Read koho Mathiơ 28 Bible Online

Mathiơ 28 - koho bible

Mathiơ 28

¹Tơnơ̆ mơ ngai Saƀat, tòm tŭ rìng àng ngai sơnròp tòm dô poh, Mari Madơlen mơ Mari ndai tus còp ƀồc.

²Ne, gơs ù gơlơnggơr pràn ngan, bơh cau gơnrơh Yàng dê mù bơh đang trồ, tus pơrlă pơnai lŭ mơ nggui hơđang gơ.

³Rùp să cau gơnrơh àng be puhlèp, mơ ào bò be piar.

⁴Ală cau ling drơng kơp rngòt rngơt, rơm să mơ gơlik be cau chơt.

⁵Gen cau gơnrơh đơs mơ ală cau ùr hơ̆ lah: “Bañ rngòt, bơh añ git bol ai jòi Yàng Jesu, Bơtau neh kong pơng di chi pơng.

⁶Kơnràñ ò ơm tềng do, Kơnràñ neh kis wơl rau, be jơnau Kơnràñ neh đơs. Tus tĕ sền tiah Kơnràñ neh bic.

⁷Lòt tĕ mhar yal ală cau bơtê Kơnràñ in lah: Kơnràñ neh kis wơl bơh bơta chơt rau. Mơ do, Kơnràñ lòt hơ Galile lài mơ bol mê. Tềng hơ̆ bol mê rơp tìp Kơnràñ. Hơ̆ la bơta añ neh yal bol ai in.”

⁸Bàr nă cau ùr sơrbac sơrbang lik bơh bơtô rngòt ndang hòn chò ndang, ntoat yal ală cau bơtê Kơnràñ in.

⁹Nisơna, Yàng Jesu tìp bol khai mơ đơs lah: “Lơngap lơngai bol ai in!” Bol khai tus rềp, kwar jơng Kơnràñ mơ cùn khoai Kơnràñ.

¹⁰Yàng Jesu đơs mơ bol khai lah: “Bañ rngòt, lòt tĕ yal ală oh mi Añ in tus hơ Galile; tềng hơ̆ bol khai rơp tìp Añ.”

¹¹Tòm tŭ bàr nă cau ùr hơ̆ lòt, gen gơs cau bơh ală cau ling drơng kơp ƀồc mut tòm ƀòn dờng, yal ală cau gơnoar lam bồ ơn phan duh khoai in jơh ală bơta neh gơlik gơs.

¹²Tơnơ̆ mơ tŭ neh pơjum bơyai lơh nền mơ ală cau kwang kra, gen bol khai ai oă khà priă ală cau ling in,

¹³mơ nting lah: “Đơs tĕ lah: ‘Ală cau bơtê khai dê neh tus tòm trồ mang, mơ kơñau ƀồc tòm tŭ bol hi lơhă bic.’

¹⁴Dilah kwang đơng lơgar kơno bơta hơ̆, gen bol hi rơp bơto pơndòm khai, mơ lơh bol mê in klàs bơh bơta kơlôi rngòt.”

¹⁵Behơ̆ ală cau ling dòp priă mơ lơh jat be jơnau neh nting. Jơnau hơ̆ pơnro tòm làng bol Israel jơl tus di ngai do.

¹⁶Jơt dùl nă cau bơtê lòt tus hơ kơnhwàl Galile, tus hơ mơnơm mơ Yàng Jesu neh sơnio bol khai in.

¹⁷Dơ̆ gŏ Kơnràñ, gen bol khai cùn khoai Kơnràñ, mơya gơs cau ƀà pin wil wơl.

¹⁸Yàng Jesu tus, đơs mơ bol khai lah: “Jơh gơnoar hơđang trồ mơ tòm ù neh jào Añ in.

¹⁹Behơ̆, lòt tĕ lơh jơh ală làng bol in gơlik gơs cau bơtê Añ jê, ai sơnđan tĕ Yàng Bèp, Yàng Kòn mơ Yàng Hwềng Goh, lơh ƀaptem bol khai in.

²⁰Mơ bơto bol khai lơh jat jơh ală bơta Añ neh sồr bol mê. Mơ do, Añ ơm sùm mơ bol mê jơl tus di lồi dut rài.”