Read koho Sacari 7 Bible Online

Sacari 7 - koho bible

Sacari 7

¹Tòm nam dơ̆ poan rài at bồ bơtau Darius dê, gơs jơnau Yàng Jehôwa đơs mơ Sacari tòm ngai poan kơnhai sin, la kơnhai Kislep.

²Làng bol tòm Betel neh sồr Sarejer mơ Regem Melek, bal mơ ală cau jat bol khai lòt tus rac dan bơta nđàc Yàng Jehôwa dê,

³mơ lùp ală cau gơnoar ơn phan duh khoai tòm hìu duh khoai Yàng Jehôwa Gơnap Gơnoar Dờng Làm Jơh dê, bal mơ ală cau gơnoar hwơr lah: “Añ pal ñìm rac mơ ơt sa tòm kơnhai pram kung be añ neh lơh tòm oă sơnam neh rlau sơl ơ?”

⁴Gen gơs jơnau Yàng Jehôwa Gơnap Gơnoar Dờng Làm Jơh đơs mơ añ lah:

⁵“Lùp tĕ jơh làng bol tòm lơgar bal mơ ală cau gơnoar ơn phan duh khoai lah: ‘Tòm tŭ bol mê ơt sa mơ ñìm rac tòm kơnhai pram kơnhai poh neh poh jơt sơnam do rau, ngan sơl la tài bơh Añ mơ bol mê ơt sa hơ̆ sơl ơ?

⁶Mơ tŭ bol mê ñô mơ sa, ò di la bol mê mìng ñô sa tài bơh să tòm bol mê lơm ò ơ?

⁷Ò di la ală jơnau Yàng Jehôwa neh kơnòm di ală cau gơnoar hwơr rài yau bơto yal tòm tŭ Jerusalem gơs ală cau ơm tòm gơ ơm tòm bơta pas sơm lơngap lơngai, bal mơ ală ƀòn gùt dar gơ, mơ tòm tŭ Negep mơ Sepelah gơs làng bol ơm ò ơ?’”

⁸Mơ gơs jơnau Yàng Jehôwa đơs tai mơ Sacari, lah:

⁹“Yàng Jehôwa Gơnap Gơnoar Dờng Làm Jơh đơs be do: ‘Lơh jat tĕ bơta song ring ngan, gơwèt tĕ bal mơ gơp tòm bơta nđàc sơngit mơ bơta kòñ gơboh kơ̆ dơn.

¹⁰Bañ rồn bơklơn cau ùr bơnrau mơ cau kòn đòi, cau ơm tòp mơ cau rƀah lơòi. Bañ kơlôi sơnơng bơta iơh gơwèt bal mơ gơp.’

¹¹Mơya bol khai ò bài ơn nùs tồr, mơ wèt ngkòi kră kơldang, mơ sềt tồr ò bài iat.

¹²Bol khai lơh nùs bol khai dê kră kung be lŭ tơrneh, nàng ò iat bơta boh lam mơ ală jơnau Yàng Jehôwa Gơnap Gơnoar Dờng Làm Jơh dê neh đơs bơh Hwềng Kơnràñ dê kơnòm di ală cau gơnoar hwơr tòm rài yau. Behơ̆ Yàng Jehôwa Gơnap Gơnoar Dờng Làm Jơh gơjrañ dờng ngan.

¹³Be tòm tŭ Añ hòi, bol khai ò bài iat, mơ tòm tŭ bol khai hòi, Añ kung ò bài iat, Yàng Jehôwa Gơnap Gơnoar Dờng Làm Jơh đơs behơ̆.

¹⁴Mơ Añ neh rsìh bol khai bơh dô nơm càl wac brồng digùl ală lơgar mơ bol khai òhềt tŭ lơi git. Ù tiah bol khai lòi wơl rơp gơkòl sang lòi ngềt ngơt tian gơs ò gơs cau lơi rgơi lòt rê, mơ dô nơm lơgar niam mơnĕ neh gơlik gơs lơgar sang lòi ngềt ngơt.”