Read koho Mathiơ 3 Bible Online

Mathiơ 3 - koho bible

Mathiơ 3

¹Tòm ală ngai hơ̆, Jang Ƀaptis tus bơto yal tòm ƀlàng ngềt ngơt Jude lah:

²“Gơjrañ sang glài tĕ, bơh lơgar đang trồ neh tus rềp.”

³Hơ̆ la bơh Jang Ƀaptis mơ cau gơnoar hwơr Esai neh đơs: “Gơs jơnau cau hòi driau tòm ƀlàng bràs lah: ‘Wàs tĕ gùng Yàng in, Bơsong tĕ ală gùng dềt Kơnràñ dê.’”

⁴Jang soh ào sơnò làkđa, kơt but mơ che gơltau, sa srah nting mơ dà kròt brê.

⁵Tŭ hơ̆ làng bol Jerusalem, jơh Jude mơ làm tiah gùt dar Jordan lik lòt tus hơ khai,

⁶yal glài he, mơ Jang lơh Ƀaptem bol khai in tòm hiòng Jordan.

⁷Mơya tòm tŭ Jang gŏ oă cau Pharisi mơ cau Saduse tus hơ khai nàng gơs Ƀaptem, gen khai đơs mơ bol hơ̆ lah: “Ơ jơi bơtiàn bơs tur ne, ñcau neh yal bol mê in pleh klàs dê bơta gơjrañ dờng rơp tus taih?

⁸Gơlik tĕ plai di pal mơ bơta gơjrañ sang glài.

⁹Bañ khin đơs is lah: ‘Gơs Abraham la ồng pàng bol he dê.’ Bơh añ đơs mơ bol mê, Yàng Tom Trồ rgơi lơh ală lŭ do in gơlik gơs kòn sau Abraham dê.

¹⁰Tŭ do sùng neh ơn rềp dê tòm chi rau; dilah chi lơi ò gơlik plai niam, gen kơl mơ sang tòm ồs.

¹¹Đah mơ añ, añ lơh ƀaptem bol mê in mơ dà nàng yal tơlik bơta gơjrañ sang glài. Mơya Bơtau tus tơnơ̆ añ gơs gơnoar pràn rlau mơ añ, añ ò di pal at gơltau jă Kơnràñ dê. Kơnràñ rơp lơh ƀaptem bol mê in mơ Yàng Hwềng Goh mơ ồs.

¹²Tê Kơnràñ at đồng, rơp puh làn goh ngan, chŏ kòi mi ơn tòm đam, ai nsiap gen chu tòm ồs hơng sùm.”

¹³Tŭ hơ̆ Yàng Jesu bơh Galile lòt tus hơ Jang tòm hiòng Jordan nàng Jang lơh ƀaptem Yàng Jesu in.

¹⁴Mơya Jang kư̆ ò bài lơh mơ đơs lah: “Să tòm añ pal dan Kơnràñ lơh ƀaptem añ in sồng di, mơ Kơnràñ tus hơ añ wơl ơ?”

¹⁵Yàng Jesu ho lah: “Tŭ do kư̆ lơh tĕ, bơh bol he pal lơh wil tơl jơh ală broă song ring behơ̆.” Gen Jang dòn jơnau.

¹⁶Dơ̆ neh ƀaptem rau, Yàng Jesu guh mo bơh dà. Ne, ală tap trồ gơ pò, mơ Kơnràñ gŏ Hwềng Yàng Tom Trồ dê be dô nơm sềm ntòp mù rơp hơđang Kơnràñ.

¹⁷Ne, gơs jơnau bơh đang trồ đơs lah: “Do la Kòn kòñ gơboh Añ jê, niam nùs Añ jơh ală bơta.”