Read koho Mathiơ 12 Bible Online

Mathiơ 12 - koho bible

Mathiơ 12

¹Tŭ hơ̆ di di ngai Saƀat, Yàng Jesu lòt gan ƀlàng sre kòi mi. Ală cau bơtê Kơnràñ dê jơgloh, gen ròs kòi mi mơ sa.

²Cau Pharisi gŏ behơ̆, gen đơs mơ Kơnràñ lah: “Sền ne, ală cau bơtê Ồng dê lơh bơta ò geh gơnoar lơh tòm ngai Saƀat.”

³Kơnràñ đơs lah: “Bol mê òhềt sền sră cih bơh broă Dabit lơh tòm tŭ khai mơ ală cau lòt jat khai jơgloh ơ?

⁴Khai neh mut tòm hìu Yàng Tom Trồ dê, sa piang lă pơdơng, la piang lă mơ khai mơ ală cau lòt jat ò geh gơnoar sa, lòi mìng ală cau gơnoar ơn phan duh khoai in lơm.

⁵Hala bol mê òhềt sền tòm bơta boh lam, ală cau gơnoar ơn phan duh khoai lơh broă tòm hìu duh khoai tòm ngai Saƀat mơ tìs mơ bơta boh lam mơ ò gơkòl glài sơl ơ?

⁶Mơya Añ đơs mơ bol mê, tềng do gơs dô nă Cau dờng rlau mơ hìu duh khoai.

⁷Dilah bol mê neh git wă jơnau gơtha sèng do: ‘Añ kòñ bơta kòñ nđàc, ò kòñ phan ơn duh khoai ò,’ gen bol mê ò lơh nền glài ală cau ò gơs glài.

⁸Bơh Kòn mơnus la Yàng ngai Saƀat dê.”

⁹Yàng Jesu lik lòt bơh hơ̆ mơ mut tòm hìu jum cau Juda.

¹⁰Tềng hơ̆, gơs dô nă cau siar mpàng tê. Gơs cau lùp Kơnràñ lah: “Tòm ngai Saƀat, geh gơnoar sơmbòi hala ò?” Bol khai lùp behơ̆ nàng yă Kơnràñ.

¹¹Gen Kơnràñ đơs mơ bol khai lah: “Ñcau tòm bol mê dilah gơs dô nơm belàt dùh tòm trồm tòm ngai Saƀat mơ ò at yò tơlik gơ ơ?

¹²Tơ ài lah kòn mơnus la màng rlau mơ dô nơm belàt ò git nđò! Behơ̆ tòm ngai Saƀat geh gơnoar lơh broă niam.”

¹³Chòp Kơnràñ đơs mơ cau hơ̆ lah: “Pò tĕ tê mê dê.” Khai pò tê, mơ gơ gơs bòi kung be tê đah ne sơl.

¹⁴Ală cau Pharisi lik hơ bơdìh mơ bơyai mbe lơh nàng tơnroh Kơnràñ.

¹⁵Yàng Jesu git bơta hơ̆ gen pleh lòt bơh tềng hơ̆. Gơs oă cau lòt jat Kơnràñ, Kơnràñ sơmbòi jơh tơl nă,

¹⁶mơ bơkơ̆u bol khai bañ yal cau in bơh Kơnràñ,

¹⁷nàng gơlik di ngan be jơnau cau gơnoar hwơr Esai neh đơs lah:

¹⁸“Ne, Cau Duh Broă Añ, la Cau Añ neh sac rwah, La Cau kòñ gơboh Añ jê, niam nùs Añ tòm jơh ală bơta. Añ rơp ai Hwềng Goh Añ ơm hơđang Khai, Mơ Khai rơp yal bơta cahrña song ngan làng bol Bơdìh in.

¹⁹Khai rơp ò pơndang, ò driau nggà, Mơ ò gơs cau lơi kơno jơnau Khai tòm gùng.

²⁰Khai rơp ò dơrkă gai proh neh pă pơnie rau, mơ ò tơnchơt ồs mòr chơt dê brài đèng, Jơl tus di tŭ Khai lơh bơta song ngan in geh pha rlau.

²¹Mơ ală làng bol bơdìh rơp gơn kơnòm di sơnđan Khai.”

²²Tŭ hơ̆ gơs cau cèng tus hơ Yàng Jesu dô nă cau cà lơh, jơngo mơ kloat. Kơnràñ sơmbòi khai in, tian gơs cau kloat tus đơs mơ gơs gŏ.

²³Jơh mpồl làng bol ai lơh crih crài mơ đơs lah: “Do ngan la Kòn Dabit ơ?”

²⁴Tòm tŭ ală cau Pharisi kơno jơnau hơ̆ gen đơs lah: “Cau do mìng kơnòm di Beeljebul la bơtau cà mơ bơtrơh cà.”

²⁵Yàng Jesu git bơta kơlôi bol khai dê, gen đơs mơ bol khai lah: “Dilah lơgar lơi cah is gơ dê gen rơp roh gơprah; dilah ƀòn dờng hala hìu lơi cah is gơ dê gen rơp ò gơs kơ̆ tai.

²⁶Dilah cà Satan bơtrơh cà Satan gen gơcah is gơ dê, lơgar gơ mbe rgơi gam kơ̆ taih?

²⁷Ai dilah Añ kơnòm dê Beeljebul nàng bơtrơh cà, gen ală cau jat bol mê kơnòm dê ñcau nàng bơtrơh cà taih? Behơ̆ gen bol khai la cau rơp lơh nền glài bol mê.

²⁸Mơya dilah Añ kơnòm dê Hwềng Yàng Tom Trồ dê nàng bơtrơh cà, gen lơgar Yàng Tom Trồ dê neh tus hơ bol mê rau.

²⁹Hala mbe cau lơi rgơi mut tòm hìu cau pràn kơldang mơ phà kơñau phan, dilah lài ngan ò cap cau pràn hơ̆ taih? Pal cap cau pràn hơ̆ lài, gen sồng geh phà kơñau hìu khai dê.

³⁰Cau lơi ò tòmsòr mơ Añ la tòmdră mơ Añ; cau lơi ò tơrgòm pơjum Añ in gen lơh gơprah gơpring.

³¹Behơ̆ tàng Añ đơs mơ bol mê, kòp bơta tồi glài mơ đơs tràl sơrbil rơp geh toh cau in, mơya bơta đơs tràl sơrbil dê Yàng Hwềng Goh gen ò gơs tŭ lơi geh toh.

³²Dilah cau lơi đơs tòmdră mơ Kòn mơnus gen rơp geh toh, mơya cau lơi đơs tòmdră mơ Yàng Hwềng Goh gen ò geh toh bulah tòm rài do hala tòm rài tơnơ̆.”

³³“Dilah chi niam gen plai gơ kung niam, chi iơh gen plai gơ kung iơh, bơh sền plai gen git chi.

³⁴Ơ jơi bơtiàn bơs tur ne; bol mê la iơh bơsak gen mbe rgơi đơs bơta niam taih? Bơh jat bơta bềng lìu tòm nùs gen sồng bơr đơs tơlik.

³⁵Cau lơbơn niam bơh bơta niam tòm nùs gen tơlik bơta niam, ai cau iơh bơsak bơh bơta iơh bơsak tòm nùs gen tơlik bơta bơsak.

³⁶Añ đơs mơ bol mê, tòm ngai cahrña, cau rơp yal wơl kòp jơnau ò kwơ mơ bol khai neh đơs.

³⁷Bơh jơnau đơs mơ mê geh kòp la song ring, kung bơh jơnau đơs mơ mê kong lơh nền glài.”

³⁸Tŭ hơ̆ gơs ală cau bơto bơta boh lam mơ cau Pharisi đơs mơ Yàng Jesu lah: “Ơ Cau Bơto, bol hi kòñ sền Ồng lơh dô nơm tềl krơi.”

³⁹Kơnràñ ho lah: “Jơi bơtiàn iơh bơsak rềs àr bơrnàn do dan dô nơm tềl krơi, mơya rơp ò ai bol khai in tềl krơi lơi rlau mơ tềl krơi cau gơnoar hwơr Jôna dê.

⁴⁰Be Jôna neh ơm tòm kơndul ka dờng tòm pe ngai mơ pe mơnang, Kòn mơnus kung rơp ơm tòm kơnàng ù tòm pe ngai mơ pe mơnang behơ̆ sơl.

⁴¹Tòm ngai cahrña, cau Ninibe rơp ñă ntào mơ jơi bơtiàn do mơ lơh nền glài bol khai, bơh cau Ninibe neh gơjrañ sang glài tòm tŭ Jôna bơto yal, mơ do gơs dô nă Cau dờng rlau mơ Jôna!

⁴²Tòm ngai cahrña, bơtau ùr đah đơm rơp ñă ntào mơ jơi bơtiàn do mơ lơh nền glài bol khai, bơh khai bơh kơndòl plai ù lòt tus nàng iat bơta jak chài Salômôn dê, mơ do gơs dô nă Cau dờng rlau mơ Salômôn!”

⁴³“Dơ̆ cà lik bơh di cau lơi, gen gơ lòt làm tòm ală tiah rañ rsơh, jòi tiah rlô bòl, mơya jòi ò gơs.

⁴⁴Gen gơ đơs lah: ‘Añ rơp rê wơl hơ hìu mơ añ pa lik.’ Dơ̆ gơrê wơl, gŏ hìu gòi, neh pơs goh mơ rơndap niam,

⁴⁵gen gơ lòt tai mơ lam tus poh nơm cà ndai iơh bơsak rlau mơ gơ, mut ơm bal tềng hơ̆; behơ̆ rài kis cau hơ̆ gơlik iơh rmơh rlau mơ lài òr. Jơi bơtiàn iơh bơsak do kung rơp behơ̆ sơl.”

⁴⁶Tòm tŭ Yàng Jesu gam đơs mơ mpồl làng bol, gen mè mơ oh mi Kơnràñ dê tus ntào bơdìh, kòñ tòmbơhbơr mơ Kơnràñ.

⁴⁷Gơs cau yal mơ Kơnràñ lah: “Ne, mè mơ oh mi Ồng dê ntào bơdìh, kòñ tòmbơhbơr mơ Ồng.”

⁴⁸Kơnràñ ho khai lah: “Ñcau la mè Añ, ñcau la oh mi Añ taih?”

⁴⁹Kơnràñ pò tê sơnio ală cau bơtê mơ đơs lah: “Do la mè Añ mơ oh mi Añ.

⁵⁰Bơh cau lơi lơh jat nùs kòñ Bèp Añ jê ơm hơđang trồ, gen cau hơ̆ la oh mi, ruh lŏ mơ mè Añ jê.”