Read koho Sacari 13 Bible Online

Sacari 13 - koho bible

Sacari 13

¹Tòm ngai hơ̆ rơp gơs dô nơm croh dà gơ pò hìu Dabit mơ làng bol Jerusalem in, nàng rào goh bol khai bơh tồi glài mơ bơta ƀơ̆ ƀơl.

²Yàng Jehôwa Gơnap Gơnoar Dờng Làm Jơh đơs lah: “Tòm ngai hơ̆, Añ rơp tă sang sơnđan ală rùp ràk bơh di lơgar, cau rơp ò tai kah bol gơ. Añ rơp tă tơlik ală cau gơnoar hwơr mơ hwềng bơta ƀơ̆ ƀơl bơh di lơgar.

³Mơ dilah gơs cau lơi gam đơs hwơr, gen mè mơ bèp khai dê la cau neh deh khai, rơp đơs mơ khai lah: ‘Mê rơp ò geh kis, tài bơh mê neh ai sơnđan Yàng Jehôwa mơ đơs ală jơnau blac.’ Mơ mè bèp tòm khai dê la cau neh deh khai rơp sreh tơnchơt khai tòm tŭ khai đơs hwơr.

⁴Tòm ngai hơ̆, kòp nă cau gơnoar hwơr rơp ƀàssìl bơh bơta gơtơnggŏ đơs hwơr khai dê; khai rơp ò soh ồi ào mơ sơnò be cau gơnoar hwơr nàng pơrlồm cau tai.

⁵Khai rơp đơs lah: ‘Añ ò di la dô nă cau gơnoar hwơr. Añ la dô nă cau lơòr sre, ù tiah la phan tòm añ jê bơh tŭ añ gam kơnòm.’

⁶Dilah gơs cau lơi lùp khai lah: ‘Ală tềl sồt tòm ntơh mê dê hơ̆ la ñchi taih?’ Gen khai rơp ho lah: ‘Hơ̆ la ală tềl sồt añ neh kong tòm hìu ală cau bơyô añ jê.’”

⁷Yàng Jehôwa Gơnap Gơnoar Dờng Làm Jơh đơs lah: “Ơ đào, kah rngal tĕ tòmdră mơ cau ê belàt Añ jê, tòmdră mơ cau neh lơh jơnau tòmkơt mơ Añ! Pù lơh tĕ cau ê belàt, mơ ală belàt rơp nrah nring, mơ Añ rơp tơrwơl tê tòmdră mơ ală kòn dềt.”

⁸Yàng Jehôwa đơs lah: “Tòm làm jơh lơgar, bàr pơnah pe rơp kong tă sang mơ tơnroh; bulah behơ̆, dô pơnah pe rơp gam wơl tòm hơ̆.

⁹Añ rơp cèng tơmut dô pơnah pe hơ̆ tòm ồs, Añ rơp tiar bol khai kung be priă, mơ lòng bol khai kung be màh. Bol khai rơp hòi di sơnđan Añ, mơ Añ rơp ho wơl bol khai; Añ rơp đơs lah: ‘Bol khai la làng bol Añ jê,’ mơ bol khai rơp đơs lah: ‘Yàng Jehôwa la Yàng Tom Trồ bol hi dê.’”