Read koho Mathiơ 18 Bible Online

Mathiơ 18 - koho bible

Mathiơ 18

¹Tŭ hơ̆ ală cau bơtê tus lùp Yàng Jesu lah: “Ñcau la cau dờng màng rlau tòm lơgar đang trồ taih?”

²Yàng Jesu hòi dô nă kơnòm dềt tus, ơn digùl bol khai,

³mơ đơs lah: “Di ngan Añ đơs mơ bol mê, dilah bol mê ò tòmgơl mơ gơlik gơs be kơnòm dềt, gen ò tŭ lơi geh mut tòm lơgar đang trồ.

⁴Behơ̆ cau lơi pơndêt să be kơnòm dềt do, gen khai la dờng màng rlau tòm lơgar đang trồ.

⁵Ai cau lơi bơh sơnđan Añ mơ wă rò dô nă kơnòm dềt be do, hơ̆ la wă rò Añ.”

⁶Mơya cau lơi lơh gơtup tìs dô nă tòm ală kơnòm dềt neh dòn Añ do, gen chan kơt mpal lŭ dờng di ngko cau hơ̆ mơ tơnkram khai tòm kơnàng dàlềng la niam rlau.

⁷“Bòl glar dunnia in, bơh ală kai lơh gơtup tìs! Bulah pal gơs ală kai lơh gơtup tìs; mơya bòl glar cau lơi in lơh kai hơ̆.

⁸Dilah tê hala jơng mê lơh mê in gơtup tìs, koh tĕ mơ sơrbì gơ, chan mê lut tê hala lut jơng mơ geh mut tòm bơta kis la niam rlau mơ gơs bàr nơm tê hala bàr nơm jơng mơ gơkòl sơrbì tòm ồs gam sùm sùm.

⁹Dilah mat mê lơh mê in gơtup tìs, gen kơlwĕ tĕ mơ sơrbì gơ, chan mê gơs dô đah mat mơ geh mut tòm bơta kis la niam rlau mơ gơs bàr đah mat mơ gơkòl sơrbì tòm ồs brah tìng.”

¹⁰“Kơrhia tĕ, bañ sền òsơp di dô nă tòm ală cau dềt do, bơh Añ đơs mơ bol mê, hơđang trồ ală cau gơnrơh bol khai dê gŏ sùm mat Bèp Añ ơm hơđang trồ. [

¹¹Bơh kòn mơnus neh tus nàng dong klàs cau gơkòl roh rui.]

¹²Mbe bol mê kơlôi taih? Dilah cau lơi gơs dô rhiang nơm belàt mơ dô nơm neh lòt tìs nrah, gen ò di lòi sin jơt sin nơm tềng hơ̆, mơ guh hơđang mơnơm nàng jòi dô nơm neh lòt tìs nrah ò ơ?

¹³Di ngan Añ đơs mơ bol mê, dilah khai jòi bàn gen bơh gơ khai hòn chò rlau mơ bơh sin jơt sin nơm ò lòt tìs nrah ne.

¹⁴Kung behơ̆ sơl, Bèp bol mê ơm hơđang trồ ò kòñ dô nă tòm ală cau dềt do roh rui.”

¹⁵“Dilah oh mi mê tìs glài mơ mê, gen lòt tĕ yal khai in git glài hơ̆ tòm tŭ gơs mìng mê mơ khai lơm. Dilah khai iat mê, gen mê gơs oh mi wơl.

¹⁶Mơ dilah khai ò iat, gen lam tĕ dô nă hala bàr nă cau lòt bal mơ mê, tồ jơnau bàr pe nă cau lơh cơng mơ kòp jơnau geh lơh nền.

¹⁷Ai dilah cau hơ̆ ò bài iat bol khai, gen yal tĕ mơ Hìu Jum Goh; dilah khai kung ò bài iat Hìu Jum Goh, gen sền tĕ khai kung be cau bơdìh mơ cau dar dia.”

¹⁸“Di ngan, Añ đơs mơ bol mê, bơta lơi bol mê kơt tòm ù, gen kung rơp kơt hơđang trồ, mơ bơta lơi bol mê hồ tòm ù gen kung rơp geh hồ hơđang trồ sơl.

¹⁹Añ đơs tai mơ bol mê, dilah bàr nă tòm bol mê gơs dô nùs bal tòm ù mơ dan bơta lơi, gen Bèp Añ ơm hơđang trồ rơp lơh bol khai in bơta hơ̆.

²⁰Bơh tiah lơi gơs bàr pe nă ai sơnđan Añ mơ pơjum bal, gen Añ ơm digùl bol khai.”

²¹Tŭ hơ̆ Pier tus lùp Kơnràñ lah: “Ơ Yàng, dilah oh mi añ tìs glài mơ añ, gen nđò dơ̆ añ toh glài khai in taih? Jơl tus di poh dơ̆ sơl ơ?”

²²Yàng Jesu ho lah: “Añ ò đơs mơ mê lah mìng poh dơ̆ lơm ò, mơya jơl tus di poh jơt dơ̆ poh.

²³Behơ̆ tàng, lơgar đang trồ la kung be cau bơtau ne kòñ ting khà priă mơ ală cau dĭ khai dê.

²⁴Tòm tŭ rơp sơntòm ting khà priă, gen gơs cau cèng dô nă cau kòl dồs dô tơlak talơng.

²⁵Bơh khai ò gơs phan lơi nàng tơm, gen bơtau sồr tac khai mơ bau kòn mơ jơh ală phan mơna khai dê nàng tơm dồs.

²⁶Gen cau dĭ tơmbic să di jơng bơtau mơ cùn khoai lah: ‘Ơ bơtau, dan ơt gơn añ, gen añ rơp tơm jơh ồng in.’

²⁷Cau bơtau gơs nùs nđàc sơngit, lòi khai rê mơ sang tơn dồs.

²⁸Mơya cau dĭ hơ̆ lik lòt, tìp dô nă cau bơyô lơh broă bal, kòl dồs mơ khai dô rhiang dơnie, gen khai kup cau hơ̆, sơmbat klèn di ngko mơ đơs lah: ‘Tơm tĕ dồs añ in!’

²⁹Cau bơyô lơh broă hơ̆ tơmbic să rac dan lah: ‘Dan ơt gơn añ, gen añ rơp tơm bi in.’

³⁰Mơya khai ò bài, mơ kư̆ kup jàm cau hơ̆ jơl tus di tŭ tơm jơh dồs.

³¹Ală cau bơyô ndai lơh broă bal gŏ behơ̆ gen moat jrùng ngan, lòt yal mơ cau bơtau ală bơta neh gơlik hơ̆.

³²Gen cau bơtau hòi cau dĭ hơ̆ tus mơ đơs lah: ‘Ơ cau dĭ iơh bơsak ne! Añ neh sang tơn jơh dồs mê dê tài bơh mê neh rac dan mơ añ.

³³Ai mê ò nđàc sơngit di gơp bơyô lơh broă bal mơ mê be añ neh nđàc sơngit di mê taih?’

³⁴Cau bơtau gơhào gơjrañ ngan, mơ jào khai cau at bồ hìu jàm in, jơl tus di tŭ tơm jơh dồs.

³⁵Dilah kòp nă tòm bol mê ò jơh nùs toh glài oh mi he in, gen Bèp Añ hơđang trồ kung rơp lơh bol mê in behơ̆ sơl.”