Read koho Mathiơ 17 Bible Online

Mathiơ 17 - koho bible

Mathiơ 17

¹Prau ngai tơnơ̆, Yàng Jesu lam Pier, Jakơ mơ Jang la oh khai dê, guh is hơđang mơnơm jòng.

²Kơnràñ srơh să di dap bol khai, muh mat Kơnràñ àng gơcrà be mattơngai, ào Kơnràñ gơlik bò be bơta àng.

³Ne, gơs Môise mơ Eli tơlik mat mơ tòmbơhbơr mơ Kơnràñ.

⁴Gen Pier đơs mơ Yàng Jesu lah: “Ơ Yàng, bol he ơm tềng do niam ngan. Dilah Kơnràñ kòñ, gen añ rơp lơh pe nơm sàl tềng do: dô nơm Kơnràñ in, dô nơm Môise in mơ dô nơm Eli in.”

⁵Tòm tŭ khai gam đơs, gơs dô puk mhwal àng lơr jơm gòm bol khai, mơ gơs jơnau bơh tòm mhwal đơs lah: “Do la Kòn kòñ gơboh Añ jê, niam nùs Añ tòm ală bơta; iat tĕ Khai.”

⁶Dơ̆ ală cau bơtê kơno jơnau hơ̆ gen gơ blup mat tòm ù mơ rngòt rngơt ngan.

⁷Gen Yàng Jesu tus ƀư dê bol khai mơ đơs lah: “Ntào tĕ, bañ rngòt.”

⁸Bol khai pò mat gen ò gŏ cau lơi, mìng gŏ dô nă Yàng Jesu.

⁹Tòm tŭ mù bơh mơnơm, Yàng Jesu bơkơŭ bol khai lah: “Bañ yal bơta gơtơnggŏ hơ̆ cau lơi in, jơl tus di tŭ Kòn Mơnus kis wơl bơh bơta chơt.”

¹⁰Ală cau bơtê lùp Kơnràñ lah: “Behơ̆ gen ñchi bơh tài ală cau bơto bơta boh lam đơs Eli pal tus lài taih?”

¹¹Kơnràñ ho lah: “Ngan Eli pal tus nàng bơtào wơl jơh ală bơta,

¹²mơya Añ đơs mơ bol mê lah Eli neh tus rau, mơya cau ò git đal khai, mơ lơh di khai jat nùs kòñ bol khai dê, Kòn Mơnus kung rơp kong bòl glar jê sồt bơh bol khai behơ̆ sơl.”

¹³Gen ală cau bơtê git wă Kơnràñ đơs hơ̆ la sơnio bơh Jang Ƀaptis.

¹⁴Tòm tŭ Yàng Jesu mơ ală cau bơtê tus wơl hơ mpồl làng bol, gen gơs dô nă cau tus cùn gơltang di đap Kơnràñ mơ đơs lah:

¹⁵“Khoai Yàng, dan nđàc sơngit di kòn klau añ, bơh khai kòp kroă sơnrang, jê sồt oă ngan; oă dơ̆ khai gơpừ tòm ồs, ƀà dùh tòm dà.

¹⁶Añ neh cèng khai tus hơ ală cau bơtê Kơnràñ dê, mơya bol khai ò rgơi sơmbòi.”

¹⁷Yàng Jesu ho lah: “Ơ jơi bơtiàn ò dòn mơ kơldang bồ ne, Añ kong ơt mơ bol mê jơl tus di tŭ lơi taih? Cèng tĕ kòn hơ̆ tus tềng do Añ in.”

¹⁸Gen Yàng Jesu lah pơrhơng cà, cà lik mo bơh oh hơ̆, mơ bơh di jơ hơ̆ khai geh bòi.

¹⁹Gen ală cau bơtê tus is hơ Yàng Jesu mơ đơs lah: “Ñchi bơh tài bol hi ò rgơi bơtrơh cà hơ̆ taih?”

²⁰Kơnràñ ho lah: “Tài bơh bol mê gơs dô êt bơta dòn. Bơh di ngan Añ đơs mơ bol mê, dilah bol mê gơs bơta dòn be dô nơm gar sơbê, gen rơp đơs mơ mơnơm do lah: ‘Ñă lòt tĕ bơh tềng do tus hơ ne,’ gen gơ lòt; mơ ò gơs bơta lơi la bol mê ò rgơi lơh.” [

²¹Ală jơi cà do dilah ò hòi dan mơ ơt sa gen ò gơs cau lơi rgơi bơtrơh gơ.]

²²Tòm tŭ gam ơm tòm Galile, Yàng Jesu đơs mơ ală cau bơtê lah: “Kòn Mơnus rơp gơkòl bơtào tòm tê cau.

²³Bol hơ̆ rơp tơnchơt Kơnràñ, tus di ngai pe Kơnràñ rơp kis wơl.” Gen ală cau bơtê moat jrùng ngan.

²⁴Tòm tŭ bol khai neh tus tòm Kapenaum, gen ală cau dar dia hìu duh khoai tus lùp Pier lah: “Cau bơto bol mê ò boh dia ơ?”

²⁵Khai ho lah: “Gơs.” Dơ̆ khai mut tòm hìu gen Yàng Jesu lùp lài khai lah: “Ơ Simôn, mbe mê kơlôi taih? Ală cau bơtau tòm ù dar dia phan mơ dar dia să di ñcau taih? Dar di kòn klau bol khai dê hala di cau bơdìh taih?”

²⁶Pier đơs lah: “Di cau bơdìh.” Yàng Jesu đơs lah: “Behơ̆ ală kòn klau ò gơs boh dia.

²⁷Mơya tồ bol he ò lơh kai gơtup tìs bol khai in, gen lòt tĕ đàr ka tòm dàlềng, kup ka lơi mê geh lài. Mê tè bơr gơ gen rơp gŏ dô đong priă, ai tĕ mơ boh dia Añ mơ mê in.”