Read koho Mathiơ 27 Bible Online

Mathiơ 27 - koho bible

Mathiơ 27

¹Tòm tŭ rìng àng, ală cau gơnoar dờng lam bồ ơn phan duh khoai mơ ală cau kwang kra làng bol dê bơyai nàng tơnchơt Yàng Jesu.

²Bol khai cap Kơnràñ, mơ cèng jào di đap Pilat, la kwang đơng lơgar.

³Tŭ hơ̆ Juda la cau neh pơrlơ̆ dră di Kơnràñ, gŏ Kơnràñ kòl lơh nền glài, gen khai kah kơlôi wơl mơ cèng pe jơt pet priă jào wơl ală cau gơnoar dờng lam bồ ơn phan duh khoai mơ ală cau kwang kra in,

⁴mơ đơs lah: “Añ neh tìs glài bơh neh bơtào mhàm ò gơs glài.” Mơya bol khai đơs lah: “Broă hơ̆ gơs ñchi gơkwă mơ bol hi taih? Kong mê dê!”

⁵Gen Juda sơrbì ală pet priă tòm hìu duh khoai, mơ lik lòt yồng ngko.

⁶Ală cau gơnoar dờng lam bồ ơn phan duh khoai dòñ ală priă hơ̆ mơ đơs lah: “Ò geh gơnoar ơn priă do tòm đam sàng goh, bơh hơ̆ la khà priă mhàm dê.”

⁷Gen bol khai bơyai, ngui priă hơ̆ rwat ƀlàng sre cau lơh glah dê nàng lơh tiah tơp ƀồc ală cau nac crih.

⁸Behơ̆ ƀlàng sre hơ̆ sơnđan la Sre Mhàm jơl tus di ngai do.

⁹Tŭ hơ̆, jơnau cau gơnoar hwơr Jeremi neh đơs geh gơlik di ngan: “Bol khai ai pe jơt pet priă, la khà priă mơ kòn sau Israel neh lơh nền Kơnràñ in,

¹⁰mơ ai priă hơ̆ rwat ƀlàng sre cau lơh glah dê, jat be Yàng neh sồr añ.”

¹¹Yàng Jesu ntào di đap cau kwang đơng lơgar. Cau kwang lùp lah: “Mê ngan la Bơtau làng bol Juda dê sơl?” Yàng Jesu ho lah: “Ngan be ồng đơs.”

¹²Tòm tŭ ală cau gơnoar dờng lam bồ ơn phan duh khoai mơ ală cau kwang kra yă Kơnràñ, Kơnràñ ò ho dô êt lơi.

¹³Gen Pilat đơs mơ Kơnràñ lah: “Mê ò kơno ală bơta bol khai lơh cơng yă mê ò ơ?”

¹⁴Mơya Kơnràñ ò ho dô jơnau lơi, tian gơs cau kwang đơng lơgar ai lơh krơi ngan.

¹⁵Mơ tai, tus di bơta pơjum sa, cau kwang đơng lơgar òs hồ dô nă cau glài jàm, jat nùs làng bol kòñ.

¹⁶Tŭ hơ̆, gơs dô nă cau glài tơnchơt cau sơnđan la Baraba.

¹⁷Tòm tŭ bol khai pơjum bal, gen Pilat lùp bol khai lah: “Bol mê kòñ añ hồ ñcau lơi, Baraba hala Jesu sơnđan la Krist taih?”

¹⁸Bơh Pilat git loh bol hơ̆ bơtào Kơnràñ bơh nùs ƀoah gơjrañ.

¹⁹Tòm tŭ cau kwang đơng lơgar gam nggui hơđang cơnòng cahrña, bau ùr Pilat sồr cau lòt đơs mơ khai lah: “Mê bañ ƀư di cau song ring hơ̆, bơh khai mơ tòm ngai do añ neh kong bòl glar ngan tòm bơta mpau.”

²⁰Mơya ală cau gơnoar dờng lam bồ ơn phan duh khoai mơ ală cau kwang kra bơchồt mpồl làng bol dan tĕ hồ Baraba mơ tơnchơt Yàng Jesu.

²¹Cau kwang đơng lơgar lùp tai lah: “Tòm bàr nă cau do, bol mê kòñ añ hồ ñcau?” Bol khai ho lah: “Baraba.”

²²Pilat đơs lah: “Behơ̆ ñchi añ rơp lơh di Jesu sơnđan la Krist taih?” Jơh ală bol khai ho lah: “Pơng tĕ Khai di chi pơng.”

²³Cau kwang lùp lah: “Ñchi broă iơh bơsak Cau do lơh taih?” Mơya bol khai sơlo driau dờng ngan lah: “Pơng tĕ Khai di chi pơng!”

²⁴Tòm tŭ Pilat gŏ he ò rgơi lơh bơta lơi, mơ tai bơta nggồr nggàc sơlo gơbơtơl, gen khai ai dà rào tê di đap mpồl làng bol mơ đơs lah: “Añ ò gơs glài bơh mhàm cau song ring do; kong bol mê dê.”

²⁵Jơh làng bol ho lah: “Dan mhàm Khai tuh hơđang bol hi mơ kòn sau bol hi dê!”

²⁶Gen Pilat hồ Baraba bol khai in, sồr pù lơh Yàng Jesu, mơ jào Kơnràñ nàng pơng di chi pơng.

²⁷Tŭ hơ̆ cau ling kwang đơng lơgar dê cèng Yàng Jesu mut tòm gơlang Pilat mơ pơjum jơh mpồl ling gùt dar Kơnràñ.

²⁸Bol khai hồ ào Kơnràñ mơ tơnsoh Kơnràñ in ào pơrhê.

²⁹Bol khai tàñ dô nơm sơgơn mơ lò tơndau di bồ Kơnràñ, mơ ơn dô nơm gai proh tòm tê ma Kơnràñ. Bol khai cùn gơltang di đap Kơnràñ mơ dơñŏ tơnhial lah: “Khoai Bơtau làng bol Juda dê!”

³⁰Bol khai choh hơđang Kơnràñ, ai gai proh pù di bồ Kơnràñ.

³¹Dơ̆ bol khai neh dơñŏ tơnhial Kơnràñ rau, bol khai hồ ào pơrhê, tơnsoh wơl ào Kơnràñ dê, mơ lam Kơnràñ nàng pơng di chi pơng.

³²Tòm tŭ lik lòt, bol khai tìp dô nă cau Siren sơnđan la Simôn, mơ kup bơklơn khai tui chi pơng Kơnràñ dê.

³³Tŭ tus hơ dô bă tiah sơnđan la Gôgôtha, gơtha la Tiah Ntìng Bồ,

³⁴bol khai ai Kơnràñ in ñô tơrnòm bơcă bal mơ plai mat bơtang, mơya tòm tŭ liap gen Kơnràñ ò bài ñô.

³⁵Tŭ neh pơng Kơnràñ di chi pơng rau, bol khai tă khà mơ tòmpà ào Kơnràñ dê;

³⁶gen bol khai nggui tềng hơ̆ drơng kơp Kơnràñ.

³⁷Hơđang chi pơng Kơnràñ geh cih tơnggume bơta lơh nền glài lah: “DO LA JESU, BƠTAU LÀNG BOL ISRAEL DÊ.”

³⁸Tŭ hơ̆ bàr nă cau blơ̆ kung kong pơng di chi pơng bal mơ Kơnràñ, dô nă đah ma, dô nă đah kiau.

³⁹Ală cau lòt gan dơñŏ tơnhial, rtơs bồ,

⁴⁰mơ đơs lah: “Mê la cau sòr tơrlah hìu duh khoai mơ bơtào gơs wơl tòm pe ngai, dong klàs tĕ să tòm mê! Dilah mê la Kòn Yàng Tom Trồ, mù tĕ bơh chi pơng.”

⁴¹Ală cau gơnoar lam bồ ơn phan duh khoai, ală cau bơto bơta boh lam mơ ală cau kwang kra kung dơñŏ tơnhial Kơnràñ lah:

⁴²“Khai neh dong klàs cau ndai, mơ ò rgơi dong să tòm he. Khai la Bơtau Israel dê; tŭ do lòi tĕ khai mù bơh chi pơng, gen bol he rơp dòn mo.

⁴³Khai dòn kơnòm di Yàng Tom Trồ; dilah Yàng Tom Trồ kòñ gơboh Khai, gen tŭ do lòi tĕ Kơnràñ dong klàs Khai, bơh Khai neh đơs lah: ‘Añ la Kòn Yàng Tom Trồ.’”

⁴⁴Cau blơ̆ gơkòl pơng bal mơ Kơnràñ kung đơs jroh jram Kơnràñ behơ̆ sơl.

⁴⁵Bơh jơt bàr jơ gùl ngai gơlik klam jơngo làm ù jơl tus di pe jơ mho

⁴⁶Pơgap pe jơ mho, Yàng Jesu hòi dờng jơnau lah: “Eli, Eli, lama sabaktani;” hơ̆ la, “Ơ Yàng Tom Trồ Kòn dê, ơ Yàng Tom Trồ Kòn dê, ñchi bơh tài Kơnràñ sang lòi Kòn?”

⁴⁷Kơno behơ̆, gen cau ƀà tòm mpồl ơm rềp tềng hơ̆ đơs lah: “Khai hòi Eli.”

⁴⁸Gơs dô nă cau tòm bol khai ntoat mơ, ai dô nơm phan nsồp iurŭ bềng dà sràt, ơn di cồng gai proh mơ tong Kơnràñ in ñô.

⁴⁹Ai ală cau ndai đơs lah: “Gơn tĕ, sền nề Eli tus nàng dong tă khai hala ò.”

⁵⁰Yàng Jesu hòi tai dô jơnau dờng, gen tac nhơm.

⁵¹Mơ ne, bài kơrnìng tòm hìu duh khoai gơcrè bàr pơnah bơh đang tus hơđơm; ù gơlơnggơr, mơ lŭ klềr bơcah.

⁵²Ală bơtô ƀồc kung pò tơlik, oă ƀồc cau sàng goh neh bic lơhă geh kis wơl mơ lik bơh bơtô ƀồc.

⁵³Tơnơ̆ tŭ Yàng Jesu kis wơl, gen bol hơ̆ mut tòm ƀòn dờng sàng goh mơ tơlik mat oă cau in gŏ.

⁵⁴Cau at dô rhiang ling bal mơ ală cau ling kơp gàr Yàng Jesu, gŏ ù gơlơnggơr mơ ală bơta neh gơlik gơs, gen rngòt rngơt oă ngan mơ đơs lah: “Ngan, Cau do la Kòn Yàng Tom Trồ.”

⁵⁵Tềng hơ̆ gơs oă cau ùr ơm sền bơh ngài, bol khai la ală cau neh jat Yàng Jesu bơh Galile nàng duh broă Kơnràñ.

⁵⁶Tòm bol khai gơs Mari Madơlen, Mari mè Jakơ mơ Jôsep, bal mơ mè bàr nă kòn klau Sebede dê.

⁵⁷Tus trồ mho, gơs dô nă cau pas sơm tus bơh Arimathe, sơnđan la Jôsep, kung la cau bơtê Yàng Jesu dê.

⁵⁸Khai tus hơ Pilat mơ dan ƀồc Yàng Jesu. Gen Pilat sồr ai khai in.

⁵⁹Jôsep ai ƀồc Kơnràñ pò mơ bài che dơmài lơbơn goh,

⁶⁰mơ ơn tòm bơtô pa khai dê neh phàt tòm pơnai lŭ klềr, khai pơrlă dô nơm pơnai lŭ dờng kơrdơl mpồng bơtô, gen lòt.

⁶¹Mari Madơlen mơ Mari ndai ơm tềng hơ̆, nggui tòm toh mơ bơtô.

⁶²Àng drim hìng, tơnơ̆ mơ ngai Rcang Lài, ală cau gơnoar lam bồ ơn phan duh khoai mơ ală cau Pharisi tus pơjum di dap Pilat,

⁶³mơ đơs lah: “Ơ ồng, bol hi kah cau blac pơrlồm do tòm tŭ gam kis đơs lah: ‘Tơnơ̆ mơ pe ngai gen Añ rơp kis wơl.’

⁶⁴Behơ̆ dan sồr cau kơp gàr bơtô ƀồc nền cê jơl tus di ngai pe, rngòt ală cau bơtê Khai dê tus kơñau ƀồc mòn, gen đơs mơ làng bol lah: ‘Khai neh kis wơl bơh bơta chơt.’ Mơ bơta blac pơrlồm tơnơ̆ rơp iơh rlau mơ bơta lài sơl.”

⁶⁵Pilat đơs mơ bol khai lah: “Bol mê gơs cau ling drơng kơp, lòt tĕ kơp gàr nền cê jat be bơta rgơi bol mê dê.”

⁶⁶Gen bol khai lòt tap ƀang kì di pơnai lŭ, mơ sồr cau ling kơp gàr bơtô ƀồc nền cê.