Read koho Malaci 3 Bible Online

Malaci 3 - koho bible

Malaci 3

¹“Do, Añ sồr cau kong sồr Añ jê, khai rơp rcang wàs gùng di đap Añ, mơ Yàng Jehôwa mơ bol mê jòi jat rơp nisơna tus tòm hìu duh khoai Kơnràñ dê. Hơ̆ la cau kong sồr bơta ho bal dê rơp tus, la cau mơ bol mê niam nùs, ngan Kơnràñ lòt tus, Yàng Jehôwa Gơnap Gơnoar Dờng Làm Jơh đơs behơ̆.

²Mơya, ñcau rơp kong jai tòm ngai Kơnràñ tus taih? Ñcau rgơi ntào jai tòm tŭ Kơnràñ tơlik să taih? Bơh Kơnràñ kung be ồs cau chài tŏ tiar goh, kung be ‘kơmbuh pìh’ cau chài pìh goh.

³Bơh Kơnràñ rơp nggui kung be cau chài tŏ tiar goh hala kung be cau chài tŏ priă. Kơnràñ rơp lơh goh ală cau Lebi, lơh bol khai in goh kung be màh mơ priă, jơl tus di tŭ bol khai ơn Yàng Jehôwa in phan ơn tòm bơta song ring,

⁴mơ ală phan ơn Juda mơ Jerusalem dê rơp geh Yàng Jehôwa niam nùs, kung be tòm ală ngai lài òr, kung be tòm ală sơnam yau òr.

⁵Gen, Añ rơp tus rềp mơ bol mê nàng cahrña. Añ rơp sơrbac sơrbang lơh cơng tòmdră mơ ală cau gru jơnang, ală cau rềs àr dri tơlàr mơ ală cau srat să ma blac, tòmdră mơ ală cau sa kơñau jền tơngai cau lơh broă ơpah dê, rồn bơklơn ală cau ùr bơnrau mơ cau kòn đòi, ò lơh song ring gơwèt mơ cau ơm tòp, mơ ò duh rngòt di Añ,” Yàng Jehôwa Gơnap Gơnoar Dờng Làm Jơh đơs behơ̆.

⁶“Bơh Añ la Yàng Jehôwa ò tŭ lơi tòmgơl; behơ̆, ơ bol mê la kòn sau Jakôp dê, bol mê ò gơkòl roh rui.

⁷Bulah bơh di tŭ ală ngai ală ồng pàng bol mê dê tus di tŭ do, bol mê neh wèt sang ală bơta sồr lam Añ jê mơ ò prap gàr ală bơta hơ̆. Rê wơl tĕ mơ Añ gen Añ rơp rê wơl mơ bol mê,” Yàng Jehôwa Gơnap Gơnoar Dờng Làm Jơh đơs behơ̆. Mơya bol mê lùp lah: “Mbe bol hi rơp rê wơl taih?”

⁸“Dô nă kòn mơnus rơp sa kơñau bơh di Yàng Tom Trồ sơl ơ? Mơya bol mê kơñau bơh di Añ.” Mơya bol mê lùp lah: “Mbe bol hi sa kơñau Kơnràñ taih? Bol mê neh sa kơñau tòm ală pơnah jơt mơ tòm ală phan ơn.

⁹Bol mê kong srat sơntơm, jơh dô nơm làng bol bol mê dê, tài bơh bol mê neh sa kơñau bơh di Añ.

¹⁰Cèng tĕ jơh ală pơnah jơt tơmut tòm hìu đam, tồ gơs phan sa tòm hìu Añ. Lòng tĕ Añ tòm bơta do,” Yàng Jehôwa Gơnap Gơnoar Dờng Làm Jơh đơs behơ̆. “Mơ sền dilah Añ ò pò ală mpồng dềt hơđang trồ bol mê in, mơ tuh bơta lơngai lơngò oă ngan bol mê in, tian gơs ò tang tiah prap tai!

¹¹Añ rơp lah pơrhơng srah nting nàng gơ ò sa tơnroh ală plai đo bơh ù bol mê dê; mơ ală tòm ño tòm ală suơn bol mê dê rơp ò rung plai gơ dê lài mơ tŭ tus kơnhai pic plai,” Yàng Jehôwa Gơnap Gơnoar Dờng Làm Jơh đơs behơ̆.

¹²“Gen jơh ală làng bol rơp kòp bol mê la gơs lơngai, bơh bol mê rơp la dô nơm lơgar hòn chò hừh hơh,” Yàng Jehôwa Gơnap Gơnoar Dờng Làm Jơh đơs behơ̆.

¹³Yàng Jehôwa đơs lah: “Bol mê neh đơs ală bơta ò niam tòmdră mơ Añ. Mơya bol mê lùp lah: ‘Ñchi bơta bol hi neh đơs tòmdră mơ Kơnràñ taih?’

¹⁴Bol mê neh đơs lah: ‘Duh broă Yàng Tom Trồ la ò kwơ. Ñchi bol he neh dòp geh tòm tŭ prap gàr ală bơta Kơnràñ sồr mơ cơnđòa lòt tòm bơta jê sồt moat jrùng di đap Yàng Jehôwa Gơnap Gơnoar Dờng Làm Jơh taih?

¹⁵Mơya tŭ do bol he kòp cau pơnhừ să la geh lơngai; ală cau lơh broă iơh bơsak ò di mìng geh bơtoah bơtoài, mơya tòm tŭ bol khai lòng Yàng Tom Trồ, bol khai kung geh klàs sơl.’”

¹⁶Tòm tŭ ală cau duh rngòt di Yàng Jehôwa tòmbơhbơr bal gen Yàng Jehôwa ơm iat mơ kơno. Dô pồt sră cih prap wơl neh geh cih di đap Kơnràñ bơh ală cau duh rngòt Yàng Jehôwa mơ duh rngòt di sơnđan Kơnràñ dê.

¹⁷Yàng Jehôwa Gơnap Gơnoar Dờng Làm Jơh đơs lah: “Bol khai rơp gơrê bal mơ Añ, tòm ngai tòm tŭ Añ lơh gơlik gơs, hơ̆ la sre brê krơi is Añ jê. Añ rơp pơlai bol khai kung be mè bèp pơlai ală kòn bol khai dê la cau duh broă bol khai.

¹⁸Mơ dô dơ̆ tai bol mê rơp gŏ bơta krơi is digùl cau song ring mơ cau iơh bơsak, digùl cau duh broă Yàng Tom Trồ mơ cau ò duh broă Kơnràñ.”