Read koho Mathiơ 14 Bible Online

Mathiơ 14 - koho bible

Mathiơ 14

¹Tòm tŭ hơ̆ Herôt la bơtau oh kơno jơnau pơnro bơh Yàng Jesu,

²gen đơs mơ ală cau kwang dong broă khai lah: “Do la Jang Ƀaptis, khai neh kis wơl bơh bơta chơt, gen tàng rgơi lơh ală broă gơnap gơnoar hơ̆ tòm khai.”

³Tài bơh broă Herôdias la bau ùr Philip oh Herôt dê, gen tàng Herôt neh kup cap Jang krơ̆ tòm hìu jàm.

⁴Bơh Jang neh ràc bơtau lah: “Bơtau bau mơ cau ùr hơ̆ la tìs mơ bơta boh lam.”

⁵Khai kòñ tơnchơt Jang, mơya rngòt di mpồl làng bol tài bơh bol khai sền Jang la cau gơnoar hwơr.

⁶Tòm bơta pơjum sa kah ngai deh Herôt, kòn ùr Herôdias dê tòmya digùl tiah ñô sa, niam nùs Herôt oă ngan,

⁷tian gơs Herôt srat să mơ ho ai khai in bơta lơi khai kòñ dan.

⁸Tài bơh mè chồl bơtrut gen khai đơs lah: “Dan ai añ in bồ Jang Ƀaptis ơn tòm sơlào tềng do.”

⁹Bơtau moat jrùng ngan, mơya tài bơh neh rlau srat să mơ tài bơh ală cau ñô sa bal mơ khai, gen khai sồr ai kòn ùr hơ̆ in.

¹⁰Bơtau sồr cau lòt koh bồ Jang tòm hìu jàm,

¹¹ơn bồ tòm sơlào mơ cèng ai kòn ùr in, mơ khai cèng mè khai in.

¹²Gen ală cau bơtê Jang dê tus ai ƀồc mơ tơp, mơ lòt yal Yàng Jesu in.

¹³Dơ̆ Yàng Jesu kơno jơnau hơ̆ gen lòt bơh tiah hơ̆ mut tòm ơhò, tus hơ tiah ngềt ngơt. Tòm tŭ kơno behơ̆, gen mpồl làng bol bơh ală ƀòn dờng lòt jơng jat Kơnràñ.

¹⁴Kơnràñ lik bơh ơhò, gŏ mpồl làng bol oă gen nđàc sơngit di bol khai mơ sơmbòi ală cau kòp jê in.

¹⁵Tus di mho, ală cau bơtê tus hơ Kơnràñ mơ đơs lah: “Tiah do ngềt ngơt mơ trồ neh mho rau; dan ai mpồl làng bol in lòt mut tòm ală ƀòn nàng rwat phan sa.”

¹⁶Mơya Yàng Jesu đơs lah: “Bol khai ò càng lòt; să tòm bol mê ai bol khai in sa.”

¹⁷Cau bơtê đơs mơ Kơnràñ lah: “Tềng do bol hi gơs mìng pram nơm piang lă mơ bàr nơm ka lơm.”

¹⁸Kơnràñ đơs lah: “Cèng tĕ Añ in hơ do.”

¹⁹Gen Kơnràñ sồr mpồl làng bol nggui dê ñhơt, ai pram nơm piang lă mơ bàr nơm ka hơ̆, pò mat hơ trồ mơ ai lơngai, gen dơrkă piang lă tong ală cau bơtê in, ală cau bơtê tòmpà mpồl làng bol in.

²⁰Jơh tơl nă sa hòm, ai ală pet dơrkă tơngkah gen bol khai dòñ bềng jơt bàr bài.

²¹Ntum khà cau sa la pơgap pram rbô nă, ò kòp cau ùr mơ cau kơnòm.

²²Tŭ hơ̆ mo Yàng Jesu chồl ală cau bơtê mut tòm ơhò, tiă lài đah bơtĭ ne dàlềng, tòm tŭ Kơnràñ ai mpồl làng bol in rê.

²³Neh sir rau, gen Kơnràñ guh is hơđang mơnơm nàng hòi dan. Tus di mang, Kơnràñ ơm is dô nă.

²⁴Tòm tŭ hơ̆ ơhò neh tus digùl dàlềng rau. Bơh càl khồm sơlơ̆u gen tàng ryà dà lơnggac ơhò.

²⁵Tus di jơ drơng poan mang hơ̆, Yàng Jesu lòt hơđang nha dàlềng mơ tus hơ bol khai.

²⁶Dơ̆ ală cau bơtê gŏ Kơnràñ lòt hơđang nha dàlềng, gen gơnsràng rngòt mơ đơs lah: “Hơ̆ la dô nơm mu!” Gen bol khai driau dờng mơ rngòt rngơt.

²⁷Yàng Jesu đơs mo mơ bol khai lah: “Kơ̆ tĕ nùs; Añ do, bañ rngòt.”

²⁸Chòp Pier ho Kơnràñ lah: “Ơ Yàng, dilah ngan la Kơnràñ, dan sồr Añ lòt hơđang nha dà tus hơ Kơnràñ.”

²⁹Kơnràñ đơs lah: “Tus tĕ.” Pier lik bơh ơhò lòt hơđang nha dà tus hơ Yàng Jesu.

³⁰Mơya tòm tŭ gŏ càl dờng, gen Pier rngòt ngan mòr gơkram tòm dà, gen hòi dờng lah: “Ơ Yàng, dong añ!”

³¹Yàng Jesu ai tê sơmbat mo di khai mơ đơs lah: “Ơ cau gơs dô êt bơta dòn, ñchi bơh tài mê pin taih?”

³²Tòm tŭ bol khai mut tòm ơhò rau, gen càl thit ngềt.

³³Gen ală cau tòm ơhò tus cùn khoai Kơnràñ mơ đơs lah: “Kơnràñ ngan la Kòn Yàng Tom Trồ dê.”

³⁴Tòm tŭ neh tiă dàlềng rau, gen bol khai tus tòm kơnhwàl Genesaret.

³⁵Ală cau tòm kơnhwàl hơ̆ đal git Kơnràñ gen sồr cau lòt yal làm tiah hơ̆, mơ cèng jơh ală cau kòp jê tus hơ Kơnràñ,

³⁶rac dan mơ Kơnràñ ai bol khai in mìng ƀư di tiang ào Kơnràñ lơm. Cau lơi ƀư di gơ gen geh bòi jơh.