Read koho Mathiơ 15 Bible Online

Mathiơ 15 - koho bible

Mathiơ 15

¹Tŭ hơ̆ gơs ală cau Pharisi mơ ală cau bơto bơta boh lam bơh Jerusalem tus hơ Yàng Jesu mơ lùp lah:

²“Ñchi bơh tài ală cau bơtê Ồng dê lơh tìs bơta òs yau ală cau yau dê taih? Bơh bol khai ò rào tê lài mơ tŭ sa.”

³Kơnràñ ho lah: “Ñchi bơh tài bol mê kung bơh jơnau òs yau bol mê dê mơ lơh tìs bơta sồr lam Yàng Tom Trồ dê taih?

⁴Bơh Yàng Tom Trồ neh đơs lah: ‘Dòn duh tĕ mè bèp mê,’ mơ tai, ‘Cau lơi wàc sơrpah mè bèp, gen ngan pal chơt.’

⁵Mơya bol mê đơs lah: ‘Dilah cau lơi đơs mơ mè bèp lah: Ală bơta lơi añ rgơi dong kòl mè bèp, añ neh ơn Yàng Tom Trồ in rau, gen cau hơ̆ ò càng dòn duh mè bèp tai.’

⁶Behơ̆ bol mê neh lơh gơnoar sồr Yàng Tom Trồ dê gơlik ò kwơ tài bơh jơnau òs yau bol mê dê.

⁷Ơ ală cau ma blac! Esai neh đơs hwơr di ngan bơh bol mê lah:

⁸‘Làng bol do ai sơndồi mơ dòn duh Añ; Mơya nùs bol khai ngài ngan bơh Añ;

⁹Bol khai duh khoai Añ la ò kwơ, Bơh gùng duh khoai bol khai dê mìng la bơta sồr lam kòn mơnus dê lơm.’”

¹⁰Chòp Kơnràñ hòi mpồl làng bol tus mơ đơs lah: “Iat mơ wă tĕ!

¹¹Ò di phan mut tòm bơr lơh ƀơ̆ ƀơl cau in ò, mơya phan lik bơh di bơr cau dê sồng lơh ƀơ̆ ƀơl cau in.”

¹²Gen ală cau bơtê tus đơs lah: “Kơnràñ git lah ală cau Pharisi kơno jơnau hơ̆ gen gơtup tìs sơl ơ?”

¹³Kơnràñ ho lah: “Chi lơi mơ Bèp Añ hơđang trồ ò tam gen pal dus.

¹⁴Lòi tĕ dò bol khai; bol khai la cau jơngo mơ lam gùng. Dilah cau jơngo lam cau jơngo, gen jơh bàr nă rơp dùh tòm trồm tơrluh.”

¹⁵Pier đơs mơ Kơnràñ lah: “Dan yal jơnau gơtha pơnyơu hơ̆ bol hi in.”

¹⁶Kơnràñ đơs lah: “Bol mê kung òhềt git wă sơl ơ?

¹⁷Bol mê òhềt wă lah phan lơi mut tòm bơr gen mù tòm kơndul, mơ lik di tiah ò ơ?

¹⁸Mơya ală bơta lik bơh di bơr la gơlik bơh nùs, hơ̆ la bơta lơh ƀơ̆ ƀơl cau in.

¹⁹Bơh tòm nùs mơ gơlik ală bơta kơlôi iơh, tơnchơt cau, rềs àr, bơrnàn, ntung kơñau, lơh cơng blac, mơ jơnau tràl sơrbil.

²⁰Hơ̆ la ală bơta lơh ƀơ̆ ƀơl cau in, mơya sa mơ ò rào tê ò di lơh cau in ƀơ̆ ƀơl ò.”

²¹Bơh tềng hơ̆ Yàng Jesu pleh lòt tòm kơnhwàl Tirơ mơ Sidôn.

²²Ne, gơs dô nă cau ùr bơh lơgar Kanaan lik bơh tiah hơ̆ mơ rac dan lah: “Ơ Yàng, Kòn Dabit dê, dan nđàc sơngit di añ! Kòn ùr añ gơkòl cà lơh, bòl glar ngan.”

²³Mơya Kơnràñ ò ho dô jơnau lơi. Gen ală cau bơtê tus dan mơ Kơnràñ lah: “Dan sồr khai rê, bơh khai jat tơnơ̆ bol he mơ hòi rac sùm.”

²⁴Kơnràñ ho lah: “Añ mìng geh sồr lòt tus hơ ală belàt tìs nrah hìu Israel dê lơm.”

²⁵Mơya cau ùr tus cùn khoai Kơnràñ mơ đơs lah: “Ơ Yàng, dan dong kòl añ.”

²⁶Kơnràñ ho lah: “Ò di ai piang lă ală kòn sau dê mơ sang so in.”

²⁷Mơya khai đơs lah: “Ơ Yàng, ngan behơ̆, mơya kòn so kung geh sa ală phan pìng bơh cơnòng cau tòm gơ dê sơl.”

²⁸Gen Yàng Jesu đơs lah: “Ơ cau ùr gen, bơta dòn ai la dờng ngan! Gơlik gơs tĕ be nùs ai kòñ!” Kòn ùr khai geh bòi bơh di jơ hơ̆.

²⁹Yàng Jesu sang tềng hơ̆ lòt rò gah dàlềng Galile, gen guh hơđang mơnơm mơ nggui.

³⁰Mpồl làng bol oă tus hơ Kơnràñ, cèng bal ală cau gơlte, cau jơngo, cau kloat, cau pă le, mơ oă cau kòp jê ndai, ơn di jơng Yàng Jesu, gen Kơnràñ sơmbòi bol khai in.

³¹Mpồl làng bol ai lơh krơi ngan dơ̆ gŏ ală cau kloat tus đơs, cau pă geh bòi, cau gơlte jơng geh lòt, cau jơngo geh gŏ, gen jòng ro Yàng Tom Trồ Israel dê.

³²Yàng Jesu hòi ală cau bơtê tus mơ đơs lah: “Añ nđàc sơngit di mpồl làng bol do, tài bơh neh pe ngai rau bol khai kư̆ ơm mơ Añ, mơ ò gơs phan lơi sa. Añ ò bài lòi bol khai in rê jơgloh, rngòt bol khai hồi tòm gùng mòn.”

³³Ală cau bơtê ho lah: “Tòm tiah ngềt ngơt do, mbơh bol he jòi tơl piang lă nàng ai mpồl làng bol oă behơ̆ in sa hòm taih?”

³⁴Yàng Jesu lùp lah: “Bol mê gơs nđò nơm piang lă taih?” Bol khai ho lah: “Gơs poh nơm piang lă mơ dô êt ka dềt.”

³⁵Kơnràñ sồr mpồl làng bol nggui di ù.

³⁶Chòp Kơnràñ ai poh nơm piang lă mơ ka, ưnngài, dơrkă gen tong ală cau bơtê in, ală cau bơtê tòmpà mpồl làng bol in.

³⁷Jơh tơl nă sa hòm, ai ală pet tơngkah gen bol khai dòñ bềng poh bài dờng.

³⁸Ntum khà cau sa la poan rbô nă, ò kòp cau ùr mơ cau kơnòm.

³⁹Tơnơ̆ mơ tŭ ai mpồl làng bol in rê, gen Yàng Jesu mut tòm ơhò mơ tiă hơ kơnhwàl Magadan.