Read koho Malaci 1 Bible Online

Malaci 1 - koho bible

Malaci 1

¹Dô jơnau gơnoar hwơr. Jơnau Yàng Jehôwa đơs mơ Israel bơh Malaci.

²Yàng Jehôwa neh đơs lah: “Añ neh kòñ gơboh di bol mê.” Mơya bol mê lùp lah: “Mbe Kơnràñ neh kòñ gơboh di bol hi taih?” Yàng Jehôwa đơs lah: “Esau ò di la bi Jakôp ơ?

³Mơya Añ neh kòñ gơboh dê Jakôp, mơ gơjrañ kơuềng dê Esau, mơ Añ neh lơh ală mơnơm khai dê gơlik gơs tiah sang lòi srau gòi, mơ lơh sre brê khai dê gơs tiah ơm ală so brê in tòm ƀlàng bràs.”

⁴Dilah Edôm đơs lah: “Bulah bol hi neh kong bơcah lề, bol hi rơp bơt bơtào wơl ală tiah tơrlah tơrlơm.” Mơya Yàng Jehôwa Gơnap Gơnoar Dờng Làm Jơh đơs lah: “Bol khai rgơi bơt bơtào wơl, mơya Añ rơp sòr tơrlơm, jơl tus di tŭ bol khai geh sơnđan la lơgar iơh bơsak, la dô nơm làng bol mơ Yàng Jehôwa gơjrañ sùm sùm.”

⁵Mat bol mê rơp gŏ bơta hơ̆ mơ bol mê rơp đơs lah: “Dờng ngan la Yàng Jehôwa làm jơh đah ne ală nhàr Israel dê!”

⁶“Kòn klau ki ngàm di bèp khai dê, dĭ gơna ki ngàm di cau tòm khai dê. Dilah Añ la bèp gen ntềng đah bơta ki ngàm mơ Añ geh gơnoar dòp taih? Dilah Añ la cau tòm gen ntềng đah bơta duh rngòt mơ Añ gơs gơnoar dòp taih? Yàng Jehôwa Gơnap Gơnoar Dờng Làm Jơh đơs behơ̆. Ơ bol mê la ală cau gơnoar ơn phan duh khoai, bol mê la ală cau sền òsơp di sơnđan Añ. Mơya bol mê lùp lah: ‘Mbe bol hi sền òsơp di sơnđan Kơnràñ taih?’

⁷Bol mê ơn phan sa ƀơ̆ ƀơl hơđang cơnòng duh khoai Añ jê. Mơya bol mê lùp lah: ‘Mbe bol hi neh lơh ƀơ̆ ƀơl Kơnràñ taih?’ Hơ̆ la tài bơh bol mê kơlôi lah: ‘Cơnòng Yàng Jehôwa di pal sền òsơp.’

⁸Tòm tŭ bol mê cèng ală phan poan jơng jơngo mat lơh gơs phan ơn duh khoai, bơta hơ̆ la ò tìs sơl ơ? Tòm tŭ bol mê ơn ală phan poan jơng kwet gơlte hala kòp jê, bơta hơ̆ la ò tìs sơl ơ? Lòng ơn bol gơ cau kwang đơng lơgar mê in! Khai rơp niam nùs di mê hala khai rơp dòp phan mê sơl ơ?” Yàng Jehôwa Gơnap Gơnoar Dờng Làm Jơh đơs behơ̆.

⁹“Tŭ do rac dan tĕ mơ Yàng Tom Trồ, bơh hơ̆ digơlan Kơnràñ rơp kòñ nđàc di bol he. Bol mê neh tìs, mơ Kơnràñ rơp yal tơlik bơta kòñ nđàc mơ dô nă cau lơi tòm bol mê sơl ơ?” Yàng Jehôwa Gơnap Gơnoar Dờng Làm Jơh đơs behơ̆.

¹⁰“Ơ hơh, gơs cau lơi tòm bol mê pal til ală mpồng hìu duh khoai dê, tồ bol mê ò chu ồs di cơnòng duh khoai Añ jê tòm bơta ò kwơ.” Yàng Jehôwa Gơnap Gơnoar Dờng Làm Jơh đơs lah: “Añ ò niam nùs di bol mê, mơ Añ ò dòp phan ơn lơi bơh di tê bol mê.

¹¹Bơh đah mattơngai lik jơl tus di đah mattơngai mut sơnđan Añ la dờng digùl ală lơgar, mơ kòp bă tiah gơs chu kơlhô ơn sơnđan Añ in, mơ dô nơm phan ơn sàng goh; Bơh sơnđan Añ la dờng digùl ală lơgar,” Yàng Jehôwa Gơnap Gơnoar Làm Jơh đơs behơ̆.

¹²Mơya bol mê neh lơh ngkòr ngkàc di sơnđan Añ tòm tŭ bol mê đơs lah: “Cơnòng duh khoai Yàng Jehôwa la ƀơ̆ ƀơl,” mơ đơs bơh phan ơn hơđang cơnòng lah: “Hơ̆ la phan pal sền òsơp.”

¹³Bol mê đơs lah: “Ñchi gơs dô bơta bòl glar do taih!” Bol mê chềr muh sền òsơp di Añ. Yàng Jehôwa Gơnap Gơnoar Dờng Làm Jơh đơs behơ̆. “Bol mê cèng ală phan neh tòmpìt sơmbrơt hala kwet gơlte mơ kòp jê, mơ ơn bol gơlơh gơs ală phan ơn duh khoai, gen Añ pal dòp bol gơ bơh di tê bol mê sơl ơ?” Yàng Jehôwa đơs behơ̆.

¹⁴“Pal srat sơntơm cau lơi in blac pơrlồm, la cau gơs tòm mpồl khai dê dô nơm phan poan jơng dam di pal mơ khai ho pơgon ơn gơ Yàng in, mơya khai ơn dô nơm phan poan jơng sồt rmàñ Yàng in!” Yàng Jehôwa Gơnap Gơnoar Dờng Làm Jơh đơs lah: “Bơh Añ la Bơtau Dờng, mơ sơnđan Añ la pal rngòt digùl ală làng bol.”