Read koho Mathiơ 16 Bible Online

Mathiơ 16 - koho bible

Mathiơ 16

¹Ală cau Pharisi mơ cau Saduse tus hơ Yàng Jesu, dan lơh bol khai in sền dô nơm tềl krơi bơh trồ nàng lòng Kơnràñ.

²Mơya Kơnràñ ho lah: “Tŭ trồ mho bol mê đơs lah: ‘Gơ rơp prang, bơh trồ pơrhê.’

³Ai àng drim bol mê đơs lah: ‘Ngai do gơs mìu càl, bơh trồ pơrhê mơ mƀur.’ Bol mê git sền đal bơta gơtòmgơl rùp să trồ dê, mơya ò rgơi sền đal ală tềl sơnio tŭ tơngai dê.

⁴Jơi bơtiàn iơh bơsak rềs àr bơrnàn do dan dô nơm tềl krơi, mơya rơp ò ai bol khai in tềl krơi lơi rlau mơ tềl krơi Jôna dê.” Gen Kơnràñ lòi bol khai mơ lòt.

⁵Tòm tŭ ală cau bơtê tus đah ne, hŭi cèng piang lă.

⁶Yàng Jesu đơs mơ bol khai lah: “Kơrhia tĕ mơ kơrmap gàr să he bơh kañ cau Pharisi mơ cau Saduse dê.”

⁷Bol khai bơyai bal lah: “Hơ̆ la tài bơh bol he ò cèng piang lă.”

⁸Yàng Jesu git bơta hơ̆ gen đơs lah: “Ơ cau gơs dô êt bơta dòn, ñchi bơh tài bol mê bơyai bal bơh bơta bol mê ò gơs piang lă taih?

⁹Bol mê gam òhềt git wă ơ? Kung ò kah wơl pram nơm piang lă ai pram rbô nă cau in, mơ bol mê neh dòñ nđò bài tơngkah taih?

¹⁰Mơ poh nơm piang lă ai poan rbô nă cau in, mơ bol mê neh dòñ nđò bài tơngkah taih?

¹¹Mbe bol mê ò git wă lah ò di bơh piang lă mơ Añ đơs hơ̆ ơ? Mơya Añ đơs kơrhia tĕ bơh kañ cau Pharisi mơ cau Saduse dê.”

¹²Tŭ hơ̆ sồng bol khai git wă lah Kơnràñ ò di sồr kơrhia bơh kañ lơh piang lă ò, mơya bơh bơta bơto sồr cau Pharisi mơ cau Saduse dê.

¹³Tŭ Yàng Jesu mut tòm kơnhwàl Sesare Philip, gen lùp ală cau bơtê lah: “Jat jơnau cau đơs gen Kòn Mơnus la ñcau taih?”

¹⁴Bol khai đơs lah: “Cau ƀà đơs la Jang Ƀaptis, cau ndai đơs la Eli, cau ndai tai đơs la Jeremi hala dô nă tòm ală cau gơnoar hwơr.”

¹⁵Kơnràñ đơs lah: “Ai bol mê gen đơs Añ la ñcau taih?”

¹⁶Simôn Pier ho lah: “Kơnràñ la Bơtau Krist Kòn Yàng Tom Trồ gam kis sùm.”

¹⁷Yàng Jesu đơs mơ khai lah: “Ơ Simôn kòn Jôna, lơngai mê in, bơh ò di poac mơ mhàm yal tơlik mê in git bơta do ò, mơya hơ̆ la Bèp Añ ơm hơđang trồ.

¹⁸Mơ Añ kung đơs mơ mê lah: mê la Pier, Añ rơp bơt bơtào Hìu Jum Goh Añ hơđang lŭ klềr do, ală mpồng lơgar làng ƀồc ò geh pha rlau mơ Gơ.

¹⁹Añ rơp jào mê in kai mpồng lơgar đang trồ. Bơta lơi mê kơt tòm ù gen kung rơp kơt hơđang trồ sơl, mơ bơta lơi mê hồ tòm ù gen kung rơp geh hồ hơđang trồ sơl.”

²⁰Gen Kơnràñ bơkơ̆u ală cau bơtê bañ yal cau lơi in git Kơnràñ la Bơtau Krist.

²¹Bơh tŭ hơ̆, Yàng Jesu sơntòm yal ală cau bơtê in git Kơnràñ pal lòt tus hơ Jerusalem, pal kong oă bơta jê sồt bòl glar bơh ală cau kwang kra, ală cau gơnoar lam bồ ơn phan duh khoai, ală cau bơto bơta boh lam, mơ pal kong tơnchơt, tus dê ngai pe gen geh kis wơl.

²²Pier lam Kơnràñ lik is mơ lah pơrhơng lah: “Ơ Yàng, Yàng Tom Trồ ò kòñ behơ̆ ò. Bơta hơ̆ ò tŭ lơi tus di Kơnràñ ò.”

²³Mơya Kơnràñ wơlke đơs mơ Pier lah: “Ơ cà Satan, ruc tĕ tơnơ̆ Añ! Mê lơh kai gơtup tìs Añ in, bơh nùs kơlôi mê ò gơwèt hơ broă Yàng Tom Trồ, mơya gơwèt hơ broă kòn mơnus dê.”

²⁴Chòp Yàng Jesu đơs mơ ală cau bơtê lah: “Dilah cau lơi kòñ jat Añ, gen pơndang sang tĕ să he, tui chi pơng he mơ jat Añ.

²⁵Bơh cau lơi kòñ dong klàs bơta kis he gen gơ rơp roh, ai cau lơi tài bơh Añ mơ roh bơta kis he gen rơp bàn wơl.

²⁶Dilah cau lơi geh jơh dunnia mơ roh hwềng soàn he, gen gơs ñchi kwơ cau hơ̆ in taih? Hala ñchi ai nàng tòmgơl mơ hwềng soàn he taih?

²⁷Bơh Kòn Mơnus rơp ai bơta gơklŏ Bèp Khai dê mơ tus bal mơ ală cau gơnrơh. Gen Khai rơp ai phan ƀàn kòp nă cau in jat be broă bol khai neh lơh.

²⁸Di ngan Añ đơs mơ bol mê, tòm ală cau ntào tềng do, gơs cau rơp ò chơt lài mơ tŭ gŏ Kòn Mơnus tus tòm lơgar Khai dê.”