Read koho Mathiơ 26 Bible Online

Mathiơ 26 - koho bible

Mathiơ 26

¹Tơnơ̆ tŭ Yàng Jesu neh bơto ală jơnau hơ̆ rau, gen đơs mơ ală cau bơtê lah:

²“Bol mê git lah gam bàr ngai tai, gen tus di bơta pơjum sa Lòt Gan, mơ Kòn Mơnus rơp gơkòl bơtào nàng pơng di chi pơng.”

³Tŭ hơ̆ ală cau gơnoar lam bồ ơn phan duh khoai mơ ală cau kwang kra làng bol dê pơjum tòm gơlang cau gơnoar dờng lam bồ ơn phan duh khoai sơnđan la Kaiphe,

⁴Tòmbơyai jòi kai gơrmơ̆i lac lèo mơ tơnchơt Yàng Jesu.

⁵Mơya bol khai đơs lah: “Ò di lơh bơta hơ̆ tòm bơta pơjum sa ò, rngòt gơlik bơta nggồr nggàc digùl làng bol mòn.”

⁶Tòm tŭ Yàng Jesu ơm tòm Bethani, tòm hìu Simôn la cau dun,

⁷Gơs dô nă cau ùr at dô nơm gri mơ lŭ màng gơs mơñà ƀô bơlhu kas ngan tus hơ Kơnràñ mơ tuh hơđang bồ Kơnràñ tòm tŭ Kơnràñ nggui sa.

⁸Ală cau bơtê gŏ behơ̆ gen gơjrañ mơ đơs lah: “Ñchi bơh tài lơh roh ò kwơ be gen taih?

⁹Bơh mơñà ƀô bơlhu do rgơi tac geh oă jền nàng pà cau rƀah lơòi in.”

¹⁰Yàng Jesu git bơta hơ̆ gen đơs mơ bol khai lah: “Ñchi bơh tài bol mê lơh kalke cau ùr do in taih? Bơh khai neh lơh broă niam Añ in.

¹¹Bơh bol mê gơs cau rƀah lơòi ơm sùm mơ bol mê, mơya bol mê ò gơs Añ ơm sùm mơ bol mê.

¹²Khai tuh mơñà ƀô bơlhu hơđang să jan Añ hơ̆ la nàng rcang tơp Añ.

¹³Di ngan Añ đơs mơ bol mê, làm jơh dunnia tòm tiah lơi gơs bơto yal Jơnau Niam do, gen kung yal wơl broă khai neh lơh hơ̆ nàng kah bơh khai.”

¹⁴Tŭ hơ̆ gơs dô nă cau tòm jơt bàr nă cau bơtê sơnđan la Juda Iskariôt, lòt tus hơ ală cau gơnoar lam bồ ơn phan duh khoai,

¹⁵Mơ đơs lah: “Ală ồng kòñ ai añ in nđò nàng añ bơtào Khai ală ồng in?” Gen bol khai ai Juda in pe jơt pet priă.

¹⁶Bơh tŭ hơ̆ Juda jòi tŭ lơmpah nàng bơtào Kơnràñ bol khai in.

¹⁷Mơ tai, tòm ngai sơnròp pơjum sa piang lă ò gơs kañ dê, ală cau bơtê tus hơ Yàng Jesu mơ đơs lah: “Ntềng đah Kơnàñ kòñ bol hi rcang yò sa bơta pơjum sa Lòt Gan taih?”

¹⁸Kơnràñ sồr lah: “Lòt tĕ tòm ƀòn dờng, tus hơ hìu dô nă cau ne, mơ đơs lah: ‘Cau Bơto đơs lah: Jơ Añ mòr di; Añ rơp pơjum sa Lòt gan tòm hìu mê dê bal mơ ală cau bơtê Añ jê.’”

¹⁹Ală cau bơtê lơh jat be jơnau Yàng Jesu neh sồr mơ rcang bơta pơjum sa Lòt Gan.

²⁰Trồ mho rau Kơnràñ nggui sa bal mơ jơt bàr nă cau bơtê.

²¹Tòm tŭ sa Kơnràñ đơs lah: “Di ngan Añ đơs mơ bol mê, dô nă tòm bol mê rơp pơrlơ̆ dră di Añ.”

²²Bol khai moat jrùng ngan mơ kòp nă lùp Kơnràñ lah: “Ơ Yàng, hơ̆ la añ ơ?”

²³Kơnràñ ho lah: “Cau neh iurŭ tê di prềng bal mơ Añ hơ̆ la cau rơp pơrlơ̆ dră di Añ.

²⁴Kòn Mơnus lòt, jat be jơnau neh cih bơh Khai, mơya bòl glar cau do in la cau pơrlơ̆ dră di Kòn Mơnus! Chan ò deh khai la niam rlau.”

²⁵Juda la cau pơrlơ̆ dră di Kơnràñ lùp lah: “Ơ Rabi, hơ̆ la añ ơ?” Kơnràñ ho lah: “Ngan be mê neh đơs.”

²⁶Tòm tŭ sa, Yàng Jesu ai piang lă, ưnngài, dơrkă, gen tong ală cau bơtê in mơ đơs lah: “Ai tĕ mơ sa, do la să jan añ.”

²⁷Kơnràñ ai mơngàn, ưnngài, gen tong bol khai in mơ đơs lah: “Jơh tơl nă hùc tĕ,

²⁸bơh do la mhàm Añ, hơ̆ la mhàm bơta ho bal dê, neh tuh nàng kòp nă cau in geh toh glài.

²⁹Mơya Añ đơs mơ bol mê, bơh do jơl hìng nau Añ ò hùc dà plai ño tai, jơl tus di ngai Añ rơp hùc dà plai ño pa bal mơ bol mê tòm lơgar Bèp Añ jê.

³⁰Tòm tŭ neh đơs chò rau, Yàng Jesu mơ ală cau bơtê lik lòt tus hơ mơnơm Ôlibe.”

³¹Tŭ hơ̆ Kơnràñ đơs mơ bol khai lah: “Mang do jơh ală bol mê rơp gơtup tìs tài bơh Añ, bơh neh cih lah: ‘Añ rơp pù lơh cau ê belàt, Gen mpồl belàt rơp gơprah gơpring.’

³²Mơya tơnơ̆ mơ tŭ Añ geh kis wơl rau, gen Añ rơp lòt tus hơ Galile lài mơ bol mê.”

³³Pier đơs lah: “Bulah jơh tơl nă gơtup tìs tài bơh Kơnràñ, mơya añ ò tŭ lơi gơtup tìs ò.”

³⁴Yàng Jesu đơs lah: “Di ngan Añ đơs mơ mê, tòm mang do lài mơ tŭ iar nrau, gen mê rơp pơndang sang Añ pe dơ̆.”

³⁵Pier đơs mơ Kơnràñ lah: “Bulah añ pal chơt bal mơ Kơnràñ, añ kung ò pơndang sang Kơnràñ ò.” Jơh tơl nă cau bơtê kung đơs behơ̆ sơl.

³⁶Gen Yàng Jesu mơ ală cau bơtê lòt tus hơ dô bă tiah sơnđan la Getsemane. Kơnràñ sồr ală cau bơtê lah: “Nggui tĕ tềng do, tòm tŭ Añ lòt hòi dan đah ne.”

³⁷Kơnràñ lam Pier mơ bàr nă kòn Sebede dê lòt bal, Kơnràñ moat jrùng mơ dơrcul ngan.

³⁸Kơnràñ đơs mơ bol khai lah: “Hwềng soàn Añ moat jrùng jơl chơt; ơm tĕ tềng do mơ drơng kơp bal mơ Añ.”

³⁹Gen Kơnràñ lòt dô êt cơnđòa tai, blup mat tòm ù mơ hòi dan lah: “Ơ Bèp, dilah rgơi, dan lòi mơngàn do klàs bơh di Kòn; bulah behơ̆, ò di jat nùs kòñ Kòn dê, mơya jat nùs kòñ Bèp dê.”

⁴⁰Gen Kơnràñ rê wơl hơ ală cau bơtê, gŏ bol khai lơhă bic, gen đơs mơ Pier lah: “Behơ̆ gen bol mê ò rgơi drơng kơp bal mơ Añ dô jơ ơ?

⁴¹Drơng kơp tĕ mơ hòi dan, nàng bol mê ò gơtơmut tòm bơta ơniai; Hwềng nùs kòñ ngan mơya poac să lơbơn lơño.”

⁴²Kơnràñ lòt dơ̆ bàr tai mơ hòi dan lah: “Ơ Bèp, dilah mơngàn do ò rgơi klàs bơh di Kòn, mơ Kòn pal hùc, gen dan nùs kòñ Bèp gơs di.”

⁴³Kơnràñ rê wơl tai, gŏ bol khai gam lơhă bic, bơh mat bol khai yồp yồi ngan.

⁴⁴Kơnràñ lòi bol khai mơ lòt hòi dan dơ̆ pe, đơs tai be jơnau dan lài sơl.

⁴⁵Gen Kơnràñ rê wơl mơ ală cau bơtê mơ đơs lah: “Tŭ do gam bic lơhă mơ rlô ơ? Do, jơ neh tus rềp, Kòn Mơnus rơp gơkòl bơtào tòm tê ală cau glài.

⁴⁶Guh tĕ, lòt ih; ne, cau pơrlơ̆ dră di Añ neh tus rềp.”

⁴⁷Tòm tŭ Kơnràñ gam đơs, gen Juda la dô nă cau tòm jơt bàr nă cau bơtê, tus bal mơ dô mpồl cau oă at đào mơ gai, tus bơh ală cau gơnoar lam bồ ơn phan duh khoai mơ ală cau kwang kra làng bol dê.

⁴⁸Mơ tai, cau pơrlơ̆ dră di Kơnràñ neh ai bol hơ̆ in dô nơm tềl mơ đơs lah: “Cau lơi añ cum, hơ̆ la cau hơ̆; kup tĕ khai.”

⁴⁹Juda tus rềp mo di Yàng Jesu mơ đơs lah: “Rabi, niam să sơl?” Gen cum Kơnràñ.

⁵⁰Gen Yàng Jesu đơs mơ khai lah: “Ơ bơyô, ñchi bơta mê kòñ lơh gen lơh tĕ?” Gen bol khai tus ai tê sơmbat kup Yàng Jesu.

⁵¹Ne, gơs dô nă tòm ală cau ơm bal mơ Yàng Jesu tă đào, lơh cau dĭ cau gơnoar dờng lam bồ ơn phan duh khoai dê, sreh tac dô đah tồr khai.

⁵²Gen Yàng Jesu đơs lah: “Srồm tĕ đào tòm sơmprồm, bơh kòp nă cau lơi at đào gen rơp chơt bơh đào.

⁵³Mê kơlôi lah Añ ò rgơi dan mơ Bèp Añ, gen Kơnràñ sồr mo rlau jơt bàr mpồl cau gơnrơh tus mơ Añ ò ơ?

⁵⁴Mơya dilah behơ̆, gen mbe lơi Sră Goh gơlik di ngan nàng broă do pal gơlik gơs taih?”

⁵⁵Tòm jơ hơ̆ Yàng Jesu đơs mơ mpồl làng bol lah: “Bol mê at đào mơ gai tus kup Añ be kup cau phà ơ? Kòp ngai Añ neh nggui bơto sồr tòm hìu duh khoai mơ bol mê ò kup Añ.

⁵⁶Mơya jơh ală bơta do neh gơlik tus nàng jơnau ală cau gơnoar hwơr dê gơlik di ngan.” Tŭ hơ̆ jơh ală cau bơtê sang lòi Kơnràñ mơ dô.

⁵⁷Ală cau kup Yàng Jesu lam Kơnràñ tus hơ Kaiphe la cau gơnoar dờng lam bồ ơn phan duh khoai; tềng hơ̆ ală cau bơto bơta boh lam mơ ală cau kwang kra ơm pơjum bal.

⁵⁸Pier jat Kơnràñ ngài ngài tus di gơlang cau gơnoar dờng lam bồ ơn phan duh khoai dê, mut nggui bal mơ ală cau ling nàng sền bơta lồi dut broă hơ̆ la mbe lơi.

⁵⁹Mơ tai, ală cau gơnoar lam bồ ơn phan duh khoai mơ jơh Mpồl Kwang Tơrña jòi jơnau lơh cơng blac di Yàng Jesu, nàng tơnchơt Kơnràñ.

⁶⁰Bulah gơs oă cau tus lơh cơng blac, mơya bol khai jòi ò gơs cơng tàng lơi. Lồi tơnơ̆ gơs bàr nă cau tus,

⁶¹Mơ đơs lah: “Cau do neh đơs: ‘Añ rgơi sòr tơrlah hìu duh khoai Yàng Tom Trồ dê gen bơtào gơs wơl tòm pe ngai.’”

⁶²Cau gơnoar dờng lam bồ ơn phan duh khoai ntào đơs mơ Kơnràñ lah: “Mê ò ho wơl jơnau ală cau do lơh cơng yă mê ơ?”

⁶³Mơya Yàng Jesu ơm mŏ mŏ. Cau gơnoar dờng lam bồ ơn phan duh khoai đơs mơ Kơnràñ lah: “Añ sồr mê sơnio Yàng Tom Trồ gam kis sùm, srat să mơ yal tĕ bol hi in, mê ngan la Bơtau Krist, Kòn Yàng Tom Trồ dê ơ?”

⁶⁴Yàng Jesu ho lah: “Ngan be ồng neh đơs. Mơya Añ đơs mơ bol mê, bơh do jơl hìng nau bol mê rơp gŏ Kòn Mơnus nggui đah ma Bơtau Gơnap Gơnoar dê, ơm hơđang mhwal trồ mơ tus.”

⁶⁵Gen cau gơnoar dờng lam bồ ơn phan duh khoai crè ào khai mơ đơs lah: “Khai neh đơs tràl sơrbil. Ñchi bơh tài bol he gam jòi cau ndai lơh cơng taih? Do, bol mê pa kơno jơnau tràl sơrbil hơ̆.

⁶⁶Mbe bol mê kơlôi taih?” Bol khai ho lah: “Khai pal chơt.”

⁶⁷Gen bol khai choh di mat Kơnràñ mơ pòng lơh di Kơnràñ; cau ƀà pah Kơnràñ,

⁶⁸Mơ đơs lah: “Ơ Bơtau Krist, đơs hwơr tĕ bol hi in! Ñcau neh pù lơh mê taih?”

⁶⁹Tŭ hơ̆ Pier ơm nggui đah bơdìh tòm ƀlàng. Gơs dô nă cau dĭ ùr tus đơs mơ khai lah: “Mê kung ơm bal mơ Jesu cau Galile.”

⁷⁰Mơya Pier pơndang mo di đap bol khai lah: “Añ ò git ñchi ai đơs.”

⁷¹Tòm tŭ khai tus hơ rơng hìu dờng, gơs dô nă cau dĭ ùr ndai gŏ khai, gen đơs mơ ală cau ơm tềng hơ̆ lah: “Cau do kung ơm bal mơ Jesu cau Nasaret sơl.”

⁷²Mơ Pier srat să pơndang tai lah: “Añ ò git cau hơ̆ ò.”

⁷³Dô ơthoa tai, ală cau ntào tềng hơ̆ tus đơs mơ Pier lah: “Ngan mê kung bal mơ mpồl hơ̆, bơh sap đơs mê yal tơlik mê.”

⁷⁴Gen khai srat rma mơ srat să lah: “Añ ò git cau hơ̆ ò.” Tŭ hơ̆ iar nrau mo.

⁷⁵Pier kah wơl jơnau Yàng Jesu neh đơs lah: “Lài mơ tŭ iar nrau, mê rơp pơndang sang Añ pe dơ̆.” Gen khai lik lòt, ñìm rac ròc pơt wòl.