai; mơya dilah ò gen bañ ai.” Behơ̆ bol khai kơr Añ in pe jơt pơnai priă.

¹³Mơ Yàng Jehôwa neh đơs mơ Añ lah: “Sang tĕ khà priă hơ̆ cau lơh glah in, hơ̆ la khà priă neh lơh nền Añ in.” Añ ai pe jơt pơnai priă mơ sơrbì gơ cau lơh glah hìu Yàng Tom Trồ dê.

¹⁴Lồc behơ̆ Añ dơrpă gai jra dơ̆ bàr ne Añ jê, sơnđan la Bơtau Gơs Dô Bă Bal, gơltac sang bơta tòmkơt digùl Juda mơ Israel.

¹⁵Gen Yàng Jehôwa neh đơs mơ Añ lah: “Ai tĕ tai ală phan ngui dô nă cau ê tùl gơla dê.

¹⁶Bơh Añ rơp bơtào tơngguh dô nă cau ê tòm lơgar, la cau ê rơp ò jòi belàt neh roh, ò kơlôi rcang belàt kòn, ò sơm belàt sồt rmàñ, ò siam belàt pràn, mơya rơp sa poac belàt niam rlau jơh, crè ală nđias jơng gơ dê.”

¹⁷“Bòl glar ngan cau ê ò kwơ in, la cau ê sang lòi mpồl belàt! Dan đào srơp tơwòr tê khai dê mơ gar mat đah ma khai dê! Dan tơwòr tê khai dê rơp siar tơn, mơ gar mat đah ma khai dê jơngo tơn!”