Read koho Mathiơ 22 Bible Online

Mathiơ 22 - koho bible

Mathiơ 22

¹Yàng Jesu đơs pơnyơu tai mơ bol khai lah:

²“Lơgar đang trồ kung be dô nă cau bơtau ne lơh dô bơta yò sa tòmbau kòn klau khai in.

³Bơtau sồr ală cau dĭ lòt hòi ală cau neh geh jà tus sa tòmbau, mơya bol khai ò bài tus.

⁴Bơtau sồr tai ală cau dĭ ndai mơ nting lah: ‘Đơs tĕ mơ cau neh geh jà lah: Do añ neh rcang sir phan sa rau, kơnrồ mơ phan poan jơng lơmă neh lơh poac rau. Jơh ală bơta neh sir rau. Tus tĕ sa tòmbau.’

⁵Mơya bol khai sền ò ơn nùs di jơnau hòi jà mơ kư̆ lòt gùng is; cau do lòt tòm sre, cau ne lòt kă bro.

⁶Ai cau ndai kup cau dĭ cau bơtau dê, bơtat bơtròh mơ tơnchơt.

⁷Cau bơtau gơhào gơjrañ, gen sồr ală cau ling lòt tơnroh ală cau tơnchơt cau hơ̆, mơ chu ƀòn dờng bol khai dê.

⁸Chòp cau bơtau đơs mơ ală cau dĭ khai dê lah: ‘Bơta sa tòmbau neh lơh sir rau, mơya ală cau neh geh jà hơ̆ ò gơs cau lơi di pal.

⁹Behơ̆ lòt tĕ tus di ală jum gùng, dilah tìp cau lơi gen jà jơh tus sa tòmbau.’

¹⁰Ală cau dĭ lòt làm ală gùng me pơjum jơh ală cau bol khai tìp, cau iơh bal mơ cau niam, behơ̆ ơdŭ sa tòmbau bềng cau nac.

¹¹Cau bơtau mut sền ală cau nac mơ gŏ dô nă cau ò soh ào pơjum sa tòmbau,

¹²gen đơs mơ khai lah: ‘Ơ bi, mbe lơh mê ò soh ào pơjum sa tòmbau mơ rgơi mut tềng do taih?’ Cau hơ̆ ò gơ ai đơs.

¹³Gen cau bơtau sồr ală cau duh broă lah: ‘Cap tĕ tê jơng khai mơ sơrbì khai tòm tiah klam jơngo hơ bơdìh, la tiah rơp gơs ñìm rac mơ rkiat sề.’

¹⁴Bơh gơs oă cau geh hòi, mơya dô êt geh sac rwah.”

¹⁵Tŭ hơ̆ ală cau Pharisi lik lòt, tòmbơyai bal nàng jòi kup tòm jơnau đơs Yàng Jesu dê.

¹⁶Bol khai sồr ală cau bơtê bol khai dê, bal mơ bơnòr cau Herôt tus đơs mơ Kơnràñ lah: “Ơ Cau Bơto, bol hi git ồng la cau song mơ bơto gùng Yàng Tom Trồ dê dô bă song ngan, ò cah is di cau lơi, bơh ồng ò sền đah bơdìh cau dê.

¹⁷Behơ̆ dan yal bol hi in git, ồng kơlôi mbe lơi: Bơta boh dia Sesa in dimơ bơta boh lam hala ò?”

¹⁸Mơya Yàng Jesu git nùs iơh bơsak bol khai dê gen đơs lah: “Ơ ală cau ma blac, ñchi bơh tài bol mê lòng Añ taih?

¹⁹Ai tĕ Añ in sền priă boh dia.” Bol khai ai dô dơnie Kơnràñ in.

²⁰Kơnràñ lùp lah: “Rùp mơ sơnđan do la ñcau dê taih?”

²¹Bol khai ho lah: “Sesa dê.” Gen Kơnràñ đơs mơ bol khai lah: “Behơ̆ tơm wơl tĕ Sesa in phan lơi Sesa dê, mơ tơm wơl tĕ Yàng Tom Trồ in phan lơi Yàng Tom Trồ dê.”

²²Bol khai kơno jơnau hơ̆ gen ai lơh krơi, lòi Kơnràñ mơ lik lòt.

²³Tòm ngai hơ̆, gơs ală cau Saduse la cau đơs ò gơs bơta kis wơl, lòt tus lùp Kơnràñ lah:

²⁴“Ơ Cau Bơto, Môise neh đơs: ‘Dilah cau lơi chơt mơ ò gơs kòn, gen cau oh rơp bau mơ cau ùr bơnrau hơ̆, nàng tơrbŏ jơi bi khai in.’

²⁵Mơ tai, tòm bol hi neh gơs poh nă oh mi. Cau bi tơnhoa bau gen chơt, bơh ò gơs kòn gen lòi bau ùr khai oh klau khai in.

²⁶Cau bàr, cau pe, tus di cau poh kung behơ̆ sơl.

²⁷Lồi tơnơ̆, cau ùr hơ̆ kung chơt sơl.

²⁸Behơ̆ gen, tòm tŭ gơs bơta kis wơl, cau ùr hơ̆ rơp la bau ñcau dê tòm poh nă oh mi hơ̆ taih? Bơh jơh tơl nă neh bau mơ khai.”

²⁹Yàng Jesu ho lah: “Bol mê kơlôi tìs rau, bơh ò git Sră Goh, kung ò git gơnap gơnoar Yàng Tom Trồ dê.

³⁰Bơh tòm bơta kis wơl kòn mơnus ò lap klau tòmbau ùr, mơya la be ală cau gơnrơh ơm hơđang trồ.

³¹Bol mê òhềt sền jơnau Yàng Tom Trồ đơs bơh bơta kis wơl cau chơt dê lah:

³²‘Añ la Yàng Tom Trồ Abraham dê, Yàng Tom Trồ Isak dê, Yàng Tom Trồ Jakôp dê,’ ò ơ? Kơnràñ ò di la Yàng Tom Trồ cau chơt dê ò, mơya la Yàng cau kis dê.”

³³Mpồl làng bol kơno jơnau hơ̆ gen ai lơh crih crài bơh bơta bơto sồr Kơnràñ dê.

³⁴Tòm tŭ cau Pharisi kơno Yàng Jesu neh lơh cau Saduse in ò gơ ai đơs, gen bol khai pơjum bal.

³⁵Gơs dô nă cau bơto bơta boh lam tòm mpồl hơ̆ lùp nàng lòng Kơnràñ lah:

³⁶“Ơ Cau Bơto, tòm bơta boh lam, bơta sồr lam lơi la dờng rlau jơh taih?”

³⁷Yàng Jesu ho lah: “‘Mê jơh tĕ nùs, jơh hwềng soàn, jơh dơngoh jak mơ kòñ gơboh di Yàng la Yàng Tom Trồ mê dê.’

³⁸Hơ̆ la bơta sồr lam sơnròp ngan mơ dờng rlau jơh.

³⁹Ai bơta sồr lam bàr kung behơ̆ sơl: ‘Mê kòñ gơboh tĕ di cau gơp ƀòn he be he.’

⁴⁰Jơh ală bơta boh lam mơ jơnau gơnoar hwơr la tơrgòm tòm bàr bơta sồr lam hơ̆.”

⁴¹Tòm tŭ cau Pharisi pơjum bal, gen Yàng Jesu lùp bol khai lah:

⁴²“Bol mê kơlôi mbe lơi bơh Bơtau Krist taih? Kơnràñ la kòn ñcau taih?” Bol khai ho lah: “Kòn bơtau Dabit.”

⁴³“Kơnràñ đơs mơ bol khai lah: Behơ̆ gen mbe Dabit geh Yàng Hwềng chồl, sơnđan Bơtau Krist la Yàng, mơ đơs lah:

⁴⁴‘Yàng neh đơs mơ Yàng añ lah: Nggui tĕ đah ma Añ, Jơl tus di tŭ Añ ơn ală cau sò tơm mê hơđơm mpàng jơng mê dê.’

⁴⁵Behơ̆ dilah Dabit sơnđan Kơnràñ la ‘Yàng,’ gen mbe Kơnràñ la kòn Dabit dê taih?”

⁴⁶Ò gơs cau lơi rgơi ho dô jơnau lơi, mơ bơh ngai hơ̆ kung ò gơs cau lơi khin lùp Kơnràñ tai.