Read koho Sacari 8 Bible Online

Sacari 8 - koho bible

Sacari 8

¹Gơs jơnau Yàng Jehôwa Gơnap Gơnoar Dờng Làm Jơh đơs tai mơ añ lah:

²Yàng Jehôwa Gơnap Gơnoar Dờng Làm Jơh đơs be do: “Añ ƀoah pơrñat bơh Siôn mơ bơta ƀoah pơrñat dờng ngan; Añ ƀoah pơrñat mơ bơta gơjrañ dờng.”

³Yàng Jehôwa đơs be do: “Añ rơp rê wơl hơ Siôn, mơ ơm sùm digùl Jerusalem; Jerusalem rơp geh sơnđan la Ƀòn Dờng dòn song, mơ mơnơm Yàng Jehôwa Gơnap Gơnoar Dờng Làm Jơh dê rơp geh sơnđan la Mơnơm Sàng Goh.”

⁴Yàng Jehôwa Gơnap Gơnoar Dờng Làm Jơh đơs be do: “Dô dơ̆ tai, ală ồng kra mò kra rơp nggui di ală gùng Jerusalem dê, kòp nă at gai jra tòm tê, tài bơh bol khai neh jòng sơnam.

⁵Ală gùng tòm ƀòn dờng rơp gơs bềng ală kơnòm ùr kơnòm klau kơnhơl tềng hơ̆.”

⁶Yàng Jehôwa Gơnap Gơnoar Dờng Làm Jơh đơs be do: “Tian gơs bơta hơ̆ sền gơlơh kung be broă ò rgơi lơh gơs di đap ală làng bol gam wơl tòm ală ngai do, mơ bơta hơ̆ kung gơlơh be ò rgơi gơlik gơs gơwèt mơ Añ sơl ơ?” Yàng Jehôwa Gơnap Gơnoar Dờng Làm Jơh đơs behơ̆.

⁷Yàng Jehôwa Gơnap Gơnoar Dờng Làm Jơh đơs be do: “Añ rơp dong klàs làng bol Añ jê bơh di ală lơgar đah mattơngai lik mơ bơh lơgar đah mattơngai mut.

⁸Añ rơp cèng brê bol khai wơl nàng ơm tòm Jerusalem, bol khai rơp lơh gơs làng bol Añ jê, mơ Añ rơp lơh gơs Yàng Tom Trồ bol khai dê tòm bơta dòn song mơ song ring.”

⁹Yàng Jehôwa Gơnap Gơnoar Dờng Làm Jơh đơs be do: “Bol mê la ală cau pa do kơno ală jơnau hơ̆ bơh bơr ală cau gơnoar hwơr neh gơs mat tòm tŭ bơt bơtào wơl mơnàng hìu duh khoai, la hìu Yàng Jehôwa Gơnap Gơnoar Dờng Làm Jơh dê, lơh tĕ tê bol mê dê gơlik pràn kơldang.

¹⁰Lài mơ tŭ hơ̆ gen ò gơs jền tơngai cau in hala phan poan jơng in, hala kung ò gơs bơta ring lơngai lơi ală cau lik hala mut in bơh di ală cau sò tơm, mơ Añ neh lơh bol khai in kòp nă tòmdră wơl mơ cau ndai.

¹¹Mơya tŭ do Añ ò lơh di ală cau gam wơl tòm làng bol do kung be Añ neh lơh bơh lài,” Yàng Jehôwa Gơnap Gơnoar Dờng Làm Jơh đơs behơ̆.

¹²“Bơh rơp gơs dô nă cau sih bơta ring lơngai; gar sơntìl rơp hòn niam, tòm ño rơp tơnggơs plai gơ dê, ù tiah rơp tơnggơs plai đo, ală tap trồ rơp dùh dà mơryuh. Añ rơp ai jơh ală bơta do lơh gơs sre brê ală cau gam wơl tòm làng bol do.

¹³Ơ hìu Juda mơ hìu Israel! Bol mê neh gơlik gơs làng bol cau srat sơntơm digùl ală lơgar mbe lơi, gen Añ rơp dong klàs bol mê, mơ bol mê rơp gơlik gơs dô bơta lơngai. Bañ rngòt rngơt, mơya lơh pràn kơldang tĕ tê mê dê!”

¹⁴Bơh Yàng Jehôwa Gơnap Gơnoar Dờng Làm Jơh đơs be do: “Kung be Añ neh lơh nền tơndùh bơta rung rài hơđang bol mê mơ ò tơnruc nùs tòm tŭ ồng pàng bol mê bơrcek Añ gơjrañ,” Yàng Jehôwa Gơnap Gơnoar Dờng Làm Jơh đơs behơ̆,

¹⁵gen tŭ do Añ kung lơh nền gơwèt niam mơ Jerusalem mơ Juda sơl. Bañ rngòt rngơt!

¹⁶Do la ală bơta bol mê pal lơh: “Đơs tĕ jơnau song bal mơ gơp, cahrña song ngan mơ lơh bơh bơta ring lơngai tòm ală tiah cahrña bol mê dê.

¹⁷Bañ rơndap bơta iơh tòmdră mơ cau gơp ƀòn bol mê dê; mơ bañ gơboh bơta srat să ma blac. Añ gơjrañ di jơh ală bơta hơ̆,” Yàng Jehôwa đơs behơ̆.

¹⁸Gen gơs jơnau Yàng Jehôwa Gơnap Gơnoar Dờng Làm Jơh dê tus tai mơ añ.

¹⁹Yàng Jehôwa Gơnap Gơnoar Dờng Làm Jơh đơs be do: “Bơta ơt sa tòm kơnhai poan, kơnhai pram, kơnhai poh, mơ kơnhai jơt rơp gơlik gơs tŭ tơngai hòn chò mơ chò hòp, mơ la ală ngai pơjum sa lơngai lơngò hìu Juda in. Behơ̆ tàng kòñ gơboh bơta song ngan mơ bơta lơngap lơngai.”

²⁰Yàng Jehôwa Gơnap Gơnoar Dờng Làm Jơh đơs be do: “Oă làng bol mơ oă cau tòm ală ƀòn dờng rơp tus,

²¹mơ cau tòm ƀòn do lòt tus hơ ƀòn ne mơ đơs lah: ‘Bol he lòt tĕ mhar nàng rac dan Yàng Jehôwa mơ jòi jat Yàng Jehôwa Gơnap Gơnoar Dờng Làm Jơh. Să tòm añ kung lòt sơl.’

²²Oă làng bol mơ oă lơgar dờng pràn kơldang rơp tus hơ Jerusalem nàng jòi jat Yàng Jehôwa Gơnap Gơnoar Dờng Làm Jơh, mơ rac dan mơ Kơnràñ.”

²³Yàng Jehôwa Gơnap Gơnoar Dờng Làm Jơh đơs be do: “Tòm ală ngai hơ̆, jơt nă cau bơh tòm jơh ală jơnau đơs mơ lơgar rơp at kơ̆ di tiang ào jrùh dô nă cau Juda dê mơ đơs lah: ‘Lòi tĕ bol hi lòt bal mơ mê, tài bơh bol hi neh kơno lah Yàng Tom Trồ ơm bal mơ mê.’”