Read koho Sacari 9 Bible Online

Sacari 9 - koho bible

Sacari 9

¹Jơnau đơs Yàng Jehôwa dê tòmdră mơ lơgar Hadrak mơ gơ rơp ơm hơđang Damas. Bơh Yàng Jehôwa gơwèt hơ ƀòn dờng Aram dê, kung lơh behơ̆ mơ jơh ală jơi bơtiàn Israel dê;

²kung ơm hơđang Hamat, ơm di nhàr gơ dê, mơ ơm hơđang Tirơ mơ Sidôn, bulah bol khai jak chài ngan.

³Tirơ neh bơt să tòm he in dô nơm theng kơ̆ cê; gơ neh pơjum tơrgòm priă kung be gơnru thul, mơ màh kung be phan ƀơ̆ ƀơl tòm ală gùng.

⁴Mơya, tŭ do Yàng Jehôwa rơp tă tơlik phan mơna gơ dê, mơ sơrbì sang bơta pas gơs gơ dê tòm dàlềng, mơ gơ rơp kong ồs sa pơrguc.

⁵Askalôn rơp gŏ bơta hơ̆ mơ rngòt; Gaja kung behơ̆ sơl rơp kong jê sồt bòl glar ngan, Ekrôn kung behơ̆, bơta kơp kòñ gơ dê neh roh rui jơh. Bơtau rơp kong tơnroh bơh di Gaja; Askalôn rơp ò gơs cau ơm.

⁶Làng bol gơtòmbơcă rơp ơm tòm Asdôt, mơ Añ rơp pơndut bơta pơnhừ să ală cau Philistin dê.

⁷Añ rơp tă sang ngài mhàm bơh di bơr bol khai, la phan ngkòr ngkàc bơh digùl sề bol khai dê. Ală cau gam wơl bol khai dê rơp gơrê bal mơ Yàng Tom Trồ bol he dê; mơ rơp gơlik gơs dô jơi bơtiàn tòm Juda, mơ Ekrôn rơp kung be làng bol Jebusit.

⁸Gen Añ rơp sơntơp sàl nàng sền gàr hìu Añ jê, nàng ò gơs dô nă cau lơi lòt rê, ò gơs cau rồn bơklơn lơi jă trơm bol khai tai, bơh tŭ do Añ neh sền bol khai be kòn mat tòm Añ jê.

⁹Ơ kòn ùr Siôn, hòn chò hừh hơh tĕ! Ơ kòn ùr Jerusalem, driau dờng tĕ! Ne, Bơtau ai dê tus mơ ai, Kơnràñ la Bơtau pha lin mơ ai bơta pha lin rlau, pơndêt să mơ hào hơđang dô nơm alàng, dô nơm alàng kòn, kòn alàng me dê.

¹⁰Añ rơp tă tơlik ală rơndeh lòs tòmlơh bơh dê Epraim, mơ ală ơseh tòmlơh bơh di Jerusalem: mơ àtak tòmlơh rơp kong dơrpă. Kơnràñ rơp ai gơnoar sồr bơta lơngap lơngai ală lơgar in. Gơnoar at bồ Kơnràñ dê rơp pò ơnàng bơh dàlềng do tus hơ dàlềng ne, mơ bơh Hiòng me tus di lồi plai ù.

¹¹Đah mơ ai, tài bơh mhàm bơta ho bal Añ jê mơ ai, Añ rơp hồ toh ală cau ơm jàm ai dê bơh trồm tơrluh ò gơs dà.

¹²Ơ ală cau ơm jàm gơs bơta gơn kơnòm, rê wơl tĕ hơ theng kơ̆ cê bol mê dê; ngai do Añ yal tơnggit lah Añ rơp rcang ai wơl mê in bàr dơ̆ rlau.

¹³Añ rơp wàr Juda kung be Añ wàr àtak Añ jê mơ ơn Epraim kung be kam gơ dê; Ơ Siôn, Añ rơp bơtào tơngguh ală kòn klau mê dê tòmdră mơ ală kòn klau Grek dê mơ Añ rơp ngui mê gơlik kung be dô nơm đào tòm tê pràn cau tòmlơh dê.

¹⁴Gen Yàng Jehôwa rơp tơlik mat hơđang bol khai, kam Kơnràñ rơp àng gơcrà kung be puhlèp. Jehôwa Yàng Tom Trồ Gơnap Gơnoar Làm Jơh rơp uh kơlwòk; Kơnràñ rơp lòt tòm ală càl rbut đah đơm.

¹⁵Yàng Jehôwa Gơnap Gơnoar Dờng Làm Jơh rơp rcang gàr bol khai, mơ bol khai rơp sa loan mơ jă tơnlề ală cau pañ sơna mơ lŭ. Bol khai rơp lơh gơtuh mhàm cau sò tơm bol khai dê kung be cau bơñul; bol khai rơp geh bềng kung be dô nơm jơrlŭ dà ngui nàng rsìh hơđang ală mum cơnòng duh khoai dê.

¹⁶Tòm ngai hơ̆, Jehôwa Yàng Tom Trồ bol khai dê rơp dong klàs bol khai, bơh bol khai la mpồl belàt làng bol Kơnràñ dê. Bol khai rơp àng gơcrà tòm lơgar Kơnràñ dê kung be ală lŭ màng hơđang sơgơn bơtau.

¹⁷Bơta niam mơnĕ mơ hàng mơnĕ Kơnràñ dê ò git nđò! Kòi mbo rơp lơh ală klau pơnu in bơtào dờng mơ tơrnòm pa lơh cau ơruh in chò hòp.